1
Pagi-pagi banar, imam-imam kapala maadakan sabuah parundingan lawan buhan tua-tua, wan ahli-ahli Taurat, lawan buhan Sanhedrin. Buhannya maikat Yesus, mambawa Sidin tulak, wan manjulung Sidin ka Pilatus.
2
Lalu, Pilatus batakun ka Sidin, "Apakah Pian Raja urang Yahudi?" Sidin manjawabnya, Ikam nang manyambatnya."
3
Imbah nitu, buhan imam kapala manuduh Yesus batubi-tubi.
4
Pilatus batakun pulang ka Sidin, "Apakah Pian kada manyahutinya? Lihat, barapa banyak tuduhan buhannya gasan malawan Pian."
5
Akan tatapi, Yesus kada lagi manyahuti sahingga Pilatus heran.
Yesus dan Barabas
6
Pada Hari Raya Paskah, Pilatus biasa mambabasakan gasan buhan saurang tahanan nang diminta buhannya.
7
Ada saurang ngarannya Barabas sudah di tahan baimbai buhan pambarontak nang malakukan pambunuhan.
8
Urang banyak datang wan mulai maminta ka Pilatus gasan malakukan kabiasaan nang kaya inya lakukan gasan buhannya.
9
Pilatus manjawab buhannya wan baucap, "Apakah ikam handak supaya aku mambabasakan gasan ikam Raja urang Yahudi ini?"
10
Sabab, inya tahu bahwa buhan imam kapala sudah manjulung Yesus karana iri hati.
Akan tatapi, imam-imam kapala mahabui urang banyak supaya maminta Pilatus mambabasakan Barabas.
12
Lalu, Pilatus baucap pulang ka buhannya, "Jadi, apa nang harus ulun lakukan lawan Urang nang ikam sambat Raja urang Yahudi ini?"
13
Buhannya bakuciak pulang, "Salibkan Sidin!"
14
Imbah nitu, Pilatus baucap ka buhannya, "Mangapa? Kajahatan apa nang sudah Sidin gawi?" Namun, buhannya bakuciak labih karas pulang, "Salibkan Sidin!"
15
Karana handak mamuasakan hati urang banyak, Pilatus malapasakan Barabas gasan buhannya, wan imbah nitu mancambuk Yesus, inya manjulung Sidin gasan disalibkan.
Yesus Dihuluti wan Disiksa
16
Buhan prajurit mambawa Yesus masuk ka istana, yaitu gedung pangadilan, dan buhannya mangiau sabarataan pasukan bakumpul.
17
Lalu, buhannya mamakaikan Sidin jubah ungu, wan imbah nitu manganyam sabuah mahkota baduri, buhannya mamakaikannya ka Yesus.
18
Imbah nitu, buhannya mulai manyampaikan salam ka Sidin, "Salam, Raja urang Yahudi!"
19
Bubuhannya mancatuk kapala Sidin lawan sabuah buluh wan maludahi Sidin, Lalu sujud manyambah Sidin.
20
Imbah bubuhannya mahuluti Yesus, bubuhannya mamaculi jubah ungu dari Yesus,wan mamakaikan pakaian Sidin saurang. Lalu, Bubuhannya mambawa Yesus kaluar gasan manyalibkan Sidin.
Panyaliban Yesus
21
Bubuhannya mamaksa urang nang parahatan liwat, Simon urang Kirene, nang datang dari desa, abah dari Aleksander wan Rufus, gasan mamikul salib Sidin.
22
Lalu, bubuhannya mambawa Yesus ka tampat ngarannya Golgota, nang artinya "Tampat Tengkorak".
23
Bubuhan mambari Sidin anggur bacampur mur, tatapi Sidin kada mangambilnya.
24
Imbah nitu, bubuhannya manyalibkan Sidin wan mambagi-bagikan pakaian Sidin diantara buhannya, sambil manimbai undian gasan manantukan bagian apa nang kawa diambil oleh masing-masing.
