(Belrang Nena Mendo Mbaina Pelre Nena Mendo Pelrna) ¹ Nenadelrati, kerajaan surga tena amendo nenatena belrang me be nena nenei pelita pelre yetaipeko nepelre yaiye mempelai de te tupeinainate. ² Mesi nena nelrolrena nena mendo mbai, nepelre mesi si nenatena mendo pelre. ³ Nemandelrati mendo baina nenei pelita mote yatiyai minyak nembei tena ambai. ⁴ Nematena mesi mendo pelrna nenei minyak ongkoi eine nembei pelita pelre yatiyai. ⁵ Nepelredelrati, mempelai do ne mendena neme wapeyowe, ne' metelre kundouw dokumelre nepelre kute tenoyai. ⁶ Nenate, deneye nelro te a seplro te seyaiye, mempelai do mewe! Balrembe ne'te doumalre. ⁷ Nepelredelrati, ne belrang metelre yamaipeko nepelre nenei Pelita te mekoyai ye. ⁸ Nepelre, mendo mbaina nena mendo pelrna kote saniyaime, De' kote wena minyak te bete yamulru nena e' na pelita kepenaipone mane. ⁹ Nepelredelrati mendo pelrena nena saukaiye, Ambai, we mbelre dembelre nenatena elrikoipai. Nolrunua ne' minyak nai kote embe nepelre wei euw mbei tena tembe. ¹⁰ Ne' minyak tite na nepete yaiye, mempelai do nena miyowe, nepelre ne' nepete dunaimbekona,nembelre ne bei esute me'te yatenaina yau eite, nepelre mau dite dinaipeko. ¹¹ Nepelre delrati, belrang si nepe miyaiye nepelre saniyaine, Tuamai, tuamai! Tena mau te tuwisime. ¹² Nenate ne'ye sauku, nolruna de' we' kote santemelrena de' we' tena nimeipai. ¹³ Nepelre delrati, sema-sema pelre nena ya, selrei nenate we' nimeipai. (Amendo Belrengka Naming Netangtena) ¹⁴ Nenate kerajaan surga nemenatena detelro si yo yo basute te endena, nenei baba te simiyomu nepelre nenei sayesi ne'kote yatiyomu. ¹⁵ Detelro simbei ne' kote na talenta mesi ikinelre. Si kotena nena talenta be, nepelre si kote na, talenta mbei. Ne' mbei-mbei nenei wake selreine. Nepelredelrati, ne' yowe. ¹⁶ Detelro talenta mesi te dokuna nena nepe yowe, nepelre ne talentate kewalreyowe, nepelre ne' mesi ne bulrate epnepuko. ¹⁷ Nemandelrati detelro talenta be; dokuna, ne' talenta be nebulra te apenepuko. ¹⁸ Nepelre delrati, detelro talenta mbei doku nena yowe, ambulru te kani ne wepuko, nepelre nenei tuamai kena doi ne yeine nalrumbuko. ¹⁹ Tiki telre wande, ne hamba-hamba nena tuamai meyowe nepelre nembelre nenate beyowe. ²⁰ Detelro doi mesi doku nena meyowe nepelre doi mes apnepukona nepelre doku,ne' elreyowe tuamai, we' de' tena doi mesi ikete. Timboi, doi mesi de' nebulrate apnepukalre. ²¹ Tuamai ne' ne' te saniyonu, piyambai telre, hamba piyambai nepelre suwe telre, we' suwetelre da hal- hal kiya, de' we' tena hal telreng bulrate ketuisine esute tuamai kena kalri eite. ²² Nepelre, detelro doi be yatepukona nena meyowe nepelre saniyonu, Tuamai de' tena doi be' yatekete. Tumboi doi be de' nebulrate apenepukalre. ²³ Tuamai ne' sauku, piyamba telre, hamba piyambai nepelre suwe telre. We' suwetelre nena hal-hal kiya, de' we' tena hal telreng bulrate ketuisini esute we' na tuamai kena kalri eite. ²⁴ Nemandelrati, detelro nena doi mbei yatepukona meyowe nepelre saniyomu,Tuamai de' we; te nimeyanalre detelro alrema, pilripaina noune we' nenate olriye, nepelre sa nung tikilri paina noune we' nenate koplri yene. ²⁵ Nemenate, de' endikite dekokukalre, nepelre yalre we' na doite