¹ Hari Raya Paskah, wan Hari Raya Roti Kada Baragi balangsung dua hari lagi, iman-iman kapala wan ahli-ahli Taurat mancari cara gasan manangkap Yesus lawan tipu daya muslihat wan mambunuh Sidin. ² Sabab, buhannya baucap, “Jangan dilakuakan pas hari raya supaya kada tajadi kaributan di antara rakyat.” Yesus Diurapi Awan Minyak Narwastu Yesus diurapi lawan Minyak Narwastu ³ Rahatan Yesus di Betania, di rumah Simon si kusta, wayah parahatan duduk di meja makan, datanglah saikung binian lawan sabuah guci halus dari batu pualam baisi minyak wangi dari Narwastu nang murni wan mahal. Inya mamacahkan guci nitu wan manuangakannya ka atas kapala Yesus. ⁴ Tatapi, ada babarapa urang nang baucap satu lawan nang lain, “Mangapa mamborosakan minyak wangi nang kaya ini? ⁵ Sabab, minyak ini kawa dijual 300 dinar labih wan kawa dijulung ka urang miskin.” Buhannya pun manyariki binian nitu. ⁶ Namun, Yesus baucap, “Biarakan inya. Kanapa ikam manyusahkan inya? Inya sudah malakukan parbuatan nang baik gasan Ku. ⁷ Sabab, urang miskin nitu salalu ada diantara ikam, wan kapan pun ikam handak, ikam kawa babuat baik ka buhannya. Tatapi, ikam kada salalu basama Aku. ⁸ Binian ini sudah malakukan apa nang inya kawa. Inya mangurapi awak Ku badahulu gasan panguburan. ⁹ Aku mamadahi ikam nang sabujurnya, di mana Injil dihabarakan di saluruh dunia, apa nang sudah diulah binian nitu jua akan dipadahakan sabagai paringatan inya.” Rancana Yudas Bakhianat ¹⁰ Imbah nitu, Yudas Iskariot, salah satu dari kadua balas murid, tulak ka imam-imam kapala gasan manyarahakan Yesus ka buhannya. ¹¹ Wayah buhannya mandangar inya, buhannya himung wan bajanji mambari Yudas duit. Karna nitu, Yudas mancari kasampatan nang baik gasan manyarahakan Sidin. Hidangan Paskah ¹² Pada hari partama Hari Raya Roti kada baragi, wayah buhannya mangurbanakan anak domba Paskah, murid-murid Yesus batakun ka Sidin, “ka manakah Pian kahandaki kami tulak manyiapakan gasan Pian makan Paskah?” ¹³ Lalu, Sidin manyuruh dua urang murid Sidin wan baucap ka buhannya, “tulaklah ka kota, wan saurang lakian nang mambawa kendi baisi banyu pacang manamui ikam. Umpati inya, ¹⁴ wan kamana haja inya masuk, padahakan ka ampun rumah, ‘Guru baucap: Dimanakah ruangan tampat Aku kawa makan Paskah lawan murid-murid-Ku?’ ¹⁵ Lalu, inya pacang manunjukakan ka ikam sabuah ruangan ganal di lantai atas nang sudah baperabot wan siap sedia. Siapakanlah Parjamuan gasan kita di sana.” ¹⁶ Imbah nitu, murid-murid tulak wan sampai di kota. Di sana, buhannya mandapati nangkaya Yesus pandirakan ka buhannya, lalu buhannya manyiapakan Paskah. ¹⁷ Wayah malam hari, datanglah Yesus baimbai kadua balas murid. ¹⁸ Pada waktu buhannya rahatan duduk wan makan, Yesus baucap, “Aku bapadah nang sabujurnya ka ikam, salah saikung diantara ikam, nang parahatan makan baimbai lawan Aku, cagar manghianati-Ku.” ¹⁹ Buhannya mulai sedih, wan baucap ka Sidin saikung wan saikung, “Pasti lain ulun, kan? ²⁰ Yesus baucap ka buhannya, “Inya adalah saikung dari dua balas murid, urang nang mancalupakan roti lawan Aku ka dalam mangkuk. ²¹ Sabab, Anak manusia cagar tulak, nangkaya tatulis manganai Sidin, tatapi calakalah urang nang manyababakan Anak Manusia dikhianati! Labih baik urang nitu kada dilahirkan sama sakali.” Paringatan akan Awak wan Darah Kristus ²² Wayah buhannya parahatan makan, Yesus maambil roti, wan imbah