¹ Imbah nitu, Yesus maninggalakan wadah nitu wan tulak ka wilayah Yudea wan ka sabarang sungai Yordan. Urang banyak bakumpul mangarumuni Sidin. Nang kaya kabiasaan Sidin, Sidin mangajar buhannya. ² Imbah nitu, urang Farisi mandatangi Sidin, wan gasan mancobai Sidin buhannya batakun, "Apakah dibujurakan saurang laki mancaraikan bininya?" ³ Yesus manjawab buhannya, "Apa nang Musa parintahakan ka ikam?" ⁴ Buhannya baucap, "Musa maijinakan saurang suami mambuat surat carai wan mancaraikannya." ⁵ Tatapi, Yesus baucap ka buhannya, "Karna kakarasan hati ikam lah, Musa manulisakan parintah ini ka ikam. ⁶ Tatapi, matan pamulaan panciptaan, "Allah manciptakan buhan lakian wan binian. ⁷ Karna nitulah, saurang lakian cagar maninggalakan abah wan umanya. ⁸ Kaduanya cagar manjadi satu daging. 'Awan damikian, buhannya bukan lagi dua, malainkan satu daging. ⁹ Jadi, apa nang sudah Allah satuakan jangan ada manusia nang mamisahakan." ¹⁰ Imbah nitu, di dalam rumah, murid-murid Sidin batakun lagi ka Sidin tantang hal nitu. ¹¹ Maka, Sidin baucap ka buhannya, "Siapa haja nang mancaraikan bininya wan kawin pulang, inya bazina. ¹² Jika binian mancaraikan lakinya, wan kawin pulang, inya bazina." Yesus Mambarkati Kakanakan ¹³ Buhannya mambawa kakanakan halus ka Yesus supaya Sidin manjapai kakanakan nitu, tapi murid-murid manangati buhannya. ¹⁴ Namun, pas Yesus malihatnya, Sidin sarik wan baucap ka murid-murid Sidin, "Biarakan kakanakan halus nitu datang ka Aku wan jangan manangati buhannya karna Karajaan Allah adalah ampun urang nang kaya buhannya. ¹⁵ Aku bapadah ka ikam nang sabujurnya, siapa haja nang kada manyambut Karajaan Allah nang kaya saikung kanakan ni, kada pacang masuk ka dalamnya." ¹⁶ Imbah nitu, Yesus maragap kakanakan nitu, Sidin mambarkati buhannya wan maandak tangan Sidin ka atas buhannya. Urang Sugi nang manolak Maumpati Yesus ¹⁷ Lalu, pas Yesus haratan manyiapakan parjalanan Sidin, saikung urang bukah ka Sidin wan balutut di hadapan Sidin wan batakun, "Guru nang baik, apa nang harus ulun lakuakan gasan mandapat warisan hidup nang kakal?" ¹⁸ Yesus baucap ka inya "Mangapa ikam manyambat Aku baik? Kadada saurang pun nang baik, kacuali Allah saurang. ¹⁹ Ikam tahu parintah-parintah: 'Kada boleh mambunuh, kada boleh bazinah, kada boleh mancuntan, kada boleh basaksi palsu, kada boleh manipu, hormatilah abah wan uma ikam.'" ²⁰ Lalu, urang nitu baucap ka Sidin, "Guru, Ulun sudah mamatuhi sabaratan nitu tumatan ulun anum." ²¹ Namun, Yesus manoleh ka pamuda nitu wan manaruh kasih ka inya, wan baucap ka inya, "Satu hal nang kurang dari ikam. Tulak wan juallah sabarataan ampun ikam, wan julung ka urang miskin, maka ikam cagar baisi harta di surga. Lalu, kasini wan umpati Aku." ²² Namun, panderan nitu maolah inya susah hati wan inya tulak lawan sedih karna inya baisi banyak harta. ²³ Imbah nitu, Yesus mamandang ka sakaliling wan baucap ka murid-murid Sidin, "Sulit banar buhan nang sugih masuk Karajaan Allah!" ²⁴ Murid-murid takajut lawan panderan Sidin, Namun, Yesus baucap pulang ka buhannya, "Hai anak-anak, sulit banar masuk Karajaan Allah! ²⁵ labih gampang saikong unta masuk malalui lubang jarum daripada urang sugih masuk Karajaan Allah." ²⁶ Murid-murid takajut wan bapander saikung wan saikung, "Lalu, siapa nang kawa disalamatakan?" ²⁷ Yesus mamandang ka buhannya wan baucap, "Gasan manusia hal nitu kada mungkin, tapi sagala sasuatu mungkin gasan Allah." Upah Maumpati Yesus ²⁸ Petrus mulai baucap ka Yesus, "Lihat, kami sudah maningalakan sagala sasuatu wan maumpati Pian!" ²⁹ Yesus baucap, "Aku manyampaikan nang sabujurnya ka ikam, kadada saurang pun nang sudah maningalakan rumah, atawa dingsanak-dingsanak lakian, atawa dingsanak-dingsanak binian, atawa uma, atawa