nepelre kani eine nalrumbukalre. Timboi, beya sa we' na mekoute weite alrimbonde. ²⁶ Nedelrati, tuamai ne' sauku nepelre ne' kote saniyonu. We hamba jahat nepelre akoimbana! We nimei te de' pilripaina noune de' nenate olralre nepelre sa nung tikilripaina noune de' nenate koplrinalre. ²⁷ Nemenatena de' na doi we' bank ne saseme nenate de' bulrisi, de' apnaipukona nenate de' na menate nekoute doiyi. ²⁸ Ne' nalrena doi mbeite dowembe, nena doi me'be apnepukona nepelre ne'kote inimbe. ²⁹ Nenate detelro mbei-mbei nenei mena nekoute yatenainelre, nepelre nena kemenenelre, Nenate, detelro nemena ambaina, nemandelrati, beyasa nenei mena baite yatenaiye. ³⁰ Hamba nombai nate neko bulrutelrete yepombombe. Nenoune da dimi kulrung pelre eti te asaiye. (Detelro Yei Nena Penghakiman) ³¹ Nenate detelro yeiye mende nenei kemuliaan eine, nepelre nenei malaikat selrai nembeine,nenate nenei tahkta kemuliaan ne' wonkinde. ³² Metelrena bangsa nenei benne kopilrinenelre, nepelre ne' nenate mbei ne' nalrena te elrinate, gembala tenamane dombate kambing kenalreelrinde. ³³ Nepelre, nenei domba -domba te ne' na metelre mesune tenembone, nepelre kambing te milri me'sune. ³⁴ Nemandelrati raja nenei metelresuna ne'kote saniyomu, membe, we' berkat delrei memai kena yati youmna memetelrena duniakerajaan dunuyouna we' dowembe. ³⁵ Nenate de nomine, we' de' te sate yetatu anipalre. De' bu' malritena nepelre we bu'te ikoutu ansisukalre. De' yo ai detelro tenamane, nepelre we' de' te esute doukatelre. ³⁶ De' mayong mbai nepelre we' de te mayong te titi yautu. De' sa' ne nepelre we' de' te tiyatu. De' ongko ne tiyatiki nepelre we' de koto miyauw. ³⁷ Nenate, nolruna detelro de' te nenate saunaiye, Tuhan, modaine e' tiyande we' monine nepelre we' te sa' te yatiyanewelre aniye, mbai bu malrine nepelre bute yatiya nemelre anusuke? ³⁸ Mo daine de' tiyande we' yo' silrena detelro mane nepelre we' te estue dokanewelre, nenadelrati mayong mbai nepelre we' te mayong te miyande? ³⁹ Mo daine de' tiyande we' sa' ne nena ongkone nepelre de' we' kote miyande? ⁴⁰ Raja nenate sauku, De nena nolrunate we' kote senamalre beyamane we' nenate mekombe delrei dokeka sipelre-sipelre tena nena kiya telre tena, we' de' tena nepete mekoyai. ⁴¹ Nemandelrati, Ne' nenate nenei milri me'suna nate sanenemlre, delrei belre dapelre baite embe, we kutuk te yatiyaiuna, sing sena eite Iblis pelre nenei malaikat-malaikat nenate dunu yaimena. ⁴² Nemandelrati, De' monine nepelre we' de' tena sa antelrena yatipai. De' bu' malri nepelre we' de' tena bu' antesine yatipai. ⁴³ De' yosi detelro tenamane we' de' tena esutena dowipai, mayong mbai nepelre we' de' tena mayong titipai, sa' ne nepelre ongko ne, nepelre we' de' tena itipai. ⁴⁴ Nemandelrati, nenei nenate saunaiye, Tuhan, modaine de' we' te tiyande monine mbai bu malrine, mbai yosi detelro mane, mbai sa' ne, mbai mayong ambai, mbai ongkone nepelre we'tena dikipai? ⁴⁵ Nemandelrati, Ne' nenate ne'kote sawende, De' we' kotena nolruna te senamalre, beyamane we' nenatena mekoipai simbe ne' nalrena kiya telre tena, we' de' kotena nenatena mekoipai. ⁴⁶ Nepelre, ne' dalrena penghukuman sena eite naiye, nenate detelro nolruna walri sena eite.