¹ Jangkah Yesus disah umpat'n mungu dakoh, kumpur sok karah nganang-A. ² Ge', mile, sook da anap'm kusta utukng ka-Ini' ge' sujud wak tura-A, ge' nyansana, "Tuan, kalo Akup'm ituh, Akup'm kaat'n baranakko'." ³ Ge', Yesus nyulo barekng-A gae nyangkam'a, wat'n-A, "Iko' ituh, awhat'nlah." angkah dakoh uga, gat'n ngangkawhant'nlah kusta sok dakoh. ⁴ Ge', Yesus nyansana ka ini, "mampratilah, iyak imu' nyarita jai-jai ka sook, tapi anulah, pratikanlah adupmu' ka imam, ge' parsambahkanlah parsembahan da gat'n marintah Musa sabage kasaksian yak ayo'a. "Sook Palayan Parwira Romawi Gat'n nyambuh ⁵ Jangkah Yesus maruh ka Kapernaum, sook parwira utukng ka-Ini', mahi ka-Ini', ⁶ ge' nyansana, "Tuan, hambako' sadakng gurikng lumpuh wak ramin, aru manderita." ⁷ Ge', Yesus nyansana ka ini', "Iko' aok utukng ge' nyambuh ini'." ⁸ Tapi aok'a, parwira dakoh naham ge' nyansana, "Tuan, iko' kati layak yak Akup'm maruh ka saroh aro ko', tapi muji'lah nyapatah sarat'n sadi ge' hambako' aok gat'n ngangkawhat'n. ⁹ Barang, iko' uga diu'ta sok da ani ka saroh kakuasaan, nige tantara-tantara wak sarohko'. Ge', iko' nyansana ka da nyungan, 'Anulah,' ini' pun anu, ge' ka da lait'n, 'Utukngnih,' ge' ini' pun utukng, ge' ka hambako', 'Umas diah,' ge' ini' pun umas'a." ¹⁰ Jangkah Yesus dangah hal diah, Ini' kagum ge' nyansana ka ayo-sok da nganang-A, "Iko' nyansana da sbanar'a ka imu', Iko' ti'nga amput imam da aihyo diah wak antara sok Israel. ¹¹ Iko' nyansana ka imu' saroh karah da aok utukng umpat'n timur ge' barat, ge' unyung uman nige Abraham, Ishak, ge' Yakub ka sadat'n Krajaan Surga, ¹² tapi anak-anak krajaan dakoh aok gat'n matat'n ka sadat'n patakng da paling patakng. Wak teet'n aok ani rahu-rahu ge' bagaret japu." ¹³ Ge', Yesus nyansana ka parwira dakoh, "Anulah, kate'alah tarjadi ka imu' ulah da imu' macaya." Ge', pas angkah dakoh uga, hamba'a gat'n ngangkawhat'n. Sino Martua Petrus ge' Sok Karah Gat'n ngangkawhat'n ¹⁴ Jangkah Yesus utukng ka ramin Petrus, Ini' mile sino martua Petrus sadakng gurikng ge' sanguh. ¹⁵ Lalu, Yeus nyangkam barekng sino dakoh ge' sanguh'a ilang. Laka dakoh, ini' umpat ge' malayani Yesus. ¹⁶ Jangkah ngarami ano, ayo'a minsakng ka-Ini' karah sok da karasukan roh jahe, ge' Ini' nguser roh-roh dakoh nige nyiteng sarat'n, ge' ngangkawhat'n samaan sok da anap'm, ¹⁷ supaya gat'n nganganap jai da gat'n nyansana uleh Nabi Yesaya: "Ini'lah da naap kalamahan-kalamahan ite ge' nanggong panyakit-panyakit ite." Manjadi Pangikut Yesus ¹⁸ Mati', jangkah Yesus mile sok karah ngangkalilikng-A, Ini' mangkat'n parintah yak batolak ka pajah. ¹⁹ Laka dakoh, sook ahli Taurat utukng ge' nyansana ka-Ini', "Guru, iko' aok nganang-Mu' ka ume pun Akup'm anu." ²⁰ Ge', Yesus nyansana ka ini', "Ayo rubah umpu liang ge' manuk-manuk wak rangit umpu sare-sare. Tapi aok'a, Anak Talino kati umpu tampat yak mana' abak-A." ²¹ Nyungan umpat'n ayo murid nyansana ka-Ini', "Tuhan, izinkanlah iko' yak talabih uru anu ge' ngubur sama'ko'." ²² Tapi aok'a, Yesus nyansana ka ini', "Ngananglah Iko', ge' kate'alah sok kabis ngubur sok kabis ayo'a sadi." Yesus Maredakan Badei ²³ Ge', jangkah Yesus maka' ka parahu, murid-murid-A nganang Ini'. ²⁴ Ge', ilelah, tarjadi badei aihyo wak timu' sahingga parahu dakoh tatutup ombak. Tapi aok'a, Yesus ge' ngias-A, wat'n'a, "Tuhan, salamatkan kai'! Ite sadakng binasa!" ²⁶ Ge', Ini' nyansana ka ayo'a, "Nyai imu' buut, hei imu' da kurang baiman?" Lalu, Ini' agut'n ge' nguser nyaru gae timu' dakoh, ge' manjadi tanang sakali. ²⁷ Maka, ayo-sok dakoh taheran-heran ge' nyansana, "Sok samu jailah Ini' diah, bahkan nyaru ge' timu' pun nurut-A?" Dua Ungan Gadara Karasukan Roh Jahe ²⁸ Jangkah Yesus utukng wak pajah timu', wak daerah sok Gadara, dua ungan da karasukan roh jahe amput-A. Ayo'a mungkas umpat'n kuburan nige aru garang sahingga kati ani sok da kaat'n nabo pagala dakoh. ²⁹ Ge', ilehlah, ayo'a ngampak, wat'n'a, "Jai urusan antara Akup'm nige kai', hei Anak Jabata? Jai Akup'm utukng yak nyiksa kai' kati'nga waktu'a?" ³⁰ Ge', agak jauh umpat'n ayo'a ani sakawanan aihyo uwe da sadakng najo pangkuman. ³¹ Sitan-sitan dakoh mahi ka-Ini' ge' nyansana, "Sa' Akup'm ngate nguser kai' pindah ka sadat'n kawanan uwe dakoh." ³² Ge', Yesus nyansana ka ayo'a, "Anulah!" Lalu, ayo'a mungkas ge' maruh ka sadat'n uwe-uwe dakoh. Laka dakoh, samaan kawanan uwe dakoh pun nyangukng umpat'n tabikng timu' ge' kabis wak sadat'n pait'n. ³³ Ayo-sok da mangambala kawanan uwe dakoh boho adup'a, ge' maruh ka sadat'n kota, ge' nyarita samaan'a, tarmasuk jai da tarjadi nige ayo-sok da gat'n ngarasuk sitan dakoh. ³⁴ Ge', ilelah, samaan kota mungkas yak badaput nige Yesus. Jangkah mile Yesus, ayo'a mahi-A yak ngagat'n wilayah ayo'a.