¹ Ngalamanih kasih ge' gat'n ngate sungguh-sungguh karunia-karunia rohani, tarutama supae imu' kaat'n banubuat. ² Sabab, asi da nyansana ka sadat'n bahasa rata', kati nyansana wak talino, tapi wak Jabata; karna kati ani sok da ngarati, tapi ni' muji' hal-hal da rahasia sadat'n roh. ³ tapi, sok da banubuat nyansana wak talino yak ngalumpat, nasihat, ge pangibur. ⁴ ayo sok da nyansana ka sadat'n bahasa rata' ngalumpat adup'a sadi', tapi sok da banubuat ngalumpat jamaat. ⁵ Iko' baharap imu' sama'an nyansana wak sadat'n bahasa-bahasa rata', tapi ngarabeh agi sapa'e imu' banubuat. Sok da banubuat rabeh aihyo' umpat'n sok da nyansana wak sadat'n bahasa rata', kacuali kalo' ni' uga ngarati'a singga jamaat kaat'n nganarima paneguh. ⁶ Ayo age, kalo iko' utungk' ka imu' ge nyansana ka sadat'n bahasa-bahasa roh, jai untong'a ka'imu, kacuali kalo iko' nyansana kaimu nige kanyata'a, kapane'a,nubuatan, ato pangajaran? ⁷ Bakan, barang-barang da kati banyawa, samu' suleng ato kacapi da ngamungkas sarat'n, kalo kati ngamungkas ngalait'n sadat'n sarat'na, langkina sok ka'atn pane alat jai da jangkah gat'nmain, suleng ato kacapi? ⁸ Ato, kalo tarumpet ngamungkas sarat'n da kati jalas, asidu' da aok' nganyiap adup yak baparang? ⁹ Ladakoh uga imu'. kalo nige rata'Mu, imu' mangucap sarat'n-sarat'n da kati ka'atn gat'n ngarati, langkina sok pane jai gat'n nyarat'n? Saolah-olah imu' ngansana wak udara. ¹⁰ Mungkin, ani ladakoh karah jenis bahasa wak dunia ge' kati nyitengpun umpat'n'a da kati bamakna. ¹¹ Barang, kalo iko' kati pane arti bahasa dakoh, iko' aok jadi sok asing umpat'n ini' da nyansana, ge' sok da nyansana dakoh jadi sok asing bagiko'. ¹² Damikian uga imu', karna imu' sungguh-sungguh barusaha ya' karunia-karunia rohani, barusahanih supae bakalimpahan ya' ngalumpat jamaat. ¹³ Karna dakoh, hendaklah sok da nyansana wak sadat'n bahasa rata' badoa supae ini' kaat'n ngarati'a. ¹⁴ Sabab, kalo iko' badoa ka sadat'n bahasa rata', rohko' badoa, tapi pikiranko' kati barubah. ¹⁵ Jadi, jailah da harus iko' bulah? Iko' aok badoa nige rohko' ge' iko' uga aok badoa nige pikiranko'. Iko' aok ngado nige rohko' ge' iko' uga aok ngado ge' pikiranko'. ¹⁶ Sa' imu' hanya mangucap syukur nige rohmu', langkina sok, da ani ka sadat'n posisi kati umpu karunia dakoh, kaat'n bakata, "Amin," ka samo ucapan syukurmu' dakoh karna ini' kati ngarati jai da imu' muji'? ¹⁷ Nyakalipun imu' mangucap syukur nige bait, tapi sok lait'n kati gat'n ngalumpat. ¹⁸ Iko' basyukur ka Jabata kalo iko' nyansana ka sadat'n bahasa-bahasa rata' labih dari imu' samaan'a. ¹⁹ Barang, ka sadat'n jamaat, iko' labih bait nyansana lima kata nige pikiranko' supae iko' uga kaat'n mangajar sok lait'n, daripada sapuluh ribu kata ka sadat'n