Karunia-Karunia matan Ruh Kudus ¹ Wayahini, manganai karunia-karunia rohani, Dinsanak-dinsanak, aku kada handak ikam kada minanduinya. ² Ikam tahu bahwa rahat ikam masih jadi urang-urang nang balum minandui Allah, ikam disasatakan wan barhala-barhala bisu, nangkaya apa haja ikam sudah diatur. ³ Lantaran itu, aku mamadahakan gasan ikam bahwa kada saikung gin, nang bapaner uleh Ruh Allah, nang baucap, "Yesus takutuk," wan kadada saikung gin nang baucap, "Yesus adalah Tuhan, " salain uleh Ruh Kudus. ⁴ Banyak macam karunia rohani, tatapi Ruhnya sama haja. ⁵ Wan, banyak macamnya palayanan, tatapi Tuhannya sama haja. ⁶ Banyak macam gawian, tatapi Allah nang sama jua nang mangawiakan sabarataanya intang samuaan urang. ⁷ Gasan tiap-tiap urang dikaruniaakan panyataan Ruh gasan kabaikan sabrataan. ⁸ Gasan nang saikung dibariakan kata-kata hikmat maliwati Ruh wan gasan nang lainnya kata-kata pangatahuan oleh Ruh nang itu jua. ⁹ Gasan nang lainnya dibariakan iman uleh Ruh nang sama, gasan lain karunia-karunia manyambuhakan oleh Ruh nang itu jua. ¹⁰ Gasan nang lain dibariakan gawian-gawian mujizat, gasan nang lain karunia banubuat. Gasan nang lainnya dibariakan kasanggupan gasan mambida-bidaakan ruh-ruh, gasan nang lainya macam-macam bahasa lidah, wan nang lainnya gasan maartiakan bahasa-bahasa lidah itu. ¹¹ Sabarataan itu nangmanggawianya adalah Ruh nang satu wan nang sama, nang mambagi gasan asing-asing urang, nangkaya nang Sidin kahandaki. Satiap Urang Parcaya adalah Bahagian matan Awak Kristus ¹² Sama nangkaya awak adalah satu, tatapi baisi banyak anggota, wan samua anggota tubuh, biar banyak, adalah satu awak, nangkayaitu jua Kristus. ¹³ Sabab, oleh satu Ruh, kita sabarataan uadh dibaptis ka dalam satu tubuh, baik urang Yahudi maupun urang Yunani, baik budak maupun urang merdeka, wan kita sabarataan dibari minum matan satu Ruh. ¹⁴ Lantaran awak kada hinggan satu anggota haja, tatapi banyak anggota. ¹⁵ Amun batis baucap, "lantaran aku lain tangan, jadi aku lain bahagian matan awak," kada baarti inya lain bahagian awak. ¹⁶ Wan, amun talinga baucap, "Lantaran aku lain mata, aku lain anggota awak," kada baarti inya kada bahagian awak. ¹⁷ Amun awak sabarataan adalah mata, kaya apa mandangar? Amun sabarataan awak talinga, nangkaya apa jua mancium? ¹⁸ Tatapi, wayahini Allah udah maandakakan anggota-anggota itu, satiap urang dari buhannya, intang awak, sasuai nang Sidin kahandaki. ¹⁹ Amun sbarataannya adalah satu anggota, intang manajua awak? ²⁰ Jadi, mimang ada banyak anggota, tatapi hinggan satu awak. ²¹ Sabab itu, mata kada bisa bapadah wan tangan, "Aku kada mamrluakan ikam!" Atawa lagi, kapala wan batis, "Aku kada mamarluakan ikam!" ²² Sabaliknya, anggota-anggota awak nang kalihatannya lamah sabujurnya nang paling diparluakan. ²³ Wan, anggota-anggota awak nang kita pikir kurang tahurmat, justru bariaakan panghuramatan labih. Wan, anggota-anggota awak, nang kita anggap kada layak tampil, harus diulah gasan labih layak tampil, ²⁴ lantaran bahagian-bahagian nang sudah layak tampil kada mamarluakannya. Tatapi, Allah udah maatur awak itu wan mambariakan panghormatan labih ganal gasan anggota-anggota nang kakurangan. ²⁵ supaya kadada tapacah-pacah intang awak, sabaliknya supaya anggota-anggota itu kawa mamparhatiakan saikung wan nang lainnya. ²⁶ Amun satu anggota mandarita, sabarataan anggota umpat jua marasaakannya. Amun satu anggota dimuliaakan, samuaan anggota umpat jua bahagia. ²⁷ Wayahini ikam adalah satu awak Kristus wan ikam asing-asing adalah anggota-anggotanya. ²⁸ Allah imbah manantuakan intang jamaah, partama, adalah buhannya rasul, kadua adalah buhan nabi, katiga adalah buhan guru, balalu mukjizat-mukjizat, karunia-karunia manyambuhakan, manulung, mamimpin, wan macam-macam bahasa. ²⁹ Apakah sabarataannya rasul? Apakah sabarataannya nabi? Apakah sabarataannya guru? Apakah sabarataannya kawa maulah mujizat? ³⁰ Apakah sabarataannya baisi karunia manyambuhakan? Apakah sabarataannya kawa bapander wan bahasa-bahasa lidah? Apakah sabarataannya kawa maartiaakannya? ³¹ Tatapi, handakilah karunia-karunia nang paling ganal. Balalu aku cagar manampaiakan gasan ikam jalan nang paling baik.