abah, atawa kakanakan, atawa pahumaannya karana Aku wan karana Injil, ³⁰ nang wayahini kada kawa manarima saratus kali lipat -- rumah-rumah dingsansak-dingsanak lalakian, wan dingsanak-dingsanak babinian, wan uma-uma, wan kakanakan, huma-huma wan panganiayaan; wan wayah nang cagar datang, hidup nang kakal. ³¹ Maka banyak urang nang partama pacangan jadi nang tarakhir, wan nang tarakhir jadi nang partama." Yesus Bapander Pulang Tantang Kamatian Sidin ³² Buhannya rahatan dalam parjalanan naik ka Yerusalem wan Yesus bajalan di muka buhannya. Wan, buhannya marasa takjub, samantara urang-urang nang maumpati Sidin marasa takut. Yesus babulik mambawa kadua balas murid Sidin, Sidin mulai mambaritahukan buhannya apa nang cagar tajadi ka Sidin, ³³ ujar sidin, "Cangangi, kita rahatan naik ka Yerusalem wan Anak Manusia cagar di sarahkan ka imam-imam kapala wan ahli-ahli Taurat. Buhannya cagar mahukum Sidin sampai mati wan cagar manyarahakan Sidin ka urang-urang bukan Yahudi. ³⁴ Buhannya cagar mahina Sidin, wan maludahi Sidin, wan manghajar Sidin, wan mambunuh Sidin. Tatapi imbah tiga hari, Sidin cagar bangkit." Parmohonan Yakobus wan Yohanes ³⁵ Imbah nitu, Yakobus wan Yohanes, anak-anaknya Zebedeus, datang ka Yesus wan baucap, "Guru, kami handak Pian malakukan gasan kami apa haja nang kami pinta." ³⁶ Yesus baucap ka buhannya, "Apa nang ikam handak Aku gawi gasan ikam?" ³⁷ Buhannya baucap ka Sidin, "Izinakan saurang dari kami duduk di higa kanan Pian, wan nang saikung nya di higa kiri Pian, dalam kamuliaan Pian." ³⁸ Akan tatapi, Yesus baucap ka buhannya, "Ikam kada tahu apa nang ikam minta. Sanggupkah ikam minun dari cawan nang harus Ku minum atawa dibaptis awan baptisan nang dibaptisakan ka Aku?" ³⁹ Buhannya baucap ka Sidin, "Kami sanggup!" Lalu, Yesus baucap ka buhannya, "Cawan nang Aku minum ikam minum jua, wan ikam dibaptis awan baptisan nang dibaptisakan ka Aku. ⁴⁰ Akan tatapi, gasan duduk di higa kanan Ku atawa di higa kiri Ku, kada hak Ku mambarinya, tapi wadah nitu gasan buhan nang sudah ditantuakan." ⁴¹ Mandangar nitu, sapuluh murid nang lain manjadi sarik ka Yakobus wan Yohanes. ⁴² Lalu, Yesus mangiau buhannya wan baucap, "Ikam tahu bahwa buhannya nang dianggap sabagai pamarintah urang-urang bukan Yahudi malakukan saolah-olah bakuasa atas buhannya. Wan patinggi-patinggi buhannya manggunakan kakuasaannya atas buhannya. ⁴³ Namun, kada saharusnya diantara ikam. Sabaliknya, siapa haja nang handak jadi paling utama diantara buhan ikam harus manjadi palayan, ⁴⁴ wan siapa haja nag handak jadi partama di antara buhan ikam, harus manjadi palayan. ⁴⁵ Sabab, Anak Manusia pun datang kada gasan dilayani, tapi gasan malayani, wan gasan mangorbanakan nyawa Sidin sabagai tabusan urang banyak." Yesus Manyambuhakan Bartimeus nang Buta ⁴⁶ Imbah nitu, buhannya sampai di Yerikho. Waktu Yesus maninggalakan Yerikho basama lawan murid-murid Sidin wan urang banyak, saurang pangamis buta ngarannya Bartimeus, anak Timeus, parahatan duduk di pinggir jalan. ⁴⁷ Waktu inya mandangar ada Yesus dari Nazaret, inya pun mulai bakuciak wan baucap, "Yesus, Anak Daud, marasi ulun!" ⁴⁸ Banyak urang managur inya wan manyuruh inya bahinip. Namun,inya sama samakin bakuciak, "Aanak Daud, marasi ulun!" ⁴⁹ Lalu, Yesus bagana wan baucap,"Kiau inya." buhannya pun mangiau urang buta nitu wan baucap ka inya, "Kuatakan hati ikam! Badirilah, Sidin mangiau ikam." ⁵⁰ Sambil malapasakan jubahnya, urang buta nitu badiri mandatangi Yesus. ⁵¹ Yesus baucap ka inya, "Apa nang ikam handak Aku gawi gasan ikam?" Urang buta nitu manjawab, "Rabi, biarakan ulun malihat." ⁵² Lalu, Yesus baucap ka inya, "Tulaklah. Iman ikam sudah manyambuhakan ikam." Saat itu jua, inya kawa malihat, wan inya maumpati Yesus sapanjang jalan.