mambarkati, Sidin mamacah-macahnya wan manjulung ka buhannya, lalu baucap, “Ambillah, ini awak-Ku.” ²³ Sidin maambil cawan, wan maucap syukur. Sidin manjulung ka buhannya, wan buhan sabarataan minum dari cawan nitu. ²⁴ Lalu, Yesus baucap ka buhannya , “Inilah darah-Ku, darah perjanjian, nang dicurahakan gasan banyak urang. ²⁵ Aku bapadah ka ikam nang sabujurnya, Aku kada lagi minum hasil buah dari pohon anggur, sampai pada hari wayah Aku minum anggur nang hanyar di dalam Karajaan Allah.” ²⁶ Imbah banyanyi nyanyian Mazmur, buhannya tulak ka Bukit Zaitun. Murid-Murid Yesus Cagar maningalakan Sidin ²⁷ Imbah nitu, Yesus baucap ka buhannya, “Ikam sabarataan cagar maninggalakan Aku, sabab ada tatulis, ‘Aku cagar mamukul gambala nitu, wan domba-dombanya cagar tarahay.’ ²⁸ Tatapi, limbah Aku dibangkitakan, Aku cagar tulak mandahului ikam ka Galilea.” ²⁹ Namun, Petrus baucap ka Sidin, “Sakalipun buhan sabarataan maniggalakan Pian, tatapi ulun kada.” ³⁰ Yesus baucap ka inya, “Aku bapadah nang sabujurnya ka ikam, malam ini jua, sabalum ayam jantan bakokok dua kali, ikam cagar manyangkal Aku tiga kali.” ³¹ Tatapi, Petrus manyahuti, “Sakalipun ulun harus mati lawan Pian, ulun kada cagar manyangkal Pian!” Buhan barataan bapadah hal nang sama. Yesus Di Taman Getsemani ³² Imbah nitu, sampailah buhannya disuatu tampat ngarannya Getsemani, wan Sidin baucap ka murid-murid Sidin, “Duduklah di sini samanatara Aku badoa.” ³³ Sidin mambawa Petrus, wan Yakobus, wan Yohanes lawan Sidin, wan mulai sangat tatakan wan susah hatinya. ³⁴ Sidin baucap ka buhannya, “Jiwa-Ku sadih banar, nang kaya handak mati. Tataplah di sini wan tatap bajagaan.” ³⁵ Imbah manjauh sadikit, Sidin basujud di atas tanah wan badoa, jaka kawa saat nitu balalu dari pada-Nya. ³⁶ Wan, Sidin baucap, “Abba, Bapa, sagala sasuatu mungkin gasan Pian. Ambillah cawan ini dari-Ku. Namun, bukan apa nang Aku kahandaki, malainkan apa nang Pian kahandaki.” ³⁷ Saat Yesus babulik, Sidin mandapati murid-murid Sidin rahatan guring, wan baucap ka Petrus, “Simon, kanapa ikam guring? Kada kawa kah ikam bajaga salama 1 jam? ³⁸ Tataplah bajaga wan badoa supaya ikam kada jatuh kadalam pancubaan. Roh memang panurut, tatapi daging lamah.” ³⁹ Yesus tulak wan badoa mangucapakan doa nang sama. ⁴⁰ Wan, Sidin datang mandapati buhannya parahatan guring sabab mata buhannya ngantuk banar, wan buhannya kada tahu harus manyahuti apa ka Sidin. ⁴¹ Imbah nitu, Yesus datang katiga kalinya wan baucap ka buhannya, "Ikam masih guring wan ba istirahat? Cukup, waktunya tiba. Lihat, Anak Manusia disarahakan ka tangan urang-urang badosa. ⁴² Bangunlah, ayo kita tulak. Lihat, nang manjulung Aku sudah baparak.” Yesus Ditangkap ⁴³ Hancap imbah nitu, rahatan Yesus bapandir, Yudas salah saikung dari kadua balas murid, datang lawan urang banyak, lawan parang wan pantung, di utus oleh imam-imam kapala, ahli-ahli taurat, wan tua-tua bangsa Yahudi. ⁴⁴ Inya nang manjulung mambari buhannya suatu tanda, ujarnya, “urang nang pacangan ulun cium, Sidinlah urangnya. Tangkap Sidin wan bawa tulak di bawah pangawasan.” ⁴⁵ Wan, wayah Yudas sampai, inya hancap mamaraki Yesus wan baucap, “Rabi!” Lalu, inya mancium Yesus. ⁴⁶ Imbah nitu, buhannya mangacak Yesus wan manangkap Sidin. ⁴⁷ Namun, salah saikung dari buhannya nang badirian, mancabut parangnya wan manyarang palayan Iman Besar, lalu mamotong talinganya. ⁴⁸ Yesus baucap ka buhannya, “Apakah ikam datang lawan parang wan pantung gasan manangkap Aku saurang parampok? ⁴⁹ Satiap hari, Aku lawan ikam di Bait Allah sambil mangajar, tapi ikam kada manangkap Aku. Namun, hal ini tajadi supaya Kitab Suci kawa diganapi.” ⁵⁰ Imbah nitu, buhannya sabarataan maninggalakan Sidin wan malarikan diri. ⁵¹ Ada saurang pamuda nang maumpati Yesus, hanya mamakai kain lenan di awaknya. Buhannya manangkapnya, tatapi inya maninggalakan kain lenan nitu lalu bukah kada babaju. Yesus Dihakimi Pamimpin Yahudi ⁵³ Imbah nitu, buhannya mambawa Yesus ka Imam Besar. Sabarataan imam kapala, wan tua-tua, wan ahli-ahli Taurat bakumpul barataan. ⁵⁴ Wan, Petrus maumpati Yesus dari jauh, sampai ka halaman rumah Imam Besar. Di sana, inya duduk lawan buhan pangawal sambil manghangatakan diri di parapian. ⁵⁵ Buhan imam kapala wan sabarataan Mahkamah Agama tarus mancari kasaksian gasan malawan Yesus supaya buhannya kawa mambunuh Sidin, tatapi buhannya kada manamukan apa-apa. ⁵⁶ Sabab, banyak urang nang basaksi palsu gasan malawan Sidin, tatapi kasaksian buhannya kada sasuai satu wan lainnya. ⁵⁷ Imbah nitu, babarapa urang badiri wan mambari kasaksian palsu gasan malawan Yesus, ujarnya, ⁵⁸ “Kami mandangar Sidin baucap, ‘Aku pacangan marobohkan Bait Allah buatan tangan manusia, wan dalam tiga hari, Aku pacangan mambangun nang lainnya, nang kada dibuat lawan tangan.” ⁵⁹ Namun, gasan hal ini pun kasaksian buhannya kada sasuai satu sama lain. ⁶⁰ Lalu, Imam Besar badiri di tangah-tangah buhannya wan batakun ka Yesus, “Apakah Pian kada mambari jawaban ka urang-urang nang basaksi malawan Pian?” ⁶¹ Akan tatapi, Sidin bahinip wan kada manyahuti. Imam Besar batakun pulang ka Yesus wan baucap, “Apakah Pian Mesias, Anak Allah nang tapuji?” ⁶² Yesus baucap, “Akulah Sidin, wan ikam cagar malihat Anak Manusia duduk di higa kanan nang Mahakuasa wan datang baimbai lawan awan-awan di langit.” ⁶³ Lalu, sambil marabit jubahnya, Imam Besar baucap, “Kanapa kita masih parlu saksi lagi? ⁶⁴ Ikam sudah mandangar hujatan. Apa kaputusan ikam?” Wan, buhan sabarataan mahukum Sidin awan hukuman mati. ⁶⁵ Babarapa urang mulai maludahi Sidin, wan manutup muha Sidin, wan maninju Sidin, wan baucap ka Sidin, “Banubuatlah!” buhan pangawal manarima Sidin wan manampar Sidin. Petrus Kada mangakui Yesus ⁶⁶ Samantara Petrus di bawah halaman rumah Imam Besar, salah saurang palayan binian Iman Besar datang. ⁶⁷ Wan, malihat Petrus rahatan manghangatkan diri, palayan nitu manatap inya wan baucap, “Ikam jua basama Yesus, urang Nazaret itu,” ⁶⁸ Namun, Petrus manyangkal sambal baucap, “Ulun kada tahu wan kada mangarti apa nang ikam pandirakan.” Lalu, inya tulak ka lawang garbang, wan ayam jantang bakokok. ⁶⁹ Palayan binian nitu, malihat Petrus sakali lagi wan mulai baucap pulang ka urang-urang nang badirian, “Urang ini adalah salah satu dari buhannya.” ⁷⁰ Akan tatapi, Inya manyangkal pulang. kada lawas imbah nitu, Urang-urang nang badirian baucap pulang ka Petrus, “Ikam pasti salah satu dari buhannya karana ikam jua urang Galilea.” ⁷¹ Namun, Inya mulai mangutuk wan basumpah, “Ulun kada kanal urang nang ikam pandirakan!” ⁷² Lalu, ayam jantang bakokok kadua kalinya wan Petrus taingat apa nang Yesus pandirakan ka inya, “Sabalum ayam jantan bakokok dua kali, ikam pacangan manyangkal Aku tiga kali.” Lalu, Petrus kada kawa manahan tangis.