(Walriyei Depuko) ¹ Sabat nepelrenakaye, ye manimba beseyowenane, ne minggune Maria Magdalena pelre Maria sipelre bulre bulrate yaye doute tenaimbonde nate. ² Nepelre, tiyaye kani delre telre dalre yomuna, nepelre malaikat Tuhan walri yolre ate meyowe, nepelre ne olrute bulrunsuku. Nepelre ne nebulrane nekeyowe. ³ Nena be elri tena mane yateyonu, nepelre nena mayon kelreu-kelreu wau tena mane. ⁴ Nepelre, ne nete enadikite dekaikeko, semapelre tipiyayena yo titeyaikeko nepelre detelro neotemane. ⁵ Nemenakaye, nena malaikat ne milre-milrete sameyomu. Endikitena dikoipainya. De nimeyembukalrena we Yesus salibne bepai pekonate duwewu. ⁶ Ne dapena ambai. Ne nepe deyepuko. Nena ne dina saneyomu. Membe, nembelre tenoyowena noute tenembombe. ⁷ Selraimote embe nena ototounate senemembe ne dina deyepuko. Ne detelro soweyowena nelrolre dina deyepuko, nepelre tembe ne Galilea te memetelrete embe. Dipune, we netelati tenembombe. Tenembe, de wete dina saniyamalre. ⁸ Nepelre, ne selrai-selrai mote bulrete taimbeko, indikite dekaikeko, nepelre kalrite koyaye, tenuyaye ne ate nena ototounate saniyaime. ⁹ Nemenakaye, tiyae Yesus nete kote miyaye nakaye saneyoumu, "Pooi" nepelre ne Yesus nete tupeykemelre nena otote kelroukaye nepelre nate belrengakye (sesoye) tupuyanye. ¹⁰ Nemenakaye, Yesus nete ate saneyoumu, " Endikite dekoipainya : Embe dena dokekate sanemembe Galileate aye, nepene ne dete tenai telre. (Bulre Sema Nikiyayena Sente Mekai Peko Ate Anepelrenaipondenate) ¹¹ Ne suselrei ne yaye, sema pelre nikiyayena detelro kote yaye, nepelre atung semana detelrote saniyaime nekalro mekopukonate. ¹² Nemenakaye, nete dasi-dasina detelro pelre nembeye kopraimepeko. Ate tiyayena kaye, ne doi dopelrete dasi-dasina detelrote yatiyaime. ¹³ Nemenakaye, elriyoye, "Elrembe, Yesus kena ototouna deneye miyaye, de kute neme tenoyandenane ditesewaipeko. ¹⁴ Da kalrote Gubernur betombondena de nete telrepelrete elremaponde nepelre wetena poitena elripaiye. ¹⁵ Nepelrenakaye ne nedorite yataipekonakaye, ne dina sani kilri yaimena mane mekoyaye, nepelre ne a saniyai mