¹ Sak iko' kaatn nyansana sadatn saratn-saratn talino ge ayo malaikat, tapi kati' umpu kasih , iko' anilah agong da mihu ge' canang da kareng-kareng, ² Sak iko ani karunia ya' nyampe saratn Jabata ge' pane samaan rasia ge, samaan pangatahuan , ge sak iko' umpu samaan iman ya' nginsit gunung-gunung , tapi sak kati' ani umpu kasih, iko kati' ani jai-jai'a. ³ Sak iko' mangkatn samaan hartako' ya' mangkatn uman ka ayo sok papa, ge' nyarah unganko' ya' gatn nyahung, tapi kati' ani umpu kasih, inik-inik kati' ani gune'a ka iko'. ⁴ Kasih dakoh sabar ge' murah ate, kasih dakoh kati' camburu, kati' nganinggi adup'a, ge' kati' sumbong, ⁵ kati' umas da kati' patut, kati' najo kapantingan adup sadi', kati' gampang baji', kati ngitong sara sok laitn, ⁶ Kati' auhatn mile' da kati' taman, sabalik'a auhatn sak ani samahu ge' da taman. ⁷ Kasih dakoh tahan nanggong sagala jaipun, pacaya ka sagala jaipun, mar baharap ka sagala jaipun, ge' sabar nanggong sagala jaipun. ⁸ Kasih dakoh kati' suah abas. Malah, sak ani nubuatan-nubuatan, ao' gatn katigiani, sak ani saratn-saratn, ao' gatn nyatop; ge sak ani pangatahuan, ao' gatn ngalanyap. ⁹ Sabab, ite' pane nyabagi jak ge' ite' nyampe nubuat nyabagi jak. ¹⁰ Malah, waktu da sampurna utukng, da nyabagi dakoh ao' gatn ngalanyap. ¹¹ Waktu iko' agi kangot, iko' nyansana ulah kangot, iko' bapikir ulah kangot, ge' baritong-itong ulah kangot. Waktu iko ngajadi dewasa, iko ngagatn hal-hal da samu kangot dakoh. ¹² Karna mati' ite' mile' sadatn caramin nige' cara da ti' awas, tapi lakadakoh bahas ge' bahas. Mati', iko' hanya pane nyabagi, tapi lakadakoh iko' ao' nganal sapanhu'a, ulah iko' uga laka gatn nganal sapanhu'a. ¹³ Jadi, mati' dataru hal diah da tatap madi', dakoh ta iman, pangharapan, ge' kasih; tapi da paling ayho umpatn da taru'a anilah kasih.