¹ Ka ano-ano dakoh, muncol ta Yohanes Pembaptis, bakotbah ka taya udu Yudea. ² Ini' muji', "Batobat mih karna Karajaan surga agi jiket." ³ Sabab, ini; ta da nabi Yesaya muji' waktu ni' nyansana, " Saratn nyungan sok da ngampak-ngampak ka taya udu, ' Da nyiap ta gala ya' Tuhan, umas ta gala'-A tamut." ⁴ Ge', adup Yohanes ngiak pangiak umpatn burut unta ge' pantingo apakng umpan kurit gatn ngakilik apakng'a. Pangkuman'a anita buntak ge' madu tuatn. ⁵ Laka dakoh, ayo sok Yerusalem utukng wa ini' ge' samaan Yudea, ge' samaan rapo ka bagian Yordan. ⁶ Lalu , ayoa gatn ngabaptis ya' Yohanes ka Yordan, gae ngako duse-duse ayoa. ⁷ Malah, waktu Yohanes mile' karah ayo sok farisi ge' Saduki utukng wa' baptisan'a, ini' nyansana ka ayoa', "Imu' katuunan nipa babisa, asi da mamparingatmu' ya' boho umpatn pabaji' da ao' utukng? ⁸ Karna dakoh, ngasil ta buah da nyabanding nige' partobatan, ⁹ ge' iya' bapikir ge' muji' ka adupmu' sadik , kai nga ani Abraham, sama' leluhur kai, karna iko' muji' ka imu', bahwa umpatn batu-batu diah Jabata abak mangkidup anak-anak ya' Abraham! ¹⁰ Bahkan, mati' diah, kapak gatn ngamana' ka uhat pu'utn-pu'utn, ge' satiap pu'utn kayu' da kati' ngasil buah da bait gatn nabut ge' gatn nyangkahatn ka sadatn api. ¹¹ Sasungguh'a iko' mambaptis imu' nige' paitn ya' batobat, tapi Ini' da ao' utukng ngalaka iko' anilah da labih bakuasa daripada iko', da sandal'a pun iko' kati' patut minsakng'a. Ini' ao' mambaptis imu' nige' Roh Kudus ge' nige' api. ¹² Alat panayap ani ka barekng'a, ge' Ini' ao' marasih tampat pangihik-A, ge' ao' ngubu gandum'a ka sadatn langko. Tapi, Ini' ao' nyahung kalipe'a nige' api da kati' kaat gatn ngamis. Yesus Gatn Baptis ya' Yohanes Pembabtis ¹³ Laka dakoh, Yesus utukng umpatn Galilea ka Yordan wa' Yohanes ya' Yohanes baptis'a. ¹⁴ Tapi, Yohanes barusaha mancegah-A ge' nyansana, "Iko' ta da parlu gatn Mu' baptis , tapi justru da utukng wa' iko'. ¹⁵ Lalu Yesus naham ge' nyansana wa ' ini', "Mati', biar ta karna ladiah ta da saharus'a tajadi ka ite' ya' manggenap samaan kabenaran," Ge', Yohanes pun mambiar-A. ¹⁶ Ngalaka gatn baptis, Yesus lansong mungkas umpatn paitn, ge' mile' mih, surga tabuka ge' Ini' mile' Roh Jabata disah samu ge' manuk acang utukng ka samo-A. ¹⁷ Ge', dangah ta saratn umpatn surga da nyansana," Diah ta Anak-Ko da Ko nyayang, ka Ini'ta Iko bakenan.