¹ Lalu, Yesus mulai bapander lawan buhannya dalam parumpamaan-parumpamaan. "Ada urang nang bausaha kabun anggur. Sakalilingnya dipagarinya, wan digalinya sabuah lubang gasan mamaras anggur, wan mambangun sabuah manara pangawas. Imbah nitu, inya manyawakannya ka panggarap kabun lalu tulak ka luar negeri. ² Waya musim panen, inya mangirim saurang palayan ka para panggarap kabun nitu gasan manarima dari buhannya hasil kabun anggurnya. ³ Tatapi, buhannya manangkap palayan nitu, dipukulinya, lalu diusir nya tanpa mambawa apa-apa. ⁴ Karana nitu, inya mangirim pulang palayan lainnya ka buhannya, buhannya mamukuli kapalanya, wan mamparlakukannya awan cara nang manyupani. ⁵ Lalu, inya mangirim palayan lainnya wan buhannya mambunuhnya. Hal ini tajadi ka buhannya nang lain, sabagian dipukuli, sabagian dibunuh. ⁶ Ampun kabun nitu masih baisi saikung lagi, yaitu anak nang dikasihinya. Akhirnya, inya mangirim anaknya nitu ka buhannya wan baucap, 'Buhannya pacangan manghormati anakku.' ⁷ Akan tatapi, buhan panggarap kabun nitu baucap saikung lawan nang lainnya, 'Inya ini ahli warisnya. Ayo, kita bunuh inya supaya warisannya jadi ampun kita.' ⁸ Lalu, buhannya managkapnya, wan mambunuhnya, lalu manimbainya ka luar kabun anggur. ⁹ Apa nang pacangan dilakukan ampun kabun anggur nitu? Inya pacangan datang wan mambinasakan buhan panggarap nitu wan manjulung kabun anggurnya ka nang lainnya. ¹⁰ Suahlah ikam mambaca ayat Kitab Suci ini: 'Batu nang dibuang oleh tukang bangunan, sudah jadi batu panjuru. ¹¹ Inilah parbuatan Tuhan, wan parbuatan ini ajaib di mata kita'?" ¹² Imbah nitu, buhannya bausaha manangkap Sidin, tatapi buhannya takutan ka urang banyak karana buhannya tahu bahwa Yesus manyampaikan parumpamaan nitu gasan buhannya. Lalu, buhannya tulak maninggalakan Yesus. Manganai Mambayar Pajak ¹³ Imbah nitu, buhannya manyuruh datang ka Yesus babarapa urang Farisi wan urang-urang Herodian gasan manjabak Sidin awan pandiran Sidin saurang. ¹⁴ Buhannya datang wan baucap ka Yesus, "Guru, kami tahu bahwa Pian bujur wan kada paduli lawan pandapat urang lain. Sabab, Pian kada malihat panampilan urang tatapi maajarakan jalan Allah nang sasuai lawan kabanaran. Apakah bujur mambayar pajak ka kaisar atawa kada?" ¹⁵ Haruskah kami mambayar atawa haruskah kami kada mambayar? Akan tatapi Yesus, imbah mangatahui kamunafikan buhannya, Sidin baucap ka buhannya, "Kanapa ikam mancobai aku? Bawa ka Aku 1 dinar biar Aku malihatnya." ¹⁶ Lalu, buhannya mambawanya, wan Yesus baucap ka buhannya, "Gambar wan tulisan siapakah ini?" Buhannya manjawab Sidin, "Gambar wan tulisan kaisar." ¹⁷ Imbah nitu, Yesus baucap ka buhannya, "Julung ka kaisar hal-hal nang manjadi ampun kaisan wan ka Allah hal-hal nang manjadi ampun Allah." Lalu, buhannya heran ka Yesus. Parnyataan Urang Saduki gasan Manjabak Yesus ¹⁸ Lalu, urang-urang Saduki, nang bapadah bahwa kadada kabangkitan, datang ka Yesus wan batakun ka Sidin, ujar buhannya, ¹⁹ "Guru, Musa manulis ka kita bahwa bila saikung urang, nang baisih dingsanak lalakian, mati wan maninggalakan saurang bini, tapi kada baisi anak, dingsanaknya nang lalakian nitu harus mangawini janda nitu wan mambangkitkan katurunan gasan dingsanaknya. ²⁰ Ada tujuh urang badingsanak. Dingsanak nang partama maambil saurang bini, wan katika inya mati, inya kada maninggalakan katurunan. ²¹ Lalu, dingsanak nang kadua mangawini binian nitu, wan mati kada mambari katurunan. Kaya itu jua lawan dingsanak nang katiga. ²² Kadada dari tujuh badingsanak nitu nang maninggalakan anak. Akhirnya, binian nitu jua mati. ²³ Pada hari