¹ Laka dakoh, Yesus gat'n mimpin uleh Roh ka padakng balantara yak gat'n nyoba uleh Iblis. ² Ge', Ini' bapuasa ampat puluh ano ge' ampat puluh ngarum, ngalaka dakoh Ini' jadi saburuk. ³ Lalu, utuknglah ini', da nyoba dakoh, ge' nyansana ka Yesus, "Sa' Akup'm diu'ta Anak Jabata, marintahlah supaya batu-batu diah jadi roti." ⁴ Tapi, Ini' naham ge' nyansana, "Ani gat'n nulis, 'inya uleh roti saja talino idup, tapi uleh satiap firman da mungkas nabo baba Jabata.'" ⁵ Laka dakoh, Iblis minsakng-A ka kota suci ge' mana'-A wak puncak Bait Jabata, ⁶ ge' nyansana ka-Ini', "Sa' Akup'm Anak Jabata, nganjantulah adup-Mu' ka saroh barang ani gat'n nulis: 'Manganai Akup'm, Jabata aokn marintah malaikat-malaikat-A ge' majaka Akup'm wak samo barekng ayo'a supaya kaja-Mu' iya' manyandung batu."' ⁷ Yesus nyansana ka ini', " Sakali agi, ani gat'n nulis, 'Imu' iya' nyoba Tuhan Jabatamu."' ⁸ Sakali agi, Iblis minsakng Yesus ka samo gunung da aru nyamo ge' nyua'a ka-Ini' samaan karajaan dunia nige kamegahan'a, ⁹ ge' nyansana ka-Ini', "Samaan'a ini' aok Ko'mangkat'n ka-Imu', sa' Akup'm tasungkap'm ge' nyambahko." ¹⁰ Laka dakoh, Yesus nyansana ka ini', "Enyahlah Iblis! Ani tatulis, 'Imu' arus nyambah Tuhan Jabatamu' ge' ka-Ini' saja imu' sambayang."' ¹¹ Ngalaka dakoh, Iblis ngagat'n Ini', ge' milelah, malaikat-malaikat utukng yak malayani Ini'. Yesus Mule Palayanan-A wak Galilea ¹² Lalu, jangkah Yesus dangah kalo Yohanes laka gat'n nangkap, Ini' boho ka Galilea. ¹³ Ini' ngagat'n Nazaret ge' utukng gae madi wak Kapernaum, wak tabik timu', wak batas Zebulon ge' Naftali, ¹⁴ supaya gat'n nganganap nabo Nabi Yesaya: ¹⁵ "Tana Zebulon ge' tana Naftali, pagala timu', wak sabarang Yordan, Galilea, rapo ayo-sok inya Yahudi, ¹⁶ bangsa da madi ka sadat'n patakng mile Tarakng da aihyo, ge' bagi ayo'a da madi wak negeri ge' ka sadat'n bayang-bayang da kabis, Tarakng dakoh laka terbit. ¹⁷ Sajak waktu dakoh, Yesus mule bakhotbah ge' nyansana, "Batobatlah barang karajaan saruga laka riket!" Yesus Maba Ampat Murid-murid-A da partama ¹⁸ Jangkah Yesus bajalat'n wak tabikng timu' Galilea, Ini' mile dua baradi, diu'ta Simon da gat'n nyabut Petrus, ge' Andreas, age'a, sadakng munu pukat wak timu barang ayo'a diu'ta panjala ikat'n. ¹⁹ Ge', Ini' nyansana ka ayo'a, "Kaehlah nganang Iko' ge' Iko' aok jadimu' panjala talino." ²⁰ Ayo'a langsung ngagat'n pukat-pukat'a ge' nganang Ini'. ²¹ Ge', saat anu umpat'n teet'n, Ini' mile dua barade da lait'n, Yakobus anak Zebedeus ge' Yohanes, age'a. Ayo'a madi ka sadat'n nyabuah parahu samahu Zebedeus, sama' ayo'a, sadakng mamparbaiki pukat-pukat'a. Ge', Ini' maba ayo'a. ²² Ge', ayo'a langsung ngagat'n parahu ge' sama' ayo'a, lalu nganang Yesus. Yesus Ngajar ge' Ngangkawhat'n Sok Karah ²³ Laka dakoh, Yesus kalilikng ka samaan rapo Galilea, ngajar wak sinagoge-sinagoge ayo'a, nyarita Injil Krajaan, ge' ngangkawhat'n sagala macam panyakit, ge' sagala macam pangkanap'm wak antara sok karah. ²⁴ Ge', barita tentang-A tasabar sampe wak samaan Siria. Ge', ayo'a minsakng ka-Ini' samaan sok anap'm da manderita barbage macam panyakit ge' rasa anap'm ge' da karasukan setan, da anap'm ayan, ge' da lumpuh, ge' Ini' ngangkawhat'n ayo'a. ²⁵ Kakumpur sok da aihyo karah umpat'n Galilea, Dekapolis, Yerusalem, Yudea, ge' umpat'n pajah Yordan nganang Ini'.