¹ Mati', ngalaka Yesus gat'n baranak wak Betlehem, wak Yudea, pas zaman Raja Herodes, ilelah, ayo-sok Majus umpat'n timur utukng ka Yerusalem. ² Ayo'a mansikat'n, "Ka dume ta Ini', da gat'n baranak, Raja sok Yahudi dakoh? Barang, kai' laka mile bintakng-A wak timur ge' kai' utukng yak nyambah-A." ³ Jangkah Raja Herodes dangah hal diah, galisahlah ini' ge' samaan Yerusalem samahu'a. ⁴ Lalu, ini ngumpul samaan imam kapala ge' ahli-ahli Taurat bangsa dakoh. Ini' ngurek katarangan umpat'n ayo'a, tampat Yesus gat'n baranak. ⁵ Ayo'a nyansana ka ini', "Wak Betlehem, rapo Yudea, barang ladiahlah da gat'n nulis uleh nabi: ⁶ Ge', akup'm Betlehem, wak tana Yehuda, samu sakali inyalah da paling inek wak antara ayo panguasa Yehuda, barang umpat'nmu' muncol sook pamimpin, da aok mangambala umat-Ko', Israel."' ⁷ Laka dakoh, Herodes tunguh-tunguh maba ayo-sok Majus dakoh, mahi kapastian umpat'n ayo'a tentang waktu basinar'a bintakng dakoh. ⁸ Lalu, ini' ngadu ayo'a ka Betlehem ge' nyansana, "Anu ge' nyalidiknih nige taliti tentang Kangot dakoh. Ge', kalo imu' laka amput'-A, ngalapor ka iko' supaya iko' uga nyambah-A." V 9 Ngalaka dangah raja, ayo'a anu. Ge', ilelah, bintakng da ayo'a mile wak timur dakoh manuntun ayo'a sampe utukng ge' baranti wak samo tampat Kangot dakoh madi. ¹⁰ Jangkah mile bintakng dakoh, ayo'a basukacita da aru aihyo. ¹¹ Ngalaka maruh ka sadat'n ramin, ayo'a amput Kangot dakoh samahu Maria, sino-A. Lalu, ayo'a tasungkap'm ge' nyambah-A. Laka dakoh, ayo'a muka tampat-tampat harta'a ge' mampersambah hadiah-hadiah ka-Ini', diu'ta barawat'n, kamanyan, ge' mur. ¹² Barang gat'n mamparingat ka sadat'n samangat supaya iya' malik ka Herodes, ayo'a malik ka negeri'a nabo pagala lait'n. Parintah yak talama ka Mesir ¹³ Ngalaka ayo-sok Majus dakoh anu, ilelah, malaikat Tuhan nampak ka Yusuf ka sadat'n samangat ge' nyansana, "Umpatlah, minsakng Kangot dakoh samahu sino-A ge' talamalah ka Mesir. Madilah wak teet'n sampe Iko' nyansana ka imu' barang Herodes ngate najo Kangot dakoh yak mambinasa-A." ¹⁴ Laka dakoh, Yusuf umpat ge' minsakng Kangot dakoh nige sino-A pas waktu ngarum yak anu jauh ka Mesir, ¹⁵ ge' madi wak teet'n sampe Herodes kabis supaya gat'n nganganap da gat'n forman Tuhan nabo nabi: "Umpat'n Mesir Ko'maba Anak-Ko'." Pangamis Samaan Kangot Ayo-are wak Betlehem ¹⁶ Laka dakoh, jangkah Herodes mile kalo ini' laka gat'n mampardaya uleh ayo-sok Majus, ini' aru murka ge' marintah yak ngamis samaan kangot are-are wak Betlehem ge' samaan rapo wak sakitar'a, da baumur dua taun ka saroh, sasuei nige waktu da laka ini' pastikan umpat'n ayo-sok Majus. ¹⁷ Maka, ganaplah da gat'n nyampe uleh Nabi Yeremia: ¹⁸ "suatu sarat gat'n dangah di Rama, munse ge' ngaratap da aru sedih. Rahel ngawang anak-anak'a, ge' kati ituh gat'n ngahibur barang ayo'a laka ti'ani." Parintah yak kambali ka Israel ¹⁹ Tapi, jangkah Herodes kabis, ilelah, malaikat Tuhan nyua adup'a ka sadat'n samangat ka Yusuf wak Mesir, ²⁰ ge' nyansana, "Umpat'lah, minsakng Kangot dakoh nige sino'-A ka tana Israel barang ayo-sok da barusaha ngamis singat Kangot dakoh laka kabis." ²¹ Lalu, ini' umpat ge' minsakng Kangot dakoh nige sino'-A kambali ka tana Israel. ²² Tapi aok'a, jangkah ini' dangah kalo Arkhelaus marintah wak Yudea nganti Herodes, sama'a, Yusuf buut anu ka teet'n. ngalaka gat'n mamparingat ka sadat'n samangat, ini' anu ka rapo Galilea. ²³ Yusuf utukng ge' madi wak nyabuah kota da bagaat'n Nazaret supaya ganaplah da gat'n nyampe ayo nabi, "Ini' aok gat'n nyabut 'Sok Nazaret'."