¹ "Waspada ta sadatn umas kawajiban agamamu' ka tura' talino, iya' nige' maksud ya' ayoa' mile'. Sa' ladakoh, imu' kati' ao' kaatn upah umpat Samamu' da ka surga. ² Karna dakoh, waktu imu' mangkatn sadakah, iya' mihu tarumpet ka tura' mu' samu ge' ayo sok munafik umas ka sinagoge-sinagoge ge' gala'-gala' supaya ayoa gatn sok laitn ngarania. Iko muji' da sabanar'a ka imu' bahwa ayoa ngalaka kaatn upah'a. ³ Tapi ao'a, waktu imu' mangkatn sadakah, iya' ta mambiar barekng sengkirimu' panane ja da barekng sentao'mu' umas. ⁴ supaya sadakahmu' dakoh kati' tile' ge' Samamu' da mile' da kati' tile' dakoh ao' mangkatn upah ka imu'." Ajaran manganai Badoa ⁵ " Ge', waktu imu' badoa, iya' samu ge ayo sok munafik karna ayo'a suka agutn ge' badoa ka sinagoge-sinagoge ge' pitok-pitok gala' supaya sok laitn mile'. Iko muji da sasungguh'a ka imu', ayo'a ngalaka narima upah'a. ⁶ Tapi ao'a, waktumu' badoa, maruh mih kasadatn uhakngmu' ge' ngabut mih pintu'a , ge' badoa mih ka Samamu' da ani ka tampat da kati tile',maka Samamu' da mile' da kati' tile' dakoh ao' mangkatn upah ka imu'. ⁷ Ge', waktumu' badoa, iya' manggune saratn-saratn da kati' ani rati'a,samu ge' da ayo sok da kati' nganal Jabata, sabab ayo'a ngira nige' karah'a saratn-saratn, ayo'a ao' gatn da dangah. ⁸ Karna dakoh, iya' samu' ge' ayoa karna Samamu' panane jai da imu' palalu katinga imu' mahi'a ka Ini'. ⁹ Badoa ta samu diah, "Sama' kai da ka surga, Da ngudus ta gaatn-Mu'. ¹⁰ Utukng ta Karajan-Mu', Jadi ta kahandak-Mu' ka tana paitn samu ge' da ka surga. ¹¹ Mangkatn ta kai, ka ano diah, pangkuman kai da sacukup'a. ¹² Ge', ngampun ta sara'-sara' kai, samu' kai uga ngampun ayo sok da basara ka kai. ¹³ Ge', iya' ta minsak kai ka sadatn pancobaan, tapi ngarapas ta kai umpatn da jahat. Karna Akupm ta Sang Umpu' Karajaan, ge' kuasa, ge' kamuliaan sampe salama-lama'a. Amin. ¹⁴ Karna sak imu' ngampun sara'-sara' sok laitn, Sama' surgawimu' uga ao' ngampunmu'. ¹⁵ Tapi ao'a, sak imu' kati' ngampun sara'-sara' sok laitn, Samamu' uga kati' ao' ngampun sara'-sara'mu'." Sikap waktu Bapuasa ¹⁶ "Ge', waktu imu' bapuasa, iya' sirum-sirum samu ge' sok munafik karna ayoa ngubah bahas'a supaya sok laitn mile' ni' agi bapuasa. Iko' muji' da sabanar'a ka imu' bahwa ayo'a laka kaatn upah'a. ¹⁷ Tapi ao'a, imu', sak bapuasa, gatn mangkabinyak ta abakmu' ge' me'et ta bahasmu' ¹⁸ supaya puasamu' kati' sok mile', tapi yak Samamu' da ani ka tampat da kati' tile'. Ge', Samamu' da mile' parbuatanmu' da kati tile' dakoh ao' mambalas'a ka imu'." Ngubu' ta Harta ka Surga ¹⁹ " Iya' nimbun ya' da adupmu' sadi' harta ka tana paitn, tampat bubuk ge' gagat marusak, ge' tampat parangko mambungkar sarta nangko. ²⁰ Tapi ao'a, ngubu' ta ya' dimu' sadi' harta ka surga, tampat bubuk ge' gagat kati' marusak ge' tampat parangko kati' mambungkar sarta nangko. ²¹ Karna ka dume hartamu madi', ka dakoh uga atemu' madi'. ²² " Matu anita palita ungan. Jadi, sak matumu' lamus, samaan unganmu' ao' jadi tarakng. ²³ Tapi ao'a, sak matumu' jahe, samaan unganmu' ao' panhu kagalapan. Jadi, sak tarakng da saharus'a ani ka imu' anita kagalapan, batapa kuat ata kagalapan dakoh." ²⁴ " Kati' ani sok da abak malayan dua tuan karna ini' ao' rusi' ka tuan da nyungan ge' sayang ka tuan da laitn, ato ini' ao' setia ka tuan da nyungan ge' ngaremeh da laitn'a. Imu' kati bisa malayan Jabata ge' mamon. "Iya' Imu' Kuater ²⁵ " Sabab dakoh ta Iko muji'ka imu', Iya' kuater manganai idupmu', jai da ao' imu' uman ato jai da imu' nyucur. Ladakoh uga manganai unganmu', jai da ao' imu' ngiak. Inya ta idup labih penting daripada pangkuman, ge' ungan daripada pangiak? ²⁶ Milek mih manuk-manuk da ka rangit da kati' mura, kati' manen, ge' kati' ngubu'a ka sadatn langko, tapi Sama surgawimu' mangkatn ayoa uman. Inya ta imu' labih bararga daripada ayoa? ²⁷ Asilah ka antara imu' da karna kuater abak nambah nyahasta ka umur'a? ²⁸ Ge', manganai pangiak, jailah imu' kuater? mampratilah bunga bakung ka taya udu, langkina ayoa makkat, ayoa kati' bakaraje ge' uga' kati' mamintal, ²⁹ tapi Iko muji' ka imu' bahwa Salomo sadatn samaan kamuliaan'a pun kati' bapangiak samu ge' salah satu umpatn bunga-bunga dakoh. ³⁰ Jadi, sak udu' ka taya udu', da ano diah ani ge' jakkap gatn nyangkahatn ka sadatn tungko api, Jabata ngadandan'a ladakoh tao', inyata imu' labih agi', hei imu' da kurang iman? ³¹ Karna dakoh, iya' imu' kuater nige' muji', 'Jai da ao' kai uman?', ato 'Jai da ao' kai nyucur?', ato 'Jai da ao' kai ngiak?' V 32 Sabab, bangsa-bangsa laitn marnajo samaan diah ge' Sama' surgawimu' pane bahwa imu' palalu samaan diah. ³³ Tapi ao'a, najota uru Karajaan ge' kabanaran-A, ge' samaan dakoh ao' gatn nambah'a ka imu'. ³⁴ Jadi, iya' kuater manganai ano da ao'a karna ano da ao'a ao' umpu kuater adup'a. Nyukup ta nyano nige' kasusahana sadi'.