(Walri Yei Gubernur Pilatus Kena Bukoune) ¹ Nepe denembute neyowe, metelrena atung (ayeko) semana detelro pelre dasi-dasina detelro pelre a mbeite doukaye walri yei te note tonaipondena. ² Nemenakaye, walri yei te bekaipeko, nepelre doukainelre, Gubernur Pilatuste yaye taimbuko. (Yudas Nenei Eute Note Topuko) ³ Nepelre Yudas, walri yei pelre ikimelrena teyowe walri yei douku, ne kenate tuwayowe nepelre 30 keping perak te ayeko semapelre nekayena detelro pelre dasi-dasina detelro pelrete dite ikemelre, ⁴ Ne elriyowe, "De pekote dina mekopukalre, nepelre sa nikimbainyate tamupukalre. Nemekaye ne nete saniyanye. De wembelrena a kalromena ambai, nelrena wei bulramona. ⁵ Nemanakaye, Yudas ne doite timbelre yowe ongko miyete esute yaye, nemenakaye ne nete temupuko. Nepelre, ne yowenakaye nenei eute sanebokenelre. ⁶ Nemenakaye, belrengka atung sema pelre nekayena detelro ne doite yetai pekonakaye elriyaye. ⁷ Nemenakaye, ne nembeye ne doitenate tiyeikeko, ne epe kembalri pelre mekowena detelro kena kanite doiye dowkayenakaye, nenoute mekaimbekona detelro basulrena netena bulte. ⁸ Nemenakaye, ne kanite pekainelrena "saa pelrena kani" meyowe menayate. ⁹ Nepelrenakaye, Nabi Yeremia kena a elreyowena (saneyomuna) nepe noulre mekopuko. Nemenakaye, ne dobe membelpelrena keping perakte (doite) yetaipeko. Nelrena nekewena nenei iute naite mekombondena tena, nepelre nena dina Israel detelro apelre elriyayena. ¹⁰ Ne dombei mebe pelrena keping perakte doukayenakaye, epe kembalri pelre mekowena detelro kena kanite doiye doukaye, nena nekewena Mang Walri wai dina sanemupukona. (Walri Yei Pelre Gubernur Pilatus Pelre) ¹¹ Nepelrenakaye, walri yei Gubernur kena bukoune tepeyowe, nepelre Gubernur nete simiyonu, beyamane we kaye Yahudi detelro kena belrengka? walri yei ate sauku, "wembelre elrauwena a, nena noulrena nepe ¹² Nepelre, nete atung sema pelre nekayena detelro pelre, dasi-dasina detelro pelre ate nena bulra mote elriyayena. Ne abetemena sawipai. ¹³ Nemenakaye, Pilatus nete saneyounu, "Beyamane, we kaye betoipai, detelro dopelre bete we motena ate elraiye. ¹⁴ Nemenakaye, walri yei Pilatus tena a betemena sawipai, nepelre a busi-busi bulruyayena mbeiska betemena a sawipai, nemenakaye Gubernur kembengte bitiyowe. (Pilatus Walri Yeite Baite Tanembondenate Bete Dembuko) ¹⁵ Ya delre mewena, Gubernur detelro dopelrete baite taumu (tayomu) tahana na detelro nembelre kena pelre dainena detelro. ¹⁶ Ne selreina, nena tahanan na detelro delremane nekeyowena, nena eudo Barabas. ¹⁷ Nepe, detelro dopelre kopriyonu, Pilatus nete simyomu, we kenate danuna sinte de baite tetembonde. Barabas tetaye walri yei te Kristus te simanyena? ¹⁸ Nepelre, Pilatus dina nimeyembuko nepelre yembe delrore walri waite nena mebulrane selraipeko (ikaimelre) ¹⁹ Nemenakaye, Pilatus a pelre tayena kursi bulrane nekeyowe. Nena nembilre nekote ate mekopuko meyowe, "Ne poi detelro tena kembalri sisitena mekoipainya. Nepelre de pekote dopelre bete eimi bulrune menaya tepukalre. ²⁰ Nemenakaye, atung sema pelre nekayena detelro pelre dasi-dasina detelro pelre, Barabs te detelro dopelre diyiyaye, nepelre wali yeite tonaipondenate. ²¹ Gubernur nete simiyoumu, da detelro beselrei, menaye we kenate danuna de baite tatembonde. Ne ate saniyanye, "Barabas te". ²² Pilatus nete saneyoumu. Nemenatena, walri yei