25
Saat nitu jam katiga katika buhannya manyalibkan Sidin.
26
Tulisan manganai tuduhan tahadap Yesus tatulis, "Raja Urang Yahudi."
27
Lalu, buhannya manyalibkan dua urang parampok baimbai Sidin, saurang di higa kanan Sidin wan saurang di higa kiri Sidin.
28
Jadi, taganaplah Kitab Suci nang bapadah, "Wan, Sidin tahitung di antara urang-urang durhaka.
29
Imbah nitu, urang-urang nang rahatan liwat mahujat Yesus sambil manggeleng kapala wan baucap, "Hai! Pian nang pacang maruntuhakan Bait Allah wan mambangunnya pulang dalam tiga hari,
30
salamatakanlah diri Pian saurang wan turunlah dari salib!"
31
Kayaitu jua imam-imam kapala, basama lawan buhan ahli Taurat mahuluti Yesus wan baucap satu sama lain, "Sidin manyalamatakan urang lain, tapi Sidin kada kawa manyalamatakan diri Sidin saurang!
32
Biarlah Mesias, Sang Raja Israel, wayah ini turun dari salib supaya kita kawa malihat wan parcaya." Bubuhan nang disalibkan baimbai lawan Yesus jua mahuluti Sidin.
Kamatian Yesus
33
Pada saat jam kaanam, tajadi kagalapan di sabarataan tanah nitu sampai pada jam kasambilan.
34
Pada jam ka-9, Yesus basaru lawan suara nang nyaring, nang artinya "Allah-Ku, Allah-Ku, mangapa Pian maninggalakan Aku?"
35
Imbah mandangarnya, babarapa urang nang badiri di parak Sidin baucap, "Lihat! Sidin mangiau Elia."
36
Lalu, Saikung urang balari, wan maisi sabuah spons lawan anggur asam, wan maandaknya disabuah buluh, wan manjulungnya ka Yesus gasan minum, sambil baucap, "Biarlah kita lihat apakah Elia pacang datang gasan manurunakan Sidin."
37
Imbah nitu, Yesus basaru lawan suara nyaring wan manghambuskan napas tarakhir Sidin.
38
Saat nitu, tirai Bait Allah rabit jadi dua, dari atas sampai ka bawah.
39
Katika kapala pasukan, nang badiri manghadap Yesus, malihat kayaapa Yesus manghambuskan napas tarakhir Sidin, inya baucap, "Bujur, urang ini adalah Anak Allah!"
40
Di sana jua ada babarapa binian nang malihat dari jauh, di antara buhannya adalah Maria Magdalena, wan Maria ibu Yakobus Muda wan Yoses, lawan Salome.
41
Wayah Yesus ada di wilayah Galilea, buhannya maumpati Sidin wan malayani Sidin. Di sana ada banyak binian lainnya nang datang baimbai Yesus ka Yerusalem.
Panguburan Yesus
42
Wayah hari sudah malam, karana hari nitu adalah hari parsiapan, yaitu hari sabalum hari sabat,
43
Yusuf urang Arimatea datang, saurang anggota Majelis Besar nang dihormati, nang dirinya jua mananti-nantikan kadatangan Karajaan Allah, mambaranikan diri wan tulak ka Pilatus wan maminta awak Yesus.
44
Pilatus takajut mandangar bahwa Yesus sudah maninggal. Inya mangiau kapala pasukan wan batakun ka inya, apakah bujur Yesus sudah maninggal.
45
Imbah Pilatus tahu dari kapala pasukan, inya manjulung mayat nitu ka Yusuf.
46
Yusuf manukar kain linen wan manurunakan mayat yesus, imbah mambungkus Sidin dalam kain lenan nitu, inya marabahakan Sidin di dalam kuburan nang digali di bukit batu. Inya mangulingakan sabuah batu ka lawang masuk kuburan.
47
Maria Magdalena wan Maria ibu Yoses malihat tampat mayat Yesus dirabahakan