¹ Lalu, wayah Yesus maninggalakan Bait Allah, saikung murid Sidin batakun ka Sidin, "Guru, lihat bungas nya batu-batu wan bungasnya bangunan ini!" ² Yesus manjawab, "Apakah ikam malihat bangunan-bangunan nang magah ini? kadada satu batupun nang tinggal di atas batu lainnya nang kada dirabahakan." Pamulaan Pandaritaan ³ Rahatan Yesus duduk di atas bukit Zaitun nang mahadap Bait Allah, Petrus, wan Yakobus, wan Yohanes, wan Andreas batakun ka Yesus, ⁴ "Padahi kami, pabila hal-hal nitu cagar tajadi, wan apa tandanya bila sabarataan nitu barakhir?" ⁵ Lalu, Yesus mulai baucap ka buhannya, "Bahati-hatilah supaya kadada urang nang manyasatakan ikam. ⁶ Banyak urang cagar datang dalam ngaran Ku, baucap, 'Akulah Sidin.' Wan, buhannya cagar manyasatakan banyak urang. ⁷ Wayah ikam mandangar manganai paparangan wan habar-habar manganai parang, jangan takutan. Hal-hal ini harus tajadi, tapi akhir dari sabarataannya balum tajadi. ⁸ Sabab, bangsa cagar bangkit malawan bangsa, wan karajaan malawan karajaan. Pacangan tajadi gampa bumi mana haja; ada kalaparan. Inilah pamulaan dari rasa sakit baranak. ⁹ Namun, jagalah diri ikam. Sabab, buhannya cagar manjulung ikam ka pangadilan, wan ikam pacangan dipukuli di sinagoge-sinagoge wan ikam pacang badiri di hadapan Sanhedrin wan raja-raja karana Aku, sabagai kasaksian gasan buhannya. ¹⁰ Injil harus badahulu dihabarakan ka sabarataan bangsa. ¹¹ Wayah buhannya mambawa ikam wan manjulung ikam, jangan gair lawan apa nang harus ikam sambatakan, tatapi sambatlah apa haja nang dikaruniakan ka ikam saat itu karana lain ikam nang bapandir, tapi Roh Kudus. ¹² Wan, saurang dingsanak pacang manjulung dingsanaknya pada kamatian, wan abah ka anaknya. Anak-anak cagar bangkit malawan kuitannya wan mambunuh buhannya. ¹³ Ikam pacang dibanci oleh sabarataan urang karana ngaran-Ku. Tatapi, urang-urang nang batahan sampai akhir cagar disalamatakan." Hal Jahat nang Manyababkan Kahancuran ¹⁴ Namun, wayah ikam malihat pambinasa keji badiri di tampat nang kada saharusnya (para pambaca pacang mangarti), buhannya nang ada di Yudea harus lari ka pangunungan. ¹⁵ Urang nang barada di atas rumah jangan turun atawa masuk ka dalam rumah gasan mangaluarakan apa pun dari dalam rumahnya. ¹⁶ Wan, urang nang barada di ladang, jangan babulik gasan maambil jubahnya. ¹⁷ Calakahlah buhannya nang batianan wan buhan nang manyusui bayi-bayinya pada hari itu. ¹⁸ Badoalah supaya hal-hal ini kada tajadi pada musim dingin. ¹⁹ Sabab, pada hari-hari nitu cagar tajadi waktu pandaritaan besar nang kada suah tajadi matan pamulaan panciptaan, nang Tuhan ciptakan sampai wayah ini, wan kada suah tajadi lagi. ²⁰ Jika Tuhan kada mamparsingkat hari-hari nitu, kadada saurang pun nang disalamatakan. Tatapi, demi nang dipilih, nang sudah Sidin pilih, Sidin mamparsingkat hari-hari nitu. ²¹ Imbah nitu, jika ada urang nang baucap ka ikam, 'Lihat, Kristus ada di sini!. Atawa, 'Lihat, Sidin ada di sana!' Jangan mamparcayainya. ²² Sabab, mesias-mesias palsu wan nabi-nabi palsu cagar bangkit wan manampaiakan tanda-tanda wan kaajaiban-kaajaiban gasan manyasatakan, jika mungkin, bahkan urang-urang pilihan. ²³ Waspadalah! Aku sudah bapadah sabarataanya ka ikam sabalumnya. ²⁴ Namun, pada hari-hari nitu, imbah tajadi masa pandaritaan barat, 'Matahari pacang jadi kadap, wan bulan kada lagi basinar. ²⁵ Bintang-bintang pacangan jatuh matan langit, wan kuasa-kuasa di langit pacang diguncangakan.'" Kadatangan Anak Manusia ²⁶ "Imbah nitu, buhannya cagar malihat Anak Manusia datang dalam awan-awan lawan kuasa wan kamuliaan nang besar. ²⁷ Lalu, Sidin cagar mautus malaikat-malaikat wan mangumpulakan nang dipilih dari kaampat arah mata angin, dari ujung-ujung bumi sampai ka ujung-ujung langit. ²⁸ “Balajarlah dari parumpamaan pohon ara: wayah dahan-dahannya sudah malatik wan daun-daunnya kaluar, maka ikam tahu bahwa musim panas sudah parak. ²⁹ Kaya itu jua ikam, apabila ikam malihat hal-hal ini tajadi, katahuilah bahwa Sidin sudak parak, di muara lawang. ³⁰ Aku bapadah nang sabujurnya ka ikam, ganarasi ini kada pacang balalu sampai sabarataan ini tajadi. ³¹ Langit wan bumi pacang balalu, tatapi firman-Ku kada pacang balalu.” Waspada wan Bajaga-Jagalah ³² “Akan tatapi, manganai hari atawa jam nitu, kadada saurang pun nang tahu, kada jua malaikat-malaikat di surga, bahkan Anak jua, hanya Aba. ³³ Waspadalah, bajaga-jagalah. Sabab, ikam kada tahu pabila waktunya datang. ³⁴ Hal ini kaya urang nang rahatan di parjalanan. Wayah inya tulak wan mambari kuasa ka palayan-palayannya, lawan gawiannya masing-masing, wan mamarintahakan panjaga lawang supaya tatap bajaga-jaga. ³⁵ Karna nitu, bajaga-jagalah karna ikam kada tahu pabila tuan rumah nitu datang, sore hari, atawa tangah malam, atawa ayam bakokok, atawa sungsung banar, ³⁶ jangan sampai inya tiba-tiba datang wan mandapati ikam parahatan guring. ³⁷ Apa nang Aku panderakan ka ikam ini, Aku padahi ka sabarataan urang: ‘Bajaga-jagalah!’”