Hak-Hak saurang mun jadi Rasul ¹ Tahukada aku urang nang udah bebas? Tahukada aku ni rasul? Tahukada mun aku udah malihat Yesus, Tuhan kita? Tahukada ikam tu hasil gawianku dalam Tuhan? ² Amun urang maanggap aku lain rasul, paling kada aku adalah rasul gasan ikam. Sabab, ikam tu ibarat materai karasulanku dalam Tuhan. ³ Kayainilah pambelaanku wan buahannya nang cagar mamariksa aku. ⁴ Kadakah kami baisi hak gasan makan atawa minum? ⁵ Kadakah kami baisi hak mambawa bini kami nang saiman, nangkaya buhan rasul nang lain, dinsanak-dinsanak dalam Tuhan, wan jua Kefas? ⁶ Atawa, apakah hinggan Barnabas wan aku nang kada baisi hak gasan bagawi? ⁷ Siapa garang nang suah mangabdi jadi tentara dengan ongkos sorangan? Siapa garang nang batananm anggur balalu kada mamakan buahnya? Atawa, siapa garang nang mangambalakan sapi balalu kada suah minum susunya? ⁸ Apakah aku manyambat sabarataan itu manurut manusia? Kadakah Hukum Taurat bapadah nang kaya itu jua? ⁹ Sabab, ada tatulis intang hukum Taurat Musa, "Jangan ikam mambarangus lembu nang rahat mangirik gandum!" Apakah lembu nang rahat Allah itihi? ¹⁰ Atawa, apakah inya mamadahakan gsan kita? Ya, gasan kitalah nang itu ditulis lantaran nang mambajak harus mambajak dalam pangharapan wan nang mangirik harus dalam pangharapan gasan kulehan bagiannya. ¹¹ Amun kami batanam banih rohani diantara buhan ikam, apa balabihankah amun kami jua mangatam hal-hal materi matan buhan ikam? ¹² Amun urang lain baisi hak ini atas ikam, kadakah kami labih berhak lagi? Biar nangkaya itu, kami kada mamakai hak itu. Sabaliknya, kami mananggung samuaanya supaya kami kada maulah halangan bagi Injil Kristus. ¹³ Kada tahu ikam bahwa buhannya nang manggawi hal-hal nang kudus itu, mamakan makanan mata Bait Allah jua? Wan, buhannya nang malayani di altar mandapat bagian dari kurban persembahan itu? ¹⁴ Kayaitu jua, Tuhan mamarentah buhannya nang mahabarakan Injil supaya buhannya hidup dari Injil jua. ¹⁵ Tatapi, aku kada suah mamakai satu gin matan hak-hak ini. Wan, aku kada manulis hal-hal ini supaya diulah kaya itu gasan aku. Sabab, labih baik aku mati dari pada ada urang nang mamunahakan kahimunganku. ¹⁶ Lantaran, amun aku mahabarakan Injil, aku kada baisi alasan gasan basombong lantaran itu adalah kawajibanku. Calakalah Aku, mun aku kada mahabarakan Injil. ¹⁷ Pabila aku mahabarakan Injil oleh kahandak aku sorang, aku baisi upah. Tatapi, amun ini lain kahandakku, ini adalah tugas nang di parcayaakan wan aku. ¹⁸ Amun kaya itu, apa garang upahku? upahku adalah pabila aku mahabarkan Injil, aku bolih mahabarkan injil biar kabagajih balalu aku kada manyalagunaakan hakku dalam Injil. ¹⁹ Tatapi, biar aku bebas atas samuaan urang, aku maulah diriku sorang hamba gasan samuaan urang supaya aku kawa mambawa labih banyak lagi. ²⁰ Gasan urang Yahudi, aku baulah nangkaya urang Yahudi. Gasan urang nang hidup di bawah Hukum Taurat, aku baulah nangkaya urang nang hidup dibawah Hukum Taurat (Biar aku sorang kada di bawah Hukum Taurat) supaya aku kawa mambawa buhannya nang ada di bawah Hukum Taurat. ²¹ Gasan buhannya nang kada baisi Hukum Taurat, aku baulah nangkaya kada ba Hukum Taurat ( kadanya kada ba hukum Allah, tatapi di bawah hukum Kristus) supaya aku kawa mambawa buahannya nang kada ba Hukum Taurat. ²² Gasan urang nang lamah, aku baulah nangkaya urang lamah supaya aku kawa mambawa urang nang lamah. Aku udah maulah sabarataannya gasan samua urang supaya wan macam cara aku kawa manyalamatakan sabarataan urang. ²³ Aku maulah sabarataan ini demi Injil supaya aku buleh bagian di dalamnya. ²⁴ Kada tahukah ikam bahwa buhannya nang bukah pas rahat balumba sabarataannya bahimat bukah, tatapi hinggan saikung ja nang manarima hadiah? Jadi, bukah ai bahimat supaya ikam nang mandapatakannya! ²⁵ Satiap urang nang balumba balatih manguasai diri dalam sagala hal. Buhannya manggawinya gasan manarima mahkota nang fana, tatapi kita mandapatakan mahkota nang abadi. ²⁶ Sabab itu, aku kada bukah nagkaya kada batujuan. Aku kada maninju nangkaya urang maninju angin. ²⁷ Tatapi, aku malatih awakku dengan karas wan manguasainya supaya imbah aku mahabarakan Injil gasan urang lain, aku sorang jangan ditolak.