(Kelrai Yesus Te Tonai Nate) ¹ Nenadelrati Yesusmetelrena da a' nepete mekopukom nenei murid-murid kote ne saniyomu. ² We' nimeiyambuko nenaye be delrati Paskah tena, nepelre detelro yei te inaimelre salib tenate. ³ Nemandelrati, imam belrengka selrai pelre yalrise-yalrise yo nembei kopilriyo nu imam delre nena istane ne, nena eudo Kayapas. ⁴ Nepelre, neboyowe nena Yesus te kelronaina da apeuw-peuw kalrone nepelre ne'te tonaipone. ⁵ Nenate ne' elriyaiye, nemenatena da Perayaan ya nenate detelro telreng nelrone a'te numbonde. (Milre Si Yesus Te Kelrombuko) ⁶ Menana, nena Yesus Betania ne nepene, Simon si kusta kena miene, ⁷ milre si ne kote miyowe nena botol guci pualam kiya mbei minyak wangi ne eine nenatena mahal doplre, nepelre ne'milre Yesus kena belrengka bulrate dilrimbukom nena ne' ane nekeyowe sa te aneyowe. ⁸ Nenate murid-murid tiyaine, ne ate olrupuko nepelre elriyai, beyamena potenate damena sewa tekowe? ⁹ Nemenatena, minyak wangi nena naite mekopou nena doi delre nepelre sayesi mbaina kote yatenemelre. ¹⁰ Nenate, Yesus, ne hal te nimeyembu ko, ne' kote saniyomu, beyatena te we da milre te sete tamu? Nenatena ne' Poi te De'na bulratena te mekowe. ¹¹ Nenatena, we' detelro sayesi mbaina wenane wembelre nembeine nemamo, nenatene we' de tena nemenatena ambai. ¹² Nenate da milre minyak wangi te delrei euw bulrate dilripuko, ne mekopukona nenatena de' te sanaite sine delrati penda irewe. ¹³ De' nena nolruna we'kote seamote nenate monoune da dunia metelre da Injil te sanainemlre, beyasa da milre nepete mekopukona neme dite elrenaiye nenate ne te mendote neme. (Kelrai Nena Yesus Te Yekotinaina) ¹⁴ Nenadelrati, me be beslrei nenalrena si mbei nena euwdo Yudas Iskariot, iman-iman belrengka kota yowe, ¹⁵ nepelre saniyomu, we' nena de' kotena beyate itimbe nenatena ne we kotenade itimelre? ¹⁶ Nepelre, ne' selreine, ne' kalro Poi ulreyowe nena Yesus te uninemelre. (Paskah Tenah Sa) ¹⁷ Menana, nena ya bei tena Roti Ragi mbaina murid selrai Yesus kote miyaiye nepelre simiyaine, mopene we'na kenane Paskah sate we'tena de' pendalremalre? ¹⁸ Yesus sauku, kota te esute, detelro si kote, nepelre ne' kote sanembombe, Guru elreyowe, nenei selrei nepe nopiyewe, ne' Paskah te wena miene nenei murid-murid nembei mekonaina. ¹⁹ Murid selrai ne' kote Yesus sanempukona mane nemane mekoyaiye, nepelre pendalri yaiye Paskah tenate. ²⁰ Menana dena selrei te yowe, Yesus nena murid mebe beselrei nembeine aneni kiyai sa te aniyaiye. ²¹ Nepelre, sa te aniyaina selreine, ne saniyomu, de nolruna we' kote senamalre nenate wenalrena si mbei nalre konde de' te yekotinde. ²² Nena kena bete - bete tuwa yaine nepelre detelro mbei-mbei nepete ne' kote saniyaine nemena, ambai de, Tuhan? ²³ Nepelre, ne sauku, ne teuw eite de mbelre nembei me te ninsindena, nena ne de te yekontindena, ²⁴ Detelro yei nena ende ne'tan tena nepete melroyaiye. Nemandelrati, ne detelro pekotelre, nena irena detelro yei te yekotiyowe! Nenatena poi tena ne detelro nena ne' te senai paina ne. ²⁵ Nepelredelrati, Yudas nena Yesus te ininemelrena, ne' kote saniyoune, Rabi, nemena mbai de? Yesus ne' kote saniyoune, we nena nepete dombuke. (Kristus Kena Sa Pelre Euw Nenate Oyote Meinainelre) ²⁶ Nepelre delrati nena ne' sate aniyaiye,Yesus roti te doku. Nepelre berkat te ne bulrate tapepuko, nete beseyowe nepelre murid-murid selrai ne' kote yatiyomu nepelre saniyomu, dowe nepelre anewe dalrena delrei euw. ²⁷ Nemandelrati, Ne' teuw-teuw te doku, mendo te tapepuko, nepelre ne' kpte ikimelre, Ne' saniyomu, we' metelre, dalrenalre anembe. ²⁸ Nenadelrati, dalrena delrei