¹ Jadiakan ikam urang nang maumpati taladanku, nangkaya aku jua maumpati Kristus. Tanda Kakuasaan ² Wayahini, aku mamuji ikam lantaran ikam mangingatakan aku intang sagala hal wan maumpati tradis-tradisi nangkaya udah kupadahakan wan ikam. ³ Tatapi, aku handak supaya ikam paham bahwa kapala satiap lalakian adalah Kristus, kapala babinian adalah lalakian, wan kapala Kristus adalah Allah. ⁴ Satiap lalakian nang badoa wan banubuat mamakai kapala nang batudung kada mahormati kapalanya. ⁵ Tatapi, satiap babinian nang badoa atawa banubuat wan kapala nang kada batudung, mahina kapalanya, hal itu sama haja nangkaya mancukur kapalanya. ⁶ Sabab, amun ada babinian nang kada manudungi kapalanya, suruh inya mamotong sabarataan rambutanya. Tatapi, amun pacangan manyupani pabila babinian mancukur rambutnya, sabaiknya inya manudungi rambutnya. ⁷ Lalakian kada buleh manudungi kapalanya lantaran inya adalah gambaran kamuliaan Allah. Tatapi, babinian adalah kamuliaan lalakian. ⁸ Lalakian kada baasal matan babinian, tatapi babinian baasal matan lalakian. ⁹ Wan, lalakian kada diciptaakan gasan babinian, tatapi babinian gasan lalakian. ¹⁰ Itulah sababnya, babinian harus baisis tanda kaluasaan intang kapalanya lantaran para malaikat. ¹¹ Tatapi, intang Tuhan, kadada babinian tanpa lalakian, atawa lalakian tanpa babinian. ¹² Sabab, babinian baasal matan lalakian, kayaitu jua lalakian lahir maliwati babinian. Wan, sabarataannya baasal matan Allah. ¹³ Partimbangakan sorang, apakah pantas amun babinian badoa mamuhun wan Allah tatapi kapalanya kada batudung? ¹⁴ Kadakah urang banyak mangajarakan gasan ikam bahwa amun lalakian barambut panjang, hal itu marupaakan kahinaan gasan inya? ¹⁵ Tatapi, amun babinian barambut panjang, hal itu adalah kamuliaan gasan inya: sabab, rambutnya itu dibariakan gasan inya ibarat panudung. ¹⁶ Amun ada urang nang masih mambantah, kami kada biasa nangkaya itu, nangkaya itu jua jamaat Tuhan. Hal-hal nang Salah dalam Parjamuan Kudus ¹⁷ Dalam mambari parintah ini, aku kada mamuji ikam lantaran ikam bakumpul kada gasan hal nang labih baik, tatapi gasan hal nang kada baik. ¹⁸ Partama, rahat ikam bakumpul sabagai jamaah, aku mandangar bahwa kadada kakumpakan diantara buhan ikam. Wan, aku mamparcayainya sabagian. ¹⁹ Sabab, harus tajadi parpacahan diantara ikam supaya jalas buhan ikam ada nang tabukti tahan uji. ²⁰ Rahat ikam bakumpul intang wadah nang sama, hal itu kada gasan makan parjamuan Tuhan. ²¹ Lantaran rahat makan, satiap urang maambil badadahuluan asing-asingnya sahingga ada nang kada kabagian wan ada nang lainnya mabuk. ²² Apa ikam kada baisi rumah gasan wadah ikam makan wan minum? Atawa, apakah ikam mahina jamaah Allahnwan manyupani buhannya nang kada baisi apa-apa? Apa nang harus aku panderakan wan ikam? Haruskah aku mamuji ikam? Biar kada! ²³ Lantaran, apa nang aku tarima matan Tuhan itu jua nang aku bariakan gasan ikam, bahwa Tuhan Yesus, rahat malam Inya dihianati, maambil roti, ²⁴ balalu imbah mangucap syukur, inya mamacah-macahakan roti wan baucap, "Inilah awak-Ku, nang ku bariakan gasan ikam; ulahhaja nang kaya ini gasan maingatakan Aku." ²⁵ Kayaitu jua, Sidin maambil cangkir imbah makan balalu baucap, "Cangkir ini adalah parjanjian hanyar nang di sahakan uleh darah-Ku. Baulah kaya ini jua, satiap ikam maminumnya gasa maingatakan Aku." ²⁶ Sabab, satiap kali iakm makan roti ini wan minum cangkir ini, ikam mahabarakan kamatian Tuhan sampai Inya datang. ²⁷ Lantaran itu, siapa nang makan roti atawa minum cangkir Tuhan wan cara nang kada pantas, inya basalah wan awak wan darah Tuhan. ²⁸ Manusia harus mauji diri inya sorang, hanyar kawa makan roti wan minum matan cangkir itu. ²⁹ Sabab, urang nang makan wan minum mun kada mangakui awak Tuhan, inya mandatangakan hukuman gasan inya sorang. ³⁰ itulah sababnya, kanapa banyak buhan ikam nang lamah, wan garing balalu ada jua nang maninggal. ³¹ Tatapi, amun kita mailai diri kita sorang babujur, kita kada cagar tahukum. ³² Tatapi, wayah kita dihukum, kita dididik uleh Tuhan supaya kita kada dihukum taimbai wan dunia. ³³ 33 Jadi, Dinsanak-dinsanakku, wayah ikam takumpul makan, batutungguan ai dahulu. ³⁴ Kalau ada urang nang kalaparan, sabaiknya makan badahulu dirumahnya supaya rahat takumpul ikam kada mahakimi. Wan, hal-hal nang lain pacangan ku atur amun aku datang kena.