Kristuste paununa de netena beyamane mekotembonde. Ne emukuna mane ate elriyaye. Nete kainone bekembombe. ²³ Nemenakaye, Pilatus simiyoumu, Benyamane? Ne kaye beya kembalri pekote mekoyowe? Nepelrenakaye, ne alrate alrema telre seyaye, " Nete onone bapembombe." ²⁴ Nepelre Pilatus teyowe ne kembalri si bete mena pelre mekoipai, nepe peko kiyapuko, ne bute doukunakaye nenei mete sukupuko, nakaye detelro dopelrei kena bukoune saneyoumu, "Da detelro kena sa bulratena de peko tena ambai" Nelrena wei kembalri. ²⁵ Nepelre, emukuna detelro ate saukaye. Nena saa elena bulrate nepelre dena yeinining kena bulrate. ²⁶ Nemenakaye, Pilatus Barabaste baite tembuko, nepelre Walri Yeite tombak ye nekaye, nakaye Pilatus nena mebulrate ikemelrenakaye nete kainone bepaipeko. (Pilatus Kena Pelra Yo Walri Yei Te A Kaita-Kaitate Saniyainye) ²⁷ Nepelre, Gubernur kena perayo walri yei tedoukainelre Gubernur nekewena markaste yayenakaye Romawi kena pelrayote emuku koprimupuko nete antunainkeko. ²⁸ Ne Walri yei kena mayote baite dowkaye nepelre Jubah beru-berute nete titaimbeko. ²⁹ Nepelrenakaye, mahkota syesye pelrenate nembeye mekaimbeko, walri yei kena belrengkane pelraintiki, nena metelre mesune suru pote ikainelre, nepelre nete sesoyu tupuyanye. Nepelre nete a busi-busi saniyanye. Nete saniyanye, "Yahudi detelro kena belrengka wai poi." ³⁰ Ne nete eki toyanye, ne suru te doukaye nakaye nena belrengkani peniyaye. ³¹ Nemenakaye ne nete a busi-busi te saniyanye, ne walri yei kena mayo belru-belru te baite doukaye, nepelre nakaye nenei mayo telrete titaimbeko, nepelre nete doukainelre yayenakaye kai none bepaipeko. (Walri Yeite Onone Bepaipeko) ³² Nepelrenakaye, ne pelrayo diyate miyaye, ne detelro do mbeisika Kirena renate tupeyekainelre nena eudo Simon. Ne Simonte paksa diyanyeng walri yei kena salibte elrentindenate. ³³ Nemanakaye, ne nepe nou site yaye nena eudo Golgota eudo si nekewena "Tempat Tengkorak". ³⁴ Ne nete anggur empedu pelre nembeye bulraimbekonate nete anen sindenate nemenakaye, douku tuwambeko ne nete embulrune anen sindenate ate seyoumu. ³⁵ Nepelre ne walri yeite onone bepaipeko nena mayonte wasiyaye nepelre nena nelrone undi te yelroyaye. ³⁶ Nepelrenakaye, ne nepene nikiyaye, nete semote nikiyaye. ³⁷ Nepelre, nena belrengkabulrane, netene semo tuduhan melraipekona "Delrena Walri Yei, Yahudi Detelro Kena Ondewapi." ³⁸ Ne suselrei lati, detelro beselrei pekote mekoyoyena late Walri Yei pelre onone nembeye bepaipeko, simbei metelre mesune simbei milri mesune. ³⁹ Nepelre, detelro ditelrate walriyayeng nete a peko-pekote saniyanye, nepelre sesote baibaite salriyoye. ⁴⁰ Nemenakaye, saniyanye, we Mang Walri wai kena ongko miete baite dingkereponde, nepelre ya namingnane nekoute poiye melrouponde, bei bete wei poi mekoyenone wei Mang Walri wai kena yei tena ne onolre ate osunde. ⁴¹ Nemanelati atung sema pelre nekayena detelro, mendona-mendona detelro, nepelre dasi-dasina detelro pelre walri yei te akaite-kaita te teyiyanye, nakaye nete saniyanye, ⁴² Ne detelro site poiye mekoyomu, nepelre ne nenei eutena poiyena mekoipai. Nepelre ne Israel kena ondewapitena, da suselrei lati onolre ate mendenate de telrepelretena elre maponde. ⁴³ Ne Mang Walri waite telrepelrete elrewena, beibete da su selrei lati, Mang Walri wai nete poitute inenelre, nena nekewena walri wai elrembondenate. Nenei mote dina saneyomuna, "De Mang Walri wai kena yei. ⁴⁴ Peko pelre mekoipekona detelro nembelre nembeye onone bepaipekona lati nete a kaita-kaitate saniyanye. (Walri Yei Tete Te Douku) ⁴⁵ Ne yepona, su mesi sunambei pelre, neko dupuko nekani pote muku pelrembuko nepelre su mesi kilrimbeiye yowe. ⁴⁶ Nepe su mesi kilrimbeite yowe, walri yei ate delre nyapeyowe, "Eli, Eli, Lama Sabokhtani?" Nena akalro sinekewena, "Dena Mang Walri wai, dena Mang Walri wai" beyamenapote we dete tetepuke? ⁴⁷ Nepelre, si nembelre nepene tipiyayena, ne nenate betaipeko, ne elriyaye "Da detelro Eliate simewe. ⁴⁸ Nemenakaye, simbei nena nelrolre tenuyowe, bunga karangte douku anggur petena yawusuku, nepelre sulrune bekepukonakaye Walri Yeite inenelre anensindenate. ⁴⁹ Nemenakaye, si elriyaye, membe e temalre, beyamane Elia mende nete poiye mekonembonde. ⁵⁰ Nepelre, Walri Yei nekenoute lati ate alrematelre sepukonakaye nepe nena walrite ikemelre. ⁵¹ Nepelrenakaye, tiyaye ongko miena mayong waweyowena nelrolre baite tekakuko, bulralre meyowe anatune tambuko, nepene kani dalreyonu, olru belra-belra bisiyaye. ⁵² Bulre dopelre bete tuwuyaye, nepelre detelro poite pelre mekoyayena dina titiyaye nepe deyiyaye. ⁵³ Nepelre, nena bulre bulrulre baite (kiyate) miyoye, walri wai deyepukonalre, ne ya melro-melro esute yayenakaye nena eute detelro dopelre kilriyaime. ⁵⁴ Nepelrenakaye, pasukan belrengka nepelre ne nembelre nembeye Walri Yei te semate nikiyayena ne kani tupuyo nunate tiyanyena nepelre, nena sasasi mekoyowena, nepe endikite deko yayenakaye elriyoye, noulre, ne nekewena Mang Walri wai kena yei. ⁵⁵ Nepena, milre-milre dopelre bete bainye tipiyaye tiyaime, Walri Yei pelre Galileare tawkainelre, netena kembalrite mekoyaye. ⁵⁶ Nena nelrona Maria Magdalena, Yakobus pelre Yusuf pelre kena nenag, nepelre Zebedeus yeinining kena nenang. ⁵⁷ A nepe neko duyowe, detelro sa dopelrena Arimateerena nena eudo Yusuf meyowe, ne delrati Walri Yei kena ototouna. ⁵⁸ Ne Pilatus kote yowe, nepelre Walri Yei kena diyiyowe. Nemenakaye, Pilatus sanemupuko Wali Yei kena eute Yusuf te ikainalre. ⁵⁹ Nepelrenakaye, Yusuf walri yei kena eute douku, mayon linen melro-melro telre nete dulrusuku. ⁶⁰ Nepelre bulre wanimpane sasuku, nenei telre, meko olru pelrenane dina wepuko. Nepelre, Yusuf olru delre simbeite bulrunsuku meyowe bulre kena memautute tituku nepelrenakaye ne dite yowe. ⁶¹ Nepelre, nenoune lati Maria Magdalena pelre Maria si pelre ne bulre bulrane ni kiyoye. (Walri Yei Kena Bulre Te Semate Nikiyaye) ⁶² Ya sina kaye, Sabat tena yate pendalriyaye, imam-imam belrengka pelre Farisi detelro pelre Pilatus kena bukoune koplriyonu. ⁶³ Ne saniyanye, Tuan, de mendo neme mekande, nepelre, ne aupew pelre dununa detelro, walrite neme nekeyowena. Ne dina saneyoumu. De deyetepondena lati. ⁶⁴ Netenate, sanemuponde ne bulrete semate nekenaye mende ya namingte, sate nena ototouna menaye bisi saunaiponde, nepelre detelro do pelrete sanenaimelre, ne dina deyepuko detelro titiyayena nelrolre. Nepelre, aupew kalro tutena nekewena pekotelrena ⁶⁵ Pilatus nete saneyoumu, " we sema pelre nekayena detelro pelrena embe, we nimeyanunamane sematena nemane nekembe. ⁶⁶ Nepelrenakaye, neyayena kaye regu sema pelrena pelre nembeye bulrete semate nikiyaye, nepelre olru mau pelre dinaipeko-nate segelte mekaipeko.