Balajar dari Kasalahan Israel ¹ Sabab, aku kada ikam kada maminanduinya, Dinsanak-dinsanak, bahwa buhan padatuan kita bahari, sabarataannya dibawah awan wan suamuannya maliwati laut. ² Buhannya sabarataan dibaptis wan Musa, intang awan wan intang laut. ³ Buhannya sabarataan makan makanan rohani nang sama, ⁴ wan sabarataannya minum minuman rohani nang sama. Sabab, buhannya minum matan Batu Rohani nang umpat baimbai buhannya, wan Batu itu adalah Kristus. ⁵ Biar kayaitu, Allah kada katuju wan sabagian banyak dari buhannya. Lantaran itu, buhannya dibinasaakan di padang gurun. ⁶ Wayahini, hal-hal nangkaya itu dijadiakan cuntuh gasan kita supaya kita kada jadi urang nang bakahandak jahat nangkaya buhannya itu. ⁷ Jangan manyambah barhala nangkaya diulah babarapa matan buhannya, nangkaya tatulis, "Bangsa itu duduk gasan makan wan minum, balalu bangun gasan bamainan." ⁸ Jangan kita bajinah nangkaya diulah sabagain buhannya sahingga 23 ribu urang mati dalam sahari. ⁹ Jangan kita macubai Tuhan, nangkaya diulah sabagian buhannya sahingga buhannya dibinasakan uleh ular-ular. ¹⁰ Jangan jua ikam basungut-sungut nangkaya buhannya basungut-sungut balalu dibinasaakan uleh malaikat maut. ¹¹ Hal nangkaya itu tajadi wan buhannnya sabagai cuntuh wan ditulisakan gasan paringatan bagi kita, nang di pahabisan zaman ini. ¹² Lantaran itu, biar aja urang nang mangira inya sorang taguh salalu waspada supaya inya kada gugur! ¹³ Kadada pancubaan nang suah ikam alami kacuali pancubaan -pancubaan biasa bagi manusia nang lainnya. Wan, Allah adalah setia, Sidin kada mambiarakan ikam dicubai malabihi kamampuanmu. Tatapi, baimbai wan pancubaan itu, Sidin cagar manyadiakan jalan kaluar supaya ikam kawa managgungnya. ¹⁴ Lantaran itu, dinsanak-dinsanak nang ku sayangi, jangan sampai ikam sorang manyambah barhala. ¹⁵ Aku bapadah nangkaya wan urang - urang nang bijaksana, pikirakan haja apa nang aku panderakan. ¹⁶ Kadakah cangkir barakat nang kita syukuri itu adalah kasatuan kita dalam darah Kristus? Wan, kadakah roti nang kita rapaiakan itu adalah kasatuan kita dalam awak Kristus? ¹⁷ Lantaran ada isa roti, maka kita nang banyak ini ibarat isa awak; lantaran kita sabarataan manjadi bagian matan isa roti itu. ¹⁸ Itihi urang-urang Israel, kadakah buhannya nag makan parsambahan maambil bagian dalam altar? ¹⁹ Jadi, apa kakira maksudku? Apakah makanan nang diparsambahakan gasan barhala adalah sasuatu? Atawa, apakah barhala adalah sasuatu? ²⁰ Kadak. Aku bapadah gasan ikam bahwa hal-hal nang bangsa-bangsa lai kurbanakan, buhannya mangurbanakannya gasan ruh-ruh jahat, lain gasan Allah. Wan, aku kada hakun ikam bagabung wan ruh-ruh jahat. ²¹ Ikam kada buleh minum cangkir matan Tuhan balalu minum jua matan cangkir ruh-ruh jahat. Ikam kada kawa manjadi bagian matan jamuan Tuhan wan jamuan ruh-ruh nang jahat. ²² Atawa, apakah kita labih kuat dari pada Sidin? Hidup gasan Mamuliaakan Allah ²³ "Sabarataannya dibulehakan," tatapi kada sabarataannya baguna. "Sabarataannya dibulehakan," tatapi kada sabarataannya mambangun. ²⁴ Jangan ada saikung urang nang mancari kabaikan gasan inya sorang, saharusnya kabaikan gasan urang lain. ²⁵ Makan haja apa nang dijual urang di pasar daging kada parlu mamariksanya, demi hati nurani. ²⁶ Lantaran, bumi wan samuaanya adalah ampun Tuhan. ²⁷ Amun ada urang nang balum parcaya basaruan balalu ikam tulak, makan haja apa nang di surung dihadapan ikam kada harus mamariksanya, demi hati nurani. ²⁸ Tatapi, amun ada urang bapadah wan ikam, "Makanan ini imbah diparsambahakan gasan barhala," jangan ikam makan, demi urang nang bapadah itu wan demi hati nurani ikam. ²⁹ Maksudku, kada gasan hati nurani ikam sorang, tatapi urang jua. Mangapa kabibasanku ditantuakan oleh hati nurani urang lain? ³⁰ Amun aku maambil jatahku wan ucapan syukur, kanapa aku disalahakan lantaran makanan nang atasnya aku mangucap syukur? ³¹ Jadi, antah ikam makan atawa minum, atawa apa haja nang ikam ulah, ulah haja samuaannya itu gasan kamuliaan Allah. ³² Jangan maulah urang sangkal, baik urang Yahudi, urang Yunani, atawa Jamaat Allah, ³³ nangkaya aku jua dalam samuaannya manyanangakan sabarataan urang, kada gasan mancari kauntungan aku sorang, tatapi gasan kauntungan urang banyak, supaya buhannya kawa disalamatakan.