¹ "Iya' manghakimi biar imu' kati gat'n manghakim. ² Barang nige panghakiman da imu' gune ya' manghakimi, imu' aok gat'n manghakim, ge' nige ukuran da imu' ngukur aok gat'n ngukur ka imu'. ³ Ge', jai imu' mile uras kayu wak matu agemu', tapi kati pane balok da ani wak matumu' sandiri? ⁴ Ato, langkina bisa imu' muji' ka agemu', 'Kate iko' ngaluar uras kayu dakoh umpatn matumu',' tapi ile, ani balok wak matumu' sandiri? ⁵ Hei, sok munafik, kaluar uru balok dakoh umpat'n matumu', ge' lakadakoh imu' aok mile nige jelas ya' ngaluar uras kayu umpat'n matu agemu'. V 6 Iya' mangkat'n barang da kudus ka kasu-kasu, iya' pula munu mutiaramu' ka tura uwe supaya ayo'a kati ninyak-ninyak dakohg nige kaja'a ge' babalik ngarumet-ngarumet imu'." Mahilah, Najolah, ge' ngatoklah ⁷ "Mahilah, ge' hal dakoh aok gat'n mangkat'n ka imu'. Najolah, ge' imu' aok kaat'n. Ngatoklah, ge' hal dakoh aok gat'n muka bagimu'. ⁸ Barang, satiap sok mahi, ini' narima, ge' sok da najo aok kaat'n, ge' bagi ini' da ngatok aok gat'n muka'. ⁹ Ato, asi umpat'n antara imu', da ani anak'a mahi roti aok mangkat'n batu ka anak'a dakoh? ¹⁰ Ato, sa' anak'a mahi ikat'n, ini' kati aok mangkat'n nipa ka anak'a dakoh, inya? ¹¹ Jadi, sa' imu' da jahe pane langkina mangkat'n anak-anakmu pamberian-pamberian da bait, talabih agi Samamu' da wak saruga, Ini' aok mangkat'n da bait ka ayo'a da mahi ka-Ini." Hukum da Tarutama ¹² "Barang dakoh, sagala tarut'n imu' ngate sok bulah ka imu', lakoh uga imu' bulah ka ayo'a barang diahlah isi Hukum Taurat ge' kitab ayo nabi." Jalat'n Nuju Kahidupan ¹³ "Maruhlah nabo garbang da sampit barang lebarlah garbang ge' luaslah pagala da nuju ka kabinasaan, ge' ani karah da maruh nabo'a. ¹⁴ Sa', sampitlah gerbang ge' sesaklah pagala da nuju ka kahidupan, ge' iget da amput'a." Paringatan tentang Nabi-Nabi Palsu ¹⁵ "arus, waspadalah tradap nabi-nabi palsu da utukng ka imu' tapangiak domba, tapi sabanar'a ayo'a ani ta serigala da garang. ¹⁶ Umpat'n buah'a imu' aok nganal ayo'a kaat'n sok ngubu buah-buah anggur umpat'n rumpo unak ge' buah-buah ara umpat'n puut'n da ba unak? ¹⁷ Lakoh uga, satiap puut'n da bait ngasil buah da bait, tapi puut'n da kati bait ngasil buah da kati bait. ¹⁸ Puut'n da bait kati mungkin ngasil buah da kati bait, ge' puut'n da kati bait kati mungkin ngasil buah da bait. ¹⁹ Satiap puut'n da kati ngasil buah da bait aok gat'n nabakng ge' gat'n matat'n ka sadat'n api. ²⁰ Jadi, umpat'n buah-buah'a imu' aok nganal ayo'a. ²¹ Kati samaan sok da nyansana ka-Ko', 'Tuhan, Tuhan,' aok maruh ka sadat'n krajaan saruga, malait'nkan ini' da bulah kahendak Sama'ko' da wak saruga. ²² Pas ano dakoh, karah sok aok nyansana ka-Iko', 'Tuhan, Tuhan, inya ta kai' banubuat ka sadat'n gaat'n-Mu', da nguser Roh-Roh jah ka sadat'n gaat'n-Mu'? ²³ Lalu, iko' aok muji'a ka ayo'a iko' parnah nganal mu'! lalu umpat'n ko', imu' da ngaraje da sara'!'" Dangah nige da Bulah ²⁴ "Sa', lakoh, samaan sok da dangah sarat'n-Ko' diah ge' bulah'a aok jadi ulah sok bijaksana da mambangun ramin'a wak samo batu. ²⁵ Lalu, disahlah ujat'n ge' utuknglah banjir, ge' nyaru batiup narajakng ramin dakoh kati ruboh barang gat'n mantagut'n wak samo batu. ²⁶ Ge', satiap sok da dangah sarat'n-Ko' diah ge' kati bulah'a aok jadi ulah sok baga da mantagut'n ramin'a wak samo pasir. ²⁷ Lalu, disahlah ujat'n ge' utuknglah banjir, ge' nyaru batiup narajakng ramin dakoh, ge' ramin dakoh ruboh, ge' aru aihyo rusak'a." ²⁸ Jangkah Yesus salesai muji' hal-hal diah, sok karah taheran-heran ka pangajaran-A, ²⁹ Barang Ini' ngajar ayo'a sabage sok da bakuasa, ge' kati ulah ahli-ahli Taurat ayo'a.