¹ Imbah nitu, Yesus tulak wan sampai ka kota asal-Nya, dan murid-murid maumpati Sidin. ² Pas hari Sabat, Yesus mulai mangajar di sinagoge. Banyak urang nang mandangar Sidin marasa kagum, wan baucap, "Matan mana Sidin mandapat sabarataan hal nitu? Hikmat apa nang dijulung ka Sidin wan mukjizat-mukjizat nang kayaitu dilakukan awan tangan Sidin? ³ Bukankah Sidin tukang kayu, anak Maria, dingsanak Yakobus wan Yoses wan Yudan wan Simon? Bukankah dingsanak-dingsanak binian sidin ada di sini lawan kita?" Lalu, buhannya kaciwa wan manolak Sidin. ⁴ Imbah nitu, Yesus baucap ka buhannya, "Dimana-mana urang manghormati saurang nabi, kacuali di wadah asalnya saurang, wan di antara dingsanak saurang, wan di rumahnya saurang." ⁵ Maka, Yesus kada kawa maadakan mukjizat di sana, kacuali maandak tangan Sidin di atas babarapa urang garing wan manyambuhakan buhannya. ⁶ Sidin heran karana kadaparcayaan buhannya. Imbah nitu, Sidin tulak bakaliling ka kampung-kampung wan mangajar. Yesus Mangutus Murid-Murid-Nya ⁷ Imbah nitu, Yesus mangiauw kadua belas murid wan mulai mangutus buhan badua-dua, wan manjulung buhannya kuasa atas roh-roh najis. ⁸ Lalu, Sidin mamarintah buhannya agar buhannya kada mambawa apa-apa dalam parjalanan, kacuali tongkat, tanpa roti, tanpa tas, tanpa uang dalam ikat pinggang buhannya, ⁹ tatapi mamakai sandal wan jangan mamakai dua pakaian. ¹⁰ Yesus baucap ka buhannya, "Di mana haja ikam mamasuki sabuah rumah, baganalah di sana sampai ikam kaluar dari situ. ¹¹ Jika ada nang kada manarima ikam wan kada mandangar ikam, katika ikam tulak kabasakan dabu dari kaki ikam sabagai Sabuah kasaksian gasan buhannya." ¹² Lalu, buhannya tulak wan mambaritakan bahwa urang-urang harus batobat. ¹³ Maka, buhannya mangusir banyak setan wan mangurapi banyak urang sakit lawan minyak, sarta manyambuhakan buhannya. Herodes Mandangar Habar Tantang Yesus ¹⁴ Raja Herodes sudah mandangarnya, karana ngaran Yesus sudah takanal, wan urang baucap, "Yohanes pambaptis sudah bangkit matan urang mati, maka mukjizat-mukjizat nitu bagawi dalam Sidin." ¹⁵ Sabagian baucap, "Sidin adalah Elia." Namun, sabagian baucap, "Sidin adalah saurang nabi, seperti salah satu dari para nabi." ¹⁶ Akan tatapi, katika Herodes mandangar hal nitu, inya baucap, "Yohanes nang sudah ku panggal kapalanya, sudah dibangkitakan!" Yohanes Pambatis Dibunuh ¹⁷ Mamang Herodes saurang nang manyuruh urang, mamarintahakan gasan manangkap Yohanes, wan mambalanggunya di dalam panjara demi Herodias, bini dingsanak lalakiannya, Filipus, karana Herodes sudah manikahi Herodias. ¹⁸ Sabab, Yohanes babarapa kali baucap ka Herodes, "Kada baik ikam mangambil bini dingsanak ikam." ¹⁹ Oleh karana nitu, Herodias manyimpan dandam tahadap Yohanes wan handak mambunuhnya, tatapi inya kada kawa. ²⁰ Sabab, Herodes takutan lawan Yohanes imbah inya tahu Yohanes adalah urang baik wan urang suci, wan Herodes malindunginya. Katika Herodes mandangar Yohanes, Inya manjadi sangat bingung, tatapi Herodes himung mandangarakan Yohanes. ²¹ Namun, tibalah hari nang pas, katika Herodes pada hari ulang tahunnya maadakan sabuah parjamuan gasan pajabat-pajabat tingginya, perwira-perwiranya, wan pamimpin-pamimpin Galilea. ²² Lalu katika anak binian Herodias masuk wan manari, inya mahimungakan Herodes wan buhan nang duduk basama inya. Raja baucap ka gadis nitu, "Minta apa haja nang ikan handak wan ulun cagar manjulung ka ikam." ²³ Herodes bajanji ka inya, "Apa haja nang ikam minta lawan ulun, cagar ulun julung ka ikam, bahkan sampai saparuh dari karajaanku." ²⁴ Gadis nitu tulak wan baucap ka umanya, "Ulun harus minta apa?" Umanya manjawab, "Kapala Yohanes Pambaptis." ²⁵ Saat nitu jua lawan tagasa-gasa, gadis nitu datang ka raja wan baucap, "Ulun handak wayahini jua raja manjulung ka ulun kapala Yohanes Pambaptis di atas baki." ²⁶ Karana nitu, raja sangah sadih, tapi karana janjinya wan urang-urang nang makan basama inya, inya kada handak manolak gadis nitu. ²⁷ Lalu, raja sagara mangirim saurang algojo gasan mambawa kapala Yohanes, lalu algojo itu tulak wan mamanggal kapala Yohanes di panjara. ²⁸ Imbah nitu, inya mambawa kapala Yohanes di atas baki wan manjulungnya ka gadis nitu, wan gadis nitu manjulungnya ka umanya. ²⁹ Katika murid-murid Yohanes mandangar, buhannya datang wan mangambil awak Yohanes diandaknya di dalam kubur. Yesus Mambari Makanan Ka Labih dari Lima Ribu Urang ³⁰ Imbah nitu, para rasul basama lawan Yesus wan mahabarakan ka Sidin apa haja nang sudah diulah buhannya wan apa haja nang sudah diajarakan buhannya. ³¹ Yesus baucap ka buhannya, "Marilah mangasingkan diri ka wadah nang sunyi wan baistirahat satumat." Sabab, ada banyak urang nang datang wan tulak, gasan makan pun buhannya kada sawat. ³² Lalu, Yesus wan murid-murid Sidin tulak maasingkan diri manaiki jukung ke wadah nang sunyi. ³³ Akan tatapi, urang banyak malihat buhannya tulak wan pinandu lawan buhannya. Urang banyak bukah malawati jalan darat dari sabarataan kota, tiba di sana mandahului yesus wan murid-murid Sidin. ³⁴ Katika Yesus tulak ka pinggir danau, Sidin malihat banyak urang, Sidin marasa maras ka buhannya karana buhannya nang kaya domba nang kada baisi gembala. Maka, Yesus mulai mangajar buhannya banyak hal. ³⁵ Katika hari mulai malam, murid-murid Yesus datang ka Yesus wan baucap, "Wadah ni wadah nang sunyi wan sudah larut malam. ³⁶ Suruh buhannya tulak ka daerah sakaliling wan ka desa-desa supaya buhannya manukar sasuatu gasan dimakan." ³⁷ Tapi Yesus manjawab, "ikam lah nang mambari makan buhannya." lalu, buhannya baucap ka Sidin, "Haruskah kami tulak wan manukar roti saharga 200 dinar wan mambari buhannya gasan makan?" ³⁸ Yesus baucap ka buhannya, "Ada barapa roti ampun ikam? tulak wan lihati!" Imbah buhannya mangatahuinya, buhannya baucap, "Lima roti wan dua ekong iwak." ³⁹ Lalu, Yesus mamarintah sabarataan urang agar duduk bakalompok-kalompok di atas rumput hijau. ⁴⁰ Urang banyak nitu duduk bakalompok, ada nang saratus urang wan ada nang lima puluh urang. ⁴¹ Imbah nitu, Yesus mangambil lima roti wan dua ekong iwak, mamandang ka langit, Sidin mangucap syukur wan mamacah-macahkan roti, lalu manjulungnya ka murid-murid Sidin supaya mahidangakannya ka urang banyak. Sidin jua mambagi-bagi dua ekong iwak ka sabarataan urang. ⁴² Wan, bubuhannya makan sampai kanyang. ⁴³ Imbah nitu, buhannya mangambil dua belas karanjang nang hibak lawan sisa-sisa roti wan iwak. ⁴⁴ Ada lima ribu lalakian nang mamakan roti. Yesus Bajalan di Atas banyu ⁴⁵ Imbah nitu, Yesus sagara mamarintah murid-murid Sidin naik ka jukung wan tulak mandahului Sidin ka sabarang, ka Betsaida, samantara Sidin manyuruh urang banyak nitu tulak. ⁴⁶ Imbah pamitan lawan buhannya, Sidin tulak ka bukit gasan badoa. ⁴⁷ Katika manjalang malam, jukung barada di tangah danau, wan Yesus saurangan di darat. ⁴⁸ Imbah malihat murid-murid Sidin mandayung lawan susah payah karana angin batiup balawanan arah. kira-kira pada jam jaga malam kaampat, Yesus mandatangi buhannya bajalan di atas danau wan Sidin handak bajalan malawati buhannya. ⁴⁹ Tapi katika buhannya malihat Yesus bajalan di atas danau, buhannya manyangka kalo Sidin adalah hantu, lalu buhannya bakuciak, ⁵⁰ karana buhannya sabarataan malihat Yesus wan katakutan. Namun, Yesus langsung bapander ka buhannya, wan baucap, "Tananglah. ini Aku! Kada boleh takut." ⁵¹ Lalu, Sidin naik basama buhannya ka jukung, wan angin pun rada, wan buhannya sangat takjub. ⁵² Sabab, buhannya masih balum mamahami tantang mukjizat lima roti nitu karana hati buhannya masih dikarasakan. Yesus Manyambuhakan Banyak Urang ⁵³ Imbah Yesus wan murid-murid Sidin manyabarang, buhannya mandarat di tanah Genesaret wan balabuh. ⁵⁴ Katika, buhannya turun dari jukung, urang-urang langsung pinandu lawan Yesus, ⁵⁵ wan bukah ka saluruh daerah nitu wan mulai mambawa urang-urang garing di atas kasur, ka mana pun buhannya mandangar tantang kabaradaan Yesus. ⁵⁶ Maka, ka mana pun Yesus masuk ka desa-desa, atau kota-kota, atau daerah-daerah di sakitarnya, buhannya mambaringakan urang-urang garing di wadah karamaian wan mamohon ka Sidin supaya buhannya kawa manjamah ujung jubah Sidin haja. Siapa haja nang manjapai jubah Sidin manjadi sambuh.