11 ¹ Petrus mulek ma Yerusalem Rahatan yiru here Rasul andri kawan ungkup hang Yudea karengei mun kawan ulun sa lain hingka here Yahudi pada haut narime lengan Alatala Panante Tuhan. ² Daya yeru hi Petrus hawi ma Yerusalem, naan habar nye iru ulun sa ba supit rawek andri sa puang ba supit. Eau here ma hi Petus, ³ "Nun sa hanyu hakun mira wangun, ikuta iukan andri here sa puang na supit". ⁴ Daya sabab yiru, hi Petrus iwara nelang matataan here katuluh nelang batutur eau ni, ⁵ "Aku rahat balakudua ma Panante Tuhan hang kota Yope, hang wuang wangun sadar atawa ngaan sadar, aku kadinung nye yiru paninungan, naan erang ka gabar kain laga sagi epat na ului hingka amau langit, banna yiru magin riet andri aku. ⁶ Dami aku ninung daduuh, tena tuu dinungku rama kawan satua ba pee epat hang tane, kawan satua maadi, kawan satua ilansar, pada kawan bamasam wurung. ⁷ Aku pada karengei naan lengan nantekas kaeau, 'Amuan, Petrus, samalis palus haragu udi hie kutaleh!' ⁸ Kude aku (Petrus) kaeau, 'Ngaanku, Tuhan. Daya, sa katuluh pangauta sa jari kapadien ngaan suah wuah kuta dayaku,' ⁹ Kude, naan lagi lengan yiru nuing ma hanrueh kali ni hingka tulung rakun, 'Inun sa haut na barasis daya Alatala Panante Tuhan, ada hanyu ngeau yiru kapadien!' ¹⁰ Yiru hampe telu kali ulek na tantarang nelang na eau ma aku. Balalu na indrik lagi ma tulung rakun. ¹¹ Tena tuu, rahatan yiru, naan telu kaulun hawi naba aku ma unenganku santurui, here hingka Kaisarea. ¹² Udi yiru Amirue Barasis kaeau ma aku nelang nunyu aku hampan ada gaer balalu palus tulak sindrah here. Kaenem pulaksana'i sa haut mira kaharapen nelang purusaya yina pada tulak sindrah aku ma lewu ulun yiru. ¹³ Udi yiru hanye basurah ma kami mun hanye haut na panalu daya malaikat sa mindri hang dahapan lewu ni nelang kaeau, 'Huyu nu ulun kaharapen nu ma Yope manalu hi Simon sa na galar pada hi Petrus hampan hanye hawi ma yina, ¹⁴ hanye ru sa umak iwara pesen maeh ma hanyu pada gana pesen yiru hanyu na salamatakan, hanyu andri katuluh ulun sa uweng hang lewu rean nu,' ¹⁵ Pas rahat aku basurah, Amirue Barasis minau palus nyarung here, sameh kala sa suah na ingkam takam. ¹⁶ Balalu, aku kaitung lengan Tuhan, sa Hanye kaeau, 'Yohanes ngampi ruah andri ranu, kude naun neu na ruah andri Amirue Barasis.' ¹⁷ Jari, "Amun Alatala Panante Tuhan ngami ahi lelu isa sameh pada ma here kala sa na ami Ni pada ma takam dami haut harap nelang purusaya hang wuang Tuhan Yesus Kristus, hie sa aku salenga heei ngawalewe Alatala Panante Tuhan?" ¹⁸ Dami here karengei lengan pasurahen yiru, here balalu ranai nelang mihewu palus nawat hurumat Alatala Panante Tuhan nelang kaeau, "Amun kala yiru, Alatala Panante Tuhan haut ngami ahi lelu Ni ma kawan ulun sa puang Yahudi hampan iwaleng hingka kawan kahalaen balalu nuju welum sa ranai mihewu." Injil Hampe ma Antiokhia ¹⁹ Udi yiru, kawan ulun sa tapisah tuar daya udi kadinung hi Stefanus wuah kakasah, habar yiru pada hampe maFenisia, Siprus, pada Antiokhia, here pada ngaan wahai surah ma hie pun tentang lengan Alatala Panante Tuhan suali ma ulun Yahudi ai. ²⁰ Kude, naan papire kaulun hingka here yiru, nyeiru ukawan ulun Siprus andri ulun Kirene, sa pada hawi ma Antiokhia pada basurah ma kawan ulun Helenis, here nampe nelang mambarita hie sa Yesus Kristus ru. ²¹ Tangan Tuhan nyanrukui here, balalu rama tuu ulun jari purusaya iwaleng hingka kahalaen balalu umma Tuhan. ²² Habar yiru hampe pada ma kawan ungkup hang Yerusalem, gana yiru here nunyu hi Barnabas tulak ma Antiokhia. ²³ Dami hi Barnabas hampe balalu kadinung ahi lelu Alatala Panante Tuhan, hanye tuu sanang pada hanye matataan here katuluh hampan tatap baya Tuhan nelang atei here ilekep ma Hanye. ²⁴ Daya hi Barnabas ru ulun maeh atei, nelang Amirue Barasis uweng hang wuang hanye pada iman ni tamam, balalu rama tuu ulun baubah jari ungkup Tuhan. ²⁵ Udi yiru, hi Barnabas tulak ma Tarsus lepuh ngantara hi Saulus. ²⁶ Dami hanye panalu, palus insing ni ma Antiokhia. Salawah erang taun, here ngiai ngajar nelang matataan kawan ungkup pada kawan ulunrama. Hang Antiokhia, here murid-murid yiru mulai na antuh "ulun Kristen". ²⁸ Hang papire andrau rahatan yiru pada, naan papire kaulun nabi minau hingka Yerusalem hawi ma Antiokhia. ²⁷ Erang kaulun hingka here ru ngaran ni hi Agabus, daya pangarawahen Amirue Barasis hanye tau karasa nelang iwara mun sagar naan wayah mahadin sa tamam nye iru rara miyaya sa tamam hang dunia. Masa yiru naan hang pemerintahan Klaudius. ²⁹ daya yiru kere kawan murid-murid mufakat ngirim kawan pangamian here sasuai andri kauleen here saasing, umak here pulaksana'i hang wuang Tuhan sa muneng hang Yudea. ³⁰ Pada here ngarawah ngirim ma here penatua mitah tangan Barnabas andri Saulus.