bahasa rata'. ²⁰ Ayo-age, iya' jadi ayo-kangot ka sadat'n pikiranmu'. jadilah bayi-bayi ka sadat'n pamikiranmu' jadilah dewasa! ²¹ Ulah gat'n nulis ka sadat'n Hukum Taurat, "Uleh ayo-sok da umpu bahasa asing ge' uleh baba ayo-sok asing, Iko' aok nyansana ka bangsa diah, tapi ayo'a kati aok dangah Iko', firman Tuhan." ²² Jadi, bahasa-bahasa rata' diu'ta tande, inya ya' sok da kati pacaya, tapi ya' sok da pacaya. ²³ Sa' saluruh jamaat bakumpul bariuh ka sadat'n tampat, ge' samaan'a nyansana nige bahasa rata', lalu ani ayo-sok da kati ngarati ato ayo-sok kati pacaya maruh, kati'ta ayo'a aok muji' kalo imu ngalaka gila? ²⁴ Barang, sa' samaan'a ba'nubuat, lakadakoh ani sok da kati pacaya ato sok da kati ngarati maruh, ini' aok gat'n nyadar uleh samaan'a. ²⁵ Rahasia ka sadat'n ate'a aok nyata, ini' aok tadungkop, ge' nyambah Jabata, ngako' kalo sasungguh'a Jabata ani wak antara imu'. Atoran-Atoran ka sadat'n badaput Jamaat ²⁶ Jadi, salanjut'a langkina, Ayo-age? sa' imu' bakumpul, masing-masing umpu mazmur, pangajaran, panyataan, bahasa rata, ato nyabuah panafsiran. Kate'a samaan diah gat'n bulah ya ngalumpat. ²⁷ Sa' ani da bahasa rata', kate'a hanya dua ato paling karah taru ungan, ge' masing-masing sacara bagantian, ge' harus ani sok lait'n da ngarati'a. ²⁸ Barang, kalo kati ani sok da ngarati'a, ini' harus tunguh-tunguh ka sadat'n jamaat ge' kate'a ini' nyansana ka adup'a sadi ge' ka Jabata. ²⁹ Kate'a hanya dua ato taru nabi da nyansana ge' da lait'n mampartimbang'a. ³⁰ Barang, kalo sa' panyataan gat'n bulah ya' sok lait'n da unyung ka dakoh, sok da partama harus tunguh-tunguh. ³¹ Sa', ayo kup'm samaan kaat'n banubuat nyiteng demi nyiteng, supae samaan'a kaat'n balajar ge' samaan'a kaat'n gat'n nguat. ³² Roh-roh para nabi tunduk ka para nabi. ³³ Sa' Jabata inyalah Jabata umpat'n kakacauan, malait'nkan dame sejahtera, samu ulah ka sadat'n samaan jamaat ayo-sok kudus. ³⁴ Mahu harus tatap tunguh-tunguh ka sadat'n jamaat karna ayo'a kati gat'n ngizin ya' nyansana, malait'nkan harus tunduk sebage'ume Hukum Taurat uga muji'a. ³⁵ Sa' ani sasuatu da ngate ayo'a palajari, kate'a ayo'a mansikat'n ka banun'a wak ramin karna diu'ta hal da manyangun mangkat'n mahu ya' nyansana ka sadat'n jamaat. ³⁶ Jai'ta firman Jabata brasal umpat'n imu? Ato, jai'ta hanya ka'imusadi firman dakoh gat'n nyampe? ³⁷ Sa' ani da bapikir kalo ini' diu'ta ayo sook nabi ato sok da rohani, kate'a ini' nganal kalo hal-hal da iko' nulis ka'imu diu'ta parintah Tuhan. ³⁸ Sa' ani sok da kati nganal diah, ini' kati gat'n nganal. ³⁹ Jadi, Ayo-ageko', da ngusahalah nige sungguh-sungguh ya' banubuat, ge' iya' mingat sok nyansana ka sadat'n bahasa-bahasa rata'. ⁴⁰ Barang, samaan'a harus gat'n bulah nige sopan ge tarator.