² Sabab, ikam saurang bujur-bujur tahu bahwa hari Tuhan pacang datang kaya maling pada malam hari. ³ Waktu urang-urang baucap, "Damai wan aman," kabinasaan pacang datang atas buhannya secara tiba-tiba, kaya rasa sakit binian nang baranak, wan buhannya kada kawa malolosakan diri. ⁴ Namun, dingsanak-dingsanak, ikam kada hidup dalam kagalapan sahingga hati nitu pacang mandatangi ikam kaya saurang maling. ⁵ Ikam sabarataan adalah kakanakan tarang wan kakanakan siang. Kita kada tumatan malam atawa kagalapan. ⁶ Sabab nitu, janganlah kita guring kaya urang-urang lain, tapi marilah kita tatap tajaga wan waspada. ⁷ Urang nang guring, guring pada malam hari wan urang nang mabuk, jua mabuk pada malam hari. ⁸ Namun, karana kita adalah kakanakan siang, marilah kita sadar, mamakai baju zirah iman wan kasih, wan mamakai katopong pangharapan akan kasalamatan. ⁹ Allah kada manatapakan kita gasan mangalami murka, tapi gasan mandapatakan kasalamatan malalui Tuhan kita, Yesus Kristus, ¹⁰ nang sudah mati gasan kita supaya kita, entah tajaga atawa taguring, kawa badiam baimbai Sidin. ¹¹ Karana nitu, kuatakanlah satu lawan nang lainnya wan saling mambangunakanlah, kaya nang ikam gawi wayahini. Nasihat Tarakhir wan Salam ¹² Dingsanak-dingsanak, kami maminta ikam mahormati buhan nang bujur-bujur bagawi di antara ikam, wan nang mamimpin ikam dalam Tuhan, wan nang mamadahi ikam. ¹³ Hargailah buhannya bujur-bujur dalam kasih karana gawian buhannya. ¹⁴ Kami mamohon ka ikam, padahi buhan nang hidup pangoler, kuatakanlah buhan nang kacil hati, tolonglah buhan nang lamah, wan basabarlah lawan sabarataan urang. ¹⁵ Parhatikanlah supaya kadada urang nang mambalas kajahatan lawan kajahatan, malainkan salalu bausah manggawi nang bujur di antara ikam wan gasan sabarataan urang. ¹⁶ Basukacitalah salalu! ¹⁷ Taruslah badoa! ¹⁸ Basyukurlah dalam sagala hal. Sabab, nitulah kahandak Allah gasan ikam di dalam Kristus Yesus. ¹⁹ Jangan mamadamkan Roh!* ²⁰ Jangan mamandang randah nubuat-nubuat!* ²¹ Namun, ujilah sagala sasuatu! Pingkuti apa nang bujur! ²² Bajauh matan sabarataan macam kajahatan! ²³ Samoga, Allah damai sejahtera saurang mangudusakan ikam sabarataan. Kiranya roh, jiwa, wan awak ikam taharagu sabarataan, tanpa cacat pada kadatangan Tuhan kita, Kristus Yesus. ²⁴ Sidin nang mangiau adalah satia, Sidin pasti pacang manggawinya. ²⁵ Dingsanak-dingsanak, badoa jualah gasan kami! ²⁶ Barilah salam ka sabarataan dingsanak lawan cium kudus. ²⁷ Ulun maminta ikam bujur-bujur demi ngaran Tuhan, gasan mambacaakan surat ini gasan sabarataan dingsanak di sana. ²⁸ Anugerah Tuhan kita, Kristus Yesus manyartai ikam.