¹ Ge', Yesus maba kadua balas murid-A ge' mangkat'n ayo'a kuasa ka samo roh-roh najis ya' nguser roh-roh dakoh ge' ya' ngangkawhat'n sagala macam panyakit maupun sagala macam pangkanap. ² Diahlah gaat'n-gaat'n kadua balas rasul dakoh: da partama, Simon da gat'n nyebut Petrus, ge' Andreas age'a, ge' Yakobus anak Zebedius, ge' Yohanes age'a, ³ Filipus, ge' Bartolomeus, Tomas, ge' Matius si pamungut pajak, ge' Yakobus anak Alfeus, ge' Tadeus, ⁴ Simon sok Zelot, ge' Yudas Iskariot da mangkhianati Yesus. ⁵ Yesus mangutus kadua balas rasul dakoh ge' marintah ayo'a, "Iya' anu ka pagala bangsa-bangsa lait'n ato maruh ka sadat'n kota sok Samaria, ⁶ malait'nkan anulah ka domba-domba da sasat umpat'n antara umat Israel. ⁷ ge', salama imu' anu, nyaritalah nige nyansana, 'karajaan Saruga agi riket.' ⁸ nyembuhkanlah da anap, ngiduplah da kabis, tahirkanlah da kusta, ge' nguserlah roh-roh da jahe. Imu' narima nige cuma-cuma, mangkat'nlah nige cuma-cuma. ⁹ Iya' imu' minsakng barawat'n, ato parak, ato tambaga ka sadat'n ikat pinggangmu', ¹⁰ ato tas ya' pajalat'n, ato dua halai baju, ato sandal, ato tongkat barang sok pangaraje pantas ya' pangkuman'a. ¹¹ Ge', wak kota ato desa dume pun da imu maruh, da nyalidik asi da layak wak sadat'n'a ge' madilah wak teet'n sampe imu' barangkat. ¹² Pas imu' maruh ramin dakoh, mangkat'nlah salam. ¹³ Ge', sa' ramin dakoh layak, kate'a dame sejahteramu' disah ka samo'a, tapi sa' kati, kate'alah dame sejahteramu' malik ka imu'. ¹⁴ Ge', asi saja da kati narima imu' ato kati ituh dangah parkataanmu', pas imu' mungkas umpat'n ramin ato kota dakoh, ngibaslah dabu kajamu'. ¹⁵ Iko' muji' da sabanar'a ka imu' kalo pas ano panghakiman, tana Sodom ge' Gomora aok labih bisa mananggong'a dari pada kota diah." Kasulitan-kasulitan da aok gat'n manghadap para Murid ¹⁶ "Ile, Iko' mangutus imu' ulah domba ka tuda-uda sarigala. Barang dakoh, jadilah cerdik ulah nipa ge' tulus ulah manuk marpati. ¹⁷ Tapi aok'a ati-atilah tradap ayo-sok barang ayo'a aok nyarahmu' ka Sanhedrin ge' aok nyambukmu' wak sinagoge-sinagoge ayo'a. ¹⁸ Ge', imu' aok minsakng ka tura para panguasa ge' para raja demi Iko', sabage kasaksian ya' ayo'a ge' ya' bangsa-bangsa lait'n. ¹⁹ Tapi, pas ayo'a nyarah imu', ikya' khawatir tentang langkina ato jai da imu' muji' barang saat dakoh uga aok mangkat'n ka imu' jai da harus imu' muji'. ²⁰ Sa', inya imu' da nyansana, tapi dakoh diu'ta Roh Bapamu' da nyansana wak sadat'n imu'. ²¹ Ayo age aok nyarah age'a ka sok da kabis, ge' sama' tradap anak'a. Ge', anak-anak aok malawan ayo sok dama ge' ngamis ayo'a ²² Imu' aok gat'n ngajahe uleh samaan'a barang gaat'n-Ko, tapi sok da batahan sampe akhir aok gat'n nyalamat. v 23 Pas ayo'a nganiaya imu' ka sadat'n sok kota, talamalah ka kota da lait'n. Iko' muji' da sabanar'a ka imu' kalo imu' kati aok salesai melewati kota Israel sampe Anak talino utukng. ²⁴ Murid kati malabihi guru'a, ladakoh uga hamba kati malabihi tuan'a. ²⁵ Cukuplah sa' murid jadi ulah guru'a, ge' hamba jadi ulah tuan'a. Sa' ayo'a nyebut tuan'a ramin dakoh Beelzebul, labih buruk agi ka angota kaluarga'a." Buutlah ka Jabata Inya ka Talino ²⁶ "Barang dakoh, iya' imu' buut tradap ayo'a sa' kati ani jai pun da tartutup da kati aok gat'n ngungkap, ato da basukat'n da kati aok gat'n pane. ²⁷ Jai da Iko' muji' ka imu' ka sadat'n patakng, muji'lah dakoh ka sadat'n tarakng. Ge', jai da imu' dangah barukup'm wak rajakmu', nyarita ta lah wak samo aro ramin. ²⁸ Iya' buut ka ayo'a da ngamis ungan, tapi kati kaat'n ngamis jiwa, malait'nkan tarlabih buutlah ka Ini' da kaat'n memusnahkan jiwa maupun ungan wak naraka. ²⁹ Inya'ta dua ungan manuk pipit gat'n nyual ya' nyiteng uang ? Ge', kati ani nyungan pun umpat'n ayo'a aok jantu ka tana wak sato kahendak Bapamu. ³⁰ Bahkan, abok ka abakmu' samaan'a taritong. ³¹ Barang dakoh, iya' buut, imu' labih banilai daripada karah manuk pipit." Ngako Yesus wak tura Sok Lait'n ³² "Jadi, satiap sok da ngako Iko' wak tura talino, Iko' uga aok ngako'a wak tura Bapa-Ko' da ani wak saruga. ³³ Tapi aok'a, asi da nyangkal Iko' wak tura talino, Iko' uga aok manyangkal'a wak tura Bapa-Ko' da ani wak saruga." Tujuan Pajutukng Yesus ³⁴ "Iya' bapikir kalo Iko' utukng ya' minsakng pardamean wak bumi. Iko' utukng inya ya' minsakng pardamean, malait'nkan padang. ³⁵ Sa', Iko' utukng ya' misah are-are umpat'n sama'a, kangot mahu umpat'n sino'a, ibat'n mahu umpat'n sino datu'a, ³⁶ ge' musuh sook diu'ta umpat'n angota kaluarga'a. ³⁷ Asi da labih nganyayang sama' ato sino'a daripada Iko'. kati layak bagi-Ko'. Ge', asi da labih nganyayang kangot are-are ato anak'a da mahu daripada Iko', kati layak bagi-Ko'. ³⁸ Ge', asi da kati maha salib'a ge' nganang Iko', kati layak bagi-Ko. ³⁹ Asi da mampartahankan nyawa'a aok kahilangan nyawa'a, demi Iko' aok kaat'a." Upah umpat'n Jabata ⁴⁰ "Asi da narima imu', narima Iko'. Ge', asi da narima Iko', narima Ini' da ngutus Iko'. ⁴¹ Asi da narima nabi ka sadat'n gaat'n nabi aok narima upah nabi. Ge', asi da narima sok taman ka sadat'n gaat'n sok taman aok narima upah sok taman. ⁴² Ge', asi da mangkat'n nyucur ka sara' nyungan umpat'n ayo-sok da inek diah maskipun hanya sacangkir pait'n panut ka sadat'n gaat'n sook murid, Iko' muji' da sabanar'a ka imu', ini' kati aok kahilangan upah'a."