¹ Akhirnya, dingsanak-dingsanak, kami maminta wan manasihati ikam dalam Tuhan Yesus supaya kaya nang sudah ikam tarima matan kami manganai kaya apa ikam harus hidup wan mahimungakan Allah, gawilah nitu labih lagi. ² Sabab, ikam tahu parintah-parintah apa nang kami sampaiakan ka ikam malalui kuasa Tuhan Yesus. ³ Sabab, inilah kahandak Allah: pangudusanmu*, bahwa ikam harus manjauhakan diri matan pacabulan; ⁴ bahwa ikam saurang-saurang tahu kaya apa manguasai awak ikam saurang dalam kakudusan wan kahormatan, ⁵ bukan dalam gairah nang hibak nafsu kaya urang-urang nang kada pinandu lawan Allah, ⁶ supaya kadada saurang pun nang malanggar wan manipu dingsanaknya dalam hal ini. Sabab, Tuhan adalah Pambalas matan sabarataan ini, kaya nang kami habarakan sabalumnya wan kami ingatakan bujur-bujur ka ikam. ⁷ Allah mangiau kita bukan gasan katidakkudusan, malainkan gasan kakudusan. ⁸ Oleh sabab nitu, siapa pun nang manolak ajaran ini, bukan manolak manusia, malainkan manolak Allah, nang manjulung Roh Kudus-Nya* ka ikam. ⁹ Namun, tetang kasih badingsanak, ikam kada perlu saikung urang gasan manulisakan ka ikam karana ikam saurang sudah diajar Allah supaya saling mangasihi. ¹⁰ Bahkan, ikam sudah manggawinya ka sabarataan dingsanak nang ada di Makedonia. Akan tetapi, dingsanak-dingsanak, kami bujur-bujur maminta ikam supaya ikam manggawinya labih lagi, ¹¹ wan bausahalah gasan hidup tenang, uruslah urusan-urusan ikam saurang, wan bagawilah lawan tangan ikam saurang, kaya nang sudah kami parintahakan ka ikam, ¹² Supaya ikam kawa manjalani hidup sepantasnya di hadapan urang-urang luar wan kada kakurangan apa-apa. Kadatangan Tuhan ¹³ Dingsanak-dingsanak, kami kada hakun ikam kada mangatahui manganai urang-urang nang sudah mati supaya ikam kada badukacita kaya urang-urang nang kada baisi pangharapan. ¹⁴ Sabab, jika kita parcaya bahwa Yesus sudah mati wan bangkit kembali, kita jua parcaya bahwa Allah pacang mangumpulakan buhannya nang mati di dalam Yesus basama-sama lawan Sidin. ¹⁵ Kami mamadahakan hal ini ka ikam lawan firman Tuhan, bahwa kita nang masih hidup, nang masih ada hingga kadatangan Tuhan, kada pacang mandahului buhannya nang sudah maninggal. ¹⁶ Tuhan saurang pacang turun matan surga lawan seruan, suara matan panghulu malaikat, wan lawan suara trompet Allah, wan urang-urang nang mati dalam Kristus pacang bangkit badahulu. ¹⁷ Imbah nitu, kita nang masih hidup, nang masih bagana, pacang diangkat baimbai dalam awan-awan lawan buhannya gasan batamuan lawan Tuhan di udara, wan kita pacang salalu basama Tuhan. ¹⁸ Karana nitu, hiburlah satu lawan nang lainnya lawan pandiran-pandiran ini.