kabangkitan, wayah buhannya bangkit, jadi bini siapakah binian nitu? Sabab, tujuh badingsanak nitu sudah manjadikannya bini" ²⁴ Yesus manjawab buhannya, "Bukankah ini alasan ikam jadi sasat, karana ikam kada mangarti Kitab Suci atawa Kuasa Allah? ²⁵ Sabab, saat buhannya bangkit dari antara urang mati, buhannya kadada nang kawin atawa dikawini, tapi buhannya jadi nangkaya buhan malaikat di surga. ²⁶ Manganai urang-urang mati nang dibangkitakan, kadakah ikam mambaca dalam kitab Musa, pada bagian manganai padang sabat, nangkaya apa Allah bapander ka inya, 'Aku adalah Allah Abraham, wan Allah Ishak, wan Allah Yakub'? ²⁷ Sidin bukan Allah urang mati, tapi Allah urang nang hidup. Ikam bujur-bujur sasat!" Parintah Nang Paling Panting ²⁸ Imbah nitu, salah satu dari para ahli Taurat datang wan mandangar buhannya badabat. Wayah inya malihat bahwa Yesus sudah manjawab buhannya awan pambujurnya, Inya batakun ka Yesus, "Parintah manakah nang paling panting dari sabarataannya?" ²⁹ Yesus manjawab, "Hukum nang paling utama adalah: 'Dangar, hai urang-urang Israel ! Tuhan Allah kita adalah satu-satunya Tuhan. ³⁰ Wan, kasihilah Tuhan Allahmu lawan saganap hati ikam, lawan saganap jiwa ikam, lawan saganap pikiran ikam, lawan saganap kakuatan ikam.' ³¹ Wan, nang kadua adalah: 'Kasihilah sasama ikam nangkaya diri ikam saurang.' Kadada hukum nang labih tinggi daripada ini." ³² Lalu, Ahli Taurat nitu baucap ka Yesus, "Pian bujur, Guru. Pian bujur bapadah bahwa Sidin nitu satu, wan kadada nang lain salain Sidin. ³³ Wan, mangasihi Sidin lawan saganap hati, lawan saganap pangartian, lawan saganap kakuatan, sarta mangasihi sasama nangkaya diri saurang. Memang labih panting daripada sabarataan kurban bakaran wan parsambahan." ³⁴ Imbah nitu, wayah Yesus malihat bahwa urang nitu manjawab awan bijaksana, Sidin baucap ka inya, "Ikam kada jauh dari karajaan Allah." Imbah nitu, kadada lagi urang nang wani batakun ka Yesus. Kristus Adalah Tuhan ³⁵ Sambil mangajar di Bait Allah, Yesus baucap, "nangkaya apa ahli-ahli taurat kawa baucap bahwa Kristus adalah anak Daud? ³⁶ Daud saurang baucap di dalam Roh Kudus, 'Tuhan baucap ka Tuanku: Duduklah di higa kanan-Ku, sampai Aku manampatkan musuh-musuh ikam di bawah talapak kaki ikam.' ³⁷ Daud saurang manyambat Kristus sebagai 'Tuhan'. Jadi, mana mungkin Kristus adalah anaknya?" Urang banyak himung mandangar Sidin. Sikap Tarhadap Ahli-Ahli Taurat ³⁸ Dalam pangajaran Sidin, Yesus baucap, "Hati-hatilah tahadap ahli-ahli Taurat, nang katuju jalan-jalan mamakai jubah panjang wan katuju manarima salam panghormatan di tampat-tampat umum, ³⁹ wan baisi tampat duduk tarhormat di sinagoge-sinagoge wan tampat-tampat kahormatan dalam parjamuan-parjamuan. ⁴⁰ Buhannya nang marampas rumah-rumah buhan janda wan sabagai dalih badoa nang panjang-panjang. Buhannya cagar manarima hukuman nang labih barat." Parsambahan Sajati ⁴¹ Imbah nitu, Yesus duduk bahadapan lawan kotak parsambahan wan maitihi urang-urang nang mamasukakan duit ka dalam kotak parsambahan nitu. Banyak urang sugih nang mamasukakan dalam jumlah ganal. ⁴² Imbah nitu, saikung urang janda miskin datang wan mamasukakan dua kaping duit logam, nang sanilai 1 sen. ⁴³ Lalu, Yesus mangiau murid-murid Sidin wan baucap ka buhannya, "Aku bapadah nang sabujurnya ka ikam, janda miskin ini sudah mamasukakan labih banyak ka dalam kotak parsambahan nitu daripada sabarataan urang lainnya. ⁴⁴ Sabab, buhan barataan mambari dari kalimpahannya, tatapi janda miskin nitu, mambari dari kamiskinannya, mambari sabarataan ampun inya, yaitu barataan nafkahnya."