sa' sa' yeko tena, ne dilrimbondena nena detelro telreng tena nena pengampunan dosa tena. ²⁹ De' we' kotena senamalrena nena de' nekoutena anggur no'lrena eu antesine nena wembelre nembei ye delrei memai kena kerajaan eine. ³⁰ Nenate dimisemo simbei dimaipeko, ne' zaitun meko te yaiye . ( Petrus, Yesus Tena Apeuw-Peuw Te Denenelrena) ³¹ Nenadelrati Yesus nenei murid-murid kote saniyomu, we metelrena nalrekombe De' tang tena da deneye. Nenatena da melroyaiye, De' nena gembala te pentelre, nepelre domba-domba nenalrena dite date tanaikone. ³² Nenatena, nepete De' deyetepone, De' we' nalrena memete Galilea telre, ³³ Petrus saniyonu, dambei mo metelre olrunainkone we' tan tena, de' olrunaingkondena ambai. ³⁴ Yesus, ne' kote saniyonu, De' we' kotena nolrunate senamalre nenate da dene tena awe a' mekoipainane, We' De' tena da naming apeuw-peuw te dunulre. ³⁵ Petrus Ne' kote saniyonu, Dambei mo de mbelre we mbelre nembei tetalre, de' we' tena epeuw-peuw duwipai! Metelre na murid nena delrati nemena hal mo te elri yaiye. (Yesus Getsemanine Mendote Mekoyowe) ³⁶ Nemandelrati, Yesus, nenei murid-murid nembeinenenou nena euwdo Getsemani nepene okokai nepelre, Ne' nenei murid-murid kote saniyomu, danoune anene kembe, de dipete telre nena mendo mekotolrena. ³⁷ Nepelre, ne Petrus pelre Zebedeus kena yei be nembeine ne yatekemelre, nepelre nepene nenei kena selreng nepelre bete- bete tayaiye. ³⁸ Nemandelrati, ne' ne kote saniyomu, dena kena selreng tuwanalre, dite tetepoina mane tuwanalre. Dapene nekembe nepelre noune sema-sema pelre dembelre nembei. ³⁹ Nepelre, ne tiki bete mane yowe, nenate aneyowe dusungkuko nenei be ane kanine neke nepelre mendote mekyonu, Ne' nenei memai te saniyonu, nemenatena, neisandu da teuw-teuw denalre neme dite ende. Nenate de' nalrena nemenatena ambai, nemenatena neisandu we'nalre na dumbonde. ⁴⁰ Nemandelrati, Ne' meyowe nenei murid-murid kote nepelre ne' te tupeyekemlre nena kutetenoyaiye. Nenate Ne' Petrus kote saniyonu. Damane, we semate na ambai dembelre nembei su mbei mane? ⁴¹ Sematena mendone, nenate, we sapiyame wapi-wapi eite delrembe, Roh nena ako-ako nenate eu endung wake mbai. ⁴² Yesus nekaoute dabetena te yowe nepelre mendote mekoyowe, ne saniyonu, delrei memai, nenatena dalrena baite naipai nena de neme antesine, nenatena we' nalrena neme dite dumbonde. ⁴³ Dambei delrati, Ne' meyowe nepelre ne' te tekemelre kute tenoyaiye nena ne' na douw se te tuwayaine. ⁴⁴ Nenate, ne ne te tumupuko, nepelre ne nekoute yowe, nena da naming tena mendote mekoyowe,nena nemena a' mote saniyonu. ⁴⁵ Nemandelrati Yesus nekoute bulrusuku murid-murid kote nepelre saniyomu, daselrei kute tenombe nepelre noteyembe. Tembe yaselrei nepe nopiyewe nepelre detelro yei detelro berdosa kena me bulrate inaimelre. ⁴⁶ Yemimbombe, membe e' malre. Tembe detelro de' te inimelrena nepe nopi yewe. (Yesus Te Kelrokai) ⁴⁷ Yesus neme a te elreyowe, Yudas, simbei murid mebe bepelre nena meyowe. Nembeine nena ne'mbelre, detelro telreng delre nelrone nena meteka nepelre, nena imam belrengka yalreseseyo nena. ⁴⁸ Menana, ne Yesus te inimelre ne' te nouwte san sinde, elreyowe sime nena de' senetenelrena, nena ne, ne te kelroumbe. ⁴⁹ Yudas selraimbei Yesus kote tike kenelre nepelre elreyowe, Poi, Rabi! Nepelre Yudas ne'te senembuko. ⁵⁰ Yesus ne'te saniyonu andewa, wena mendo miyena dite mekoiyi. Nemanendelrati detelro telreng nenai nopite, Yesus kote mete sana sini nepelre ne'te kelronaina. ⁵¹ Nepelre, timboi, simbei Imam delre tel pendenate, nepelre nenei buntekeite ketepuko. ⁵² Nemandelrati, Yesus ne' te saniyonu. Wei meteka te dite noune, nenate metelre nena meteka te tapenaina nena meteka ne peko olrunaiye. ⁵³ Ambai, we na mendo de' yelrikopai delrei memai kote diyitenelre, nepelre Ne' da yane delrati, De' tena mebe be kasopelre malaikat pelra selrai inimelre? ⁵⁴ Nemena, beyamane nemandelrati semo melro-melro nena yuwumbone nena elriyaiye nenatena neme olrumbonde? ⁵⁵ Ne daine, Yesus detelro telreng kote nena te saniyomu, beyatena damane bisite titimbe we balrekau nena meteka pelre pentung nena de' te kelroumbe? Yane yane, Allah kena mie de' ongkinalre kilra malre nepelre we'nena de' tena kelroipai. ⁵⁶ Nenatena da metelre dumbonde nemena semo nabi selrai yuwumbonde. (Yalrise Yahudi Selrai Yesus Te) ⁵⁷ Ne' nena Yesus te kelrokai ne' te Kayafas kote dokainelre, sang imam delre, nou ahli-ahli taurat selrai pelre yalrise-yalrise selrai nembei koplrimbiyowe. ⁵⁸ Nenate, Petrus Yesus te bailre tawukunelre neme imam delre mie halaman. Nepelre, Petrus esute ongkike pengawal selrai nembei nena tutenate tenembonate. ⁵⁹ Menana, yalrise imam selrai nepelre Sanhedrin metelre kesaksian a puw-puw kalrone ulreyaiye Yesus tenate ne'te tete te donduna. ⁶⁰ Nenatena, ne' nena tupei pai nemandelrati saksi epwue-peuw telreng nena miyaye. Nepelrena, da detelro be nena miyoiye. ⁶¹ nepelre elriyoiye, da detelro elriyouwe, De' Allah kena miete bulrutepone nepelre ya'naming eine nekoute nena te emitenelre. ⁶² Nemandelrati, imam delre esuyamuku nepelre Yesus kote elriyowe, we' a tena sawipai? Nemena da detelro- detelro we' tena saksi? ⁶³ Nenate, Yesus ambai nepelre imam delre nena Yesus kote saniyonu, De Allah nena walri wete a' sete titau tepone nena we de kote sanumulre, nemena we' nena Mesiah, Allah nuwei? ⁶⁴ Yesus, ne' kote saniyonu, we'mbei nepete nena te dombuke. Nenate, de' we kote senamalrena nenate daselreine we' nena te tenembe detelro yei yang Maha Kuasa nena me metelre su ne ongkinde, nepelre ma bulrane mangkone mende. ⁶⁵ Nemandelrati, imam delre nenei mayong te besepuko nepelre elreyowe, ne nepe kaita teiyowe! Beyasa bete nena saksi selrai? Tembe, menaya we' nenei kaita teiyowe nepete betauwe. ⁶⁶ Beyamane we' na tiyekombena? Yahudi belrengka selrai nena saukaiye, ne' nena tete te dondu. ⁶⁷ Nepelredelarati, Ne'na be'te ekitoyaiye, nepelre ne te piniyaiye, nepelre, nena si ne'te puniyaiye. ⁶⁸ Ne' saniyaine, nubuat bei de' kotena, hei Mesias, nena sime we'te penewe?(Petrus Nena Yesus Tena Tuyipai) ⁶⁹ Menane, Petrus diyane baine ongkike nepelre pelayan milre mbei ne' kote miyowe nepelre saniyonu, we' dana delrati Yesus Galilea detelro pelre nembei. ⁷⁰ Nenate, Petrus ne' metelre na bukoine a' peuw te diyomu, elriyouwe, ambai de; nimeipai we; nena beya elrauwe. ⁷¹ Nena Petrus gerbang maulre diyate, pelayan milre si delrati ne'te tumbuko nepelre detelro nena nepena kote saniyomu, da detelro Yesus Nazaret irena nembelre membei. ⁷² Nepelre, dambei tena Petrus nena apeuw nepelre sebete a'taupuko, de; ne detelro tena nimeipai. Tiki mbai nenate, detelro nena nepene tipiyai Petrus yene nepelre saniyaine, we delrati dana si mbei nenalrena we' na te mekouna kiyatelre. ⁷³ Tiki mbai nenate, detelro nena nepene tipiyai Petrus yene nepelre saniyaine, we' delrati dana si mbei nenalrena we' na a' we ' te mekouna kiya telre ⁷⁴ Nemandelrati, Petrus nekoute mengutuk nepelre bersumpah, elriyouwe, de' ne detelrotena nimeipai. Nepelre nena awe do ate mekopuko. ⁷⁵ Nepelre, Petrus Yesus kena a te mendo te mekombuko, manimba awe do a mekoipainane, we; da naming selrei de' tena apeuw-peuw te dunulre. Nemandelrati, Petrus diate nepelre kena te tuwayonu dimi te dimiyowe.