¹ Waktu buhannya hampir sampai di Yerusalem, parak Betfage dan Betania, di Bukit Zaitun, Yesus manyuruh dua murid Sidin, ² Wan baucap ka buhannya, "Tulaklah ka kampung di muka ikam, wan imbah ikam masuk ka kampung, ikam pacang mandapati saikung keledai anum nang tajarat, nang kada suah ditunggangi urang. Lapasakan keledai nitu wan bawai kasini. ³ Jika ada urang nang batakun ka ikam, 'Kanapa ikam maolah nang kaya itu?' padahi, 'Tuhan mamarluakan keledai nitu wan imbah Sidin pakai kaina dibulikakan.'" ⁴ Lalu, buhannya tulak wan manamukan saikung keledai anum nang tajarat di lawang, di bagian luar, di jalan, lalu buhannya mamaculnya. ⁵ Babarapa urang nang ada disitu batakun ka buhannya, "Apa nang ikam gawi wan mamaculakan keledai nitu?" ⁶ Buhannya manjawab nangkaya dipadahi Yesus ka buhannya, wan urang-urang nitu mambiarakan buhannya tulak. ⁷ Lalu, buhannya mambawa keledai nitu ka Yesus, maandak jubah buhannya di atas keledai nitu, wan Yesus duduk di atasnya. ⁸ Banyak urang maandaki jubah buhannya di jalan, nang lain maandak ranting-ranting nang buhannya tabang di pahumaan. ⁹ Urang banyak bajalan maumpati wan bakuciak, "Hosana ! di barkatilah Sidin nang datang dalam nama Tuhan. ¹⁰ Dibarkatilah kadatangan karajaan Daud, padatuan kita! Hosana, di tampat nang mulia!" ¹¹ Imbah nitu, Yesus masuk ka Yerusalem wan tulak ka Bait Allah. Imbah malihat apa haja nang ada di situ, Sidin tulak ka Betania lawan dua balas murid Sidin sabab hari sudah larut. Yesus Mangutuk Pohon Ara ¹² Baisukannya, waktu buhannya maninggalakan Betania, Yesus marasa lapar. ¹³ Imbah malihat dari kajauhan sabuah pohon ara nang badaun, Sidin tulak gasan malihat siapa tahu ada sasuatu nang kawa Sidin tamukan dari pohon nitu. Waktu Sidin sampai di pohon nitu, Sidin kada manamukan apa-apa kacuali daun-daunnya sabab waktu nitu kada musim buah ara. ¹⁴ Karana nitu, Yesus baucap ka pohon nitu, "Kadada lagi urang nang suah makan buah dari pohon ini salawasan." Murid-murid Sidin mandangar. Yesus Tulak ka Bait Allah ¹⁵ Imbah nitu, Buhannya sampai di Yerusalem. Yesus masuk ka Bait Allah wan mulai mangusir urang-urang nang haratan bajualan batukaran di Bait Allah. Sidin mambalik meja-meja panukar duit wan kursi-kursi urang nang bajualan burung Merpati, ¹⁶ wan Sidin kada lagi mangizinakan urang mambawa barang-barang malawati Bait Allah. ¹⁷ Imbah nitu, Yesus mangajar buhannya wan baucap, "Bukankah tatulis, 'Rumah-Ku disambat rumah doa gasan sabarataan bangsa'? Tatapi, ikam sudah sudah maubahnya jadi sarang parampok." ¹⁸ Imam-imam kapala wan ahli-ahli taurat mandangarnya wan buhannya mancari cara kayaapa mambunuh Sidin. Sabab, buhannya takutan lawan Sidin karana urang banyak nitu kagum lawan pangajaran Sidin. ¹⁹ Waktu hari mulai malam, Yesus wan murid-murid Maninggalakan kota nitu. Baisi Iman di Dalam Allah ²⁰ Lalu, baisukan pas buhannya liwat, buhannya malihat pohon ara nang sudah karing sampai ka akarnya. ²¹ Petrus taingat wan baucap ke Yesus, "Rabi, lihat! Pohon ara nang Pian kutuk sudah karing!" ²² Wan, Yesus manjawab buhannya, "Baisilah iman di dalam Allah. ²³ Aku baucap nang sabujurnya ka ikam, siapa haja nang baucap ka gunung ini, 'Taangkatlah wan takipai ka dalam laut,' wan kadada karaguan di dalam hatinya, tapi parcaya bahwa apa nang ia sambat pacangan jadi, maka hal nitu pacangan jadi ka inya. ²⁴ Sabab nitu, Aku baucap ka ikam, apa haja nang ikam doakan wan minta, parcayalah bahwa ikam sudah manarimanya, maka hal nitu pacangan dibariakan ka ikam. ²⁵ Apabila ikam badiri wan badoa, ampunilah jika ikam manyimpan sasuatu tahadap saikung urang, supaya Aba ikam nang ada di surga jua pacangan mangampuni kasalahan-kasalahan ikam. ²⁶ Namun, jika ikam kada mangampuni, Aba ikam nang ada di surga jua kada mangampuni kasalahan-kasalahan ikam." Pamimpin Yahudi Batakun Manganai Kuasa Yesus ²⁷ Imbah nitu, buhannya datang pulang ka Yerusalem. Samantara Yesus bajalan di Bait Allah, imam-imam kapala, ahli-ahli Taurat, wan tua-tua Yahudi datang ka Sidin. ²⁸ Buhannya ba ucap ka Sidin, "Lawan kuasa apa Pian malakukan hal-hal nitu, atawa siapa nang mambari Pian kuasa gasan malakukannya?" ²⁹ Yesus baucap ka buhannya, "Aku batakun satu partanyaan ka ikam. Jawablah Aku, hanyar Aku mambaritahu ikam lawan kuasa apa Aku malakukan hal-hal nitu. ³⁰ Apakah baptisan Yohanes tumatan surga atawa tumatan manusia? Jawablah Aku!" ³¹ Buhannya badiskusi saikung lawan saikung lalu baucap, "Jika kita manjawab, 'Matan surga,' Sidin pacangan baucap, 'Lalu, kanapa ikam kada parcaya ka inya?' ³² Tatapi, jika kita manjawab, 'Matan manusia'?" Buhan pamimpin nitu takut lawan urang banyak karana buhannya manganggap bahwa Yohanes bujur-bujur saurang nabi. ³³ Karana nitu, buhannya manjawab Yesus, "kami kada tahu." Imbah nitu, Yesus baucap ka buhannya, "Aku jua kada pacangan mambaritahu ikam lawan kuasa apa Aku malakukan hal-hal ini.