¹ Wayah hari Sabat balalu, Maria Magdalena, Maria ibu Yakobus, lawan Salome, sudah manukar rempah-rempah supaya buhannya kawa tulak maminyaki Yesus. ² Pagi-pagi banar, pada hari partama minggu nitu, wayah matahari mancungul, buhannya datang ka kuburan. ³ bubuhannya baucap satu sama lain, "Siapa nang kawa manggulingakan bari dari lawang kuburan nitu?" ⁴ Namun, imbah mamandang ka atas, buhannya malihat batu nang ganal banar nitu sudah taguling. ⁵ Imbah masuk ka dalam kuburan, buhannya malihat saurang pamuda nang mamakai jubah putih rahatan duduk di higa kanan, buhannya takajut. ⁶ Lalu, inya baucap ka buhannya, "kada boleh takajut, ikam mancari Yesus urang Nazaret nang sudah disalibkan. Sidin sudah bangkit. Sidin kadada di sini. Lihat wadah buhannya marabahakan Sidin. ⁷ Akan tatapi, tulaklah, padahakan ka murid-murid Sidin wan ka Petrus bahwa Sidin parahatan mandahului ikam ka Galilea. Di sana, ikam pacang batamu Sidin, Nangkaya sudah Sidin padahakan ka ikam." ⁸ Imbah nitu, buhannya kaluar wan malarikan diri dari kuburan nitu karana buhannya manggitir wan takjub, wan buhannya kada baucap apa-apa ka siapa haja karana buhannya takutan. [sabarataan nang sudah diparintahakan agar buhannya baucap ka Petrus wan kakawannya, buhannya sampaikan sacara singkat. Imbah nitu, Yesus sauranglah nang mautus buhannya dari Timur sampai ka Barat, gasan mahabarakan habar nang kudus wan nang kada kawa binasa manganai kasalamatan kakal. Amin] Yesus manampakkan Diri ka Murid-Murid Sidin ⁹ Wayah Yesus bangkit pagi-pagi pada hari partama dalam minggu nitu, Sidin partama-tama mancungul ka Maria Magdalena yang darinya Yeus sudah mausir tujuh roh jahat. ¹⁰ Lalu, inya tulak wan mahabarakan ka buhan nang sudah maumpati Yesus, pas buhannya parahatan baduka wan manangis. ¹¹ Wayah buhannya mandangar bahwa Yesus hidup wan sudah dilihat oleh inya, buhannya kada parcaya. ¹² Imbah kajadian nitu, Yesus jua mancungul dalam rupa nang lain ka dua urang dari buhannya nang rahatan bajalan manuju ka desa. ¹³ Lalu, buhannya babulik wan mahabarakan ka nang lainnya, tatapi nang lainnya jua kada parcaya lawan buhannya. Yesus Bapandir ka Bubuhan Murid Sidin ¹⁴ Imbah nitu, Sidin mancungul parahatan kasabalas murid Sidin duduk makan wan Sidin managur buhannya karana kada parcayaan wan kakarasan hati buhannya. Sabab, buhan kada parcaya ka urang-urang nang sudah malihat Sidin imbah Sidin bangkit. ¹⁵ Sidin baucap ka buhannya, "Tulaklah ka saluruh dunia wan habarakan Injil ka sabarataan urang. ¹⁶ Siapa nang sudah parcaya wan sudah dibaptis pacang disalamatakan, tatapi siapa nang kada parcaya pacang dihukum. ¹⁷ Wan, tanda-tanda ini pacang maumpati buhan nang parcaya: Dalam ngaran-Ku buhannya pacang mausir roh-roh jahat; buhannya pacang bapandir dalam bahasa-bahasa hanyar; ¹⁸ buhannya pacang mamingkut ular lawan tangan buhannya; wan bila buhannya minum racun nang mamatikan, hal nitu kada pacang mancalakakan buhannya; buhannya pacang maandak tangan buhannya atas urang-urang garing, wan urang-urang nitu pacang sambuh." Yesus Taangkat ka Surga ¹⁹ Lalu, imbah Tuhan Yesus bapadah ka buhannya, Sidin taangkat ka surga wan duduk di higa kanan Allah. ²⁰ Lalu, buhannya tulak wan bakhotbah di mana-mana, wan Roh Kudus Yesus maumpati buhanya wan managuhkan firman-Nya liwat tanda-tanda nang maumpatinya.