¹ Ngalaka maruh ka parahu, Yesus ngalangkah tahuu' ge' tiba wak kota-A sadi ² ge' mile, ayo'a minsakng ka ini' sok lumpuh da gurikng ka tampat pabuus waktu mile iman ayo'a. Yesus nyansana ka sok lumpuh dakoh "teguhkanlah ate mu' anak-Ko', duse mu' gat'n ngampun." ³ Laka dakoh, mani ungan ahli Taurat nyansana ka sadat'n ate'a, "Sok diah manhujat!" ⁴ Tapi, Yesus pane pikiran ayo'a, wat'n-A, "Nyai ayo kup'm mikir da jahe ka sadat'n atemu'? ⁵ Dumelah da labih mudah, nyansana 'Duse-dusemu' gat'n ngampun,' ato nyansana, 'Umpatlah ge' bajalat'nlah'? ⁶ Tapi aok'a, supaya imu' kaat'n pane kalo wak bumi Anak Talino bakuasa ya' mangampuni duse. "Laka dakoh, Yesus nyansana ka sok lumpuh dakoh, "Umpatlah, ngantat'nlah tampat pabuusmu', ge' urelah!" ⁷ Maka, ini' umpat ge' ure. ⁸ Barang, pas sok karah mile hal diah, ayo'a jadi takjub ge' mamuliakan Jabata da mangkat'n kuasa ulah dakoh ka talino. Matius Pangumpul Pajak Nganang Yesus ⁹ Pas Yesus anu umpat'n situ, Ini' mile sok da gat'n maba Matius sadakng unyung wak tampat pangumpulan pajak. Lalu, Yesus nyansana ka ini', "Ngananglah Iko'." Ge', Matius agut'n ge' nganang Yesus. ¹⁰ Pas waktu Yesus unyung uman wak sadat'n ramin dakoh, mile, karah pangumpul pajak ge' ayo-sok baduse utukng, lalu unyung uman samahu Yesus ge' murid-murid-A. ¹¹ Ge', pas ayo-sok Farisi mile hal diah, ayo'a nyansana ka murid-murid-A, "Nyai Gurumu' uman samahu para pangumpul pajak ge' ayo-sok baduse?" ¹² Tapi aok'a pas Yesus dangah hal dakoh, Ini' nyansana, "Ayo'a da sehat kati mambutuhkan tabib, malait'nkan ayo'a da anap'm. ¹³ Tapi, anulah ge' palajari jai arti'a diah, 'Iko' manghendaki pamase'a,' inya parsembahan,' sa' Iko' utukng inya ya' maba da taman, malait'nkan ayo-sok baduse." Partanyaan tentang Bapuasa ¹⁴ Laka dakoh, murid-murid Yohanes utukng ka Yesus ge' mansikat'n, "Nyai kai' ge' ayo-sok Farisi bulah puasa, tapi murid-murid-Mu kati bapuasa?" ¹⁵ Ge', Yesus nyansana ka ayo'a, "Kaat'nkah para pangrikng pangantin badukacita salama pangantin are-are masih samahu-mahu nige ayo'a? Tapi aok'a, aok tiba waktu'a pas pangantin are-are dakoh gat'n naap umpat'n ayo'a, ge' laka dakoh ayo'a aok bapuasa." ¹⁶ Kati ani sook pun da namal saput da bahu ka pangiak da tuhi, barang namal dakoh rubek pangiak da tuhi ge' makin aihyolah rubek'a. ¹⁷ Uga, kati ani sok da nuntokng anggur bahu ka sadat'n kantong kurit da tuhi. Sa ladakoh, kantong kurit dakoh aok rubek, ge' anggur'a aok tuntokng, ge' kurit'a ancur. Tapi aok'a, ayo'a mana' anggur da bahu ka kantong kurit da bahu pula sahingga kadua'a tarpelihara." Yesus ngabangkit ge' ngangkawhat'n'a ¹⁸ Samantara Yesus muji' hal-hal diah ka ayo'a, mile, sook pamimpin ramin sambahyang utukng ge' manyembah-A, ge' nyansana, "Anak mahuko' baru ta kabis. Tapi aok'a, utukng ge' mana'lah barekng-Mu' ka samo'a, maka ini' aok idup." ¹⁹ Lalu, Yesus umpat ge' nganang sok dakoh, lakoh uga nige murid-murid-A. ²⁰ Ge', milelah, sook mahu da laka manderita pandarahan salama dua balas taun ngariket Yesus umpat'n balakang ge' manjamah ujukng jubah-A, ²¹ sa' mahu dakoh nyansana ka adup'a sadi, "Sa' iko' marap jubah-A saja, iko' aok awhat'n ²² Tapi aok'a, Yesus malik ge' mamandang mahu dakoh, lalu nyansana, "Teguhkanlah atemu', hei anak-Ko', imanmu' laka ngangkawhat'nmu'. "Pas no' dakoh uga, awhat'n'ta mahu dakoh. ²³ Pas Yesus tiba wak ramin kapala ramin sambayang dakoh ge' mile para paniup suling ge' karumunan sok da manyababkan kabisingan, ²⁴ Ini' nyansana ka ayo-sok dakoh, "Anulah, barang anak mahu dakoh kati kabis, malait'nkan sadakng buus." Ge', ayo'a ngalukat'n Yesus. ²⁵ Barang, pas sok karah dakoh laka gat'n ngusir mungkas, Yesus maruh lalu nyinte barekng kangot dakoh, ge kangot mahu dakoh pun umpat. ²⁶ Barita diah tarsabar ka saluruh daerah dakoh. Yesus ngangkawhat'n dua ungan sok Buta ²⁷ Pas Yesus anu umpat'n dakoh, dua ungan buta nganang Ini' sambil kaekng-kaekng, "Maselah ka kai', Anak Daud." ²⁸ Ngalaka Ini' maruh ramin dakoh, kadua ungan buta dakoh ngariket'-A ge' mansikat'n ka ayo'a, "Diu'ta imu' pacaya kalo Iko' kaat'n bulah hal diah?" Ayo'a nyansana ka-Ini', "Ai, Tuhan!" ²⁹ Laka dakoh, Yesus manjamah matu ayo'a, wat'n-A, "Jadilah ka imu' manurut imanmu'." ³⁰ Ge', tabukalah matu ayo'a. Yesus nige tegas mamparingatkan ayo'a, "Pratikanlah, iya' ani sook pun pane hal diah." ³¹ Tapi aok'a, ayo'a mungkas ge' manyabarkan barita tentang Yesus ka saluruh daerah dakoh. Yesus Manyembuhkan Sok Bisu ³² Ngalaka kadua sok dakoh mungkas, ilelah, ayo-sok minsakng sook awa' dakoh gat'n ngarasuk roh da jahe ka Yesus. ³³ Ngalaka roh da jahe dakoh gat'n nguser, sok awa' dakoh pun nyansana. Sok karah dakoh jadi heran ge' muji', "Hal ulah diah ti'nga parnah gat'n mile wak Israel." ³⁴ Tapi aok'a, ayo-sok Farisi muji', "Ini' nguser roh-roh da jahe nige panguasa roh-roh da jahe." Karah Panenan Iget Pangaraje ³⁵ Ge', Yesus anu kalilikng samaan kota ge' desa sambil ngajar wak sinagoge-sinagoge ayo'a, ge' nyarita Injil krajaan, gae ngangkawhat'n sagala panyakit ge' anap'm. ³⁶ Pas Yesus mile sok karah dakoh, Ini' marasa mase ka ayo'a barang ayo'a lalah ge' talantar ulah domba-domba tanpa gambala. ³⁷ Laka dakoh, Ini' nyansana ka murid-murid-A, "Sasungguh'a, panenan karah, tapi pangaraje-pangaraje'a iget." ³⁸ Barang dakoh, mahilah ka Tuhan da umpu panenan, ya' ngirim pangaraje-pangaraje ka sadat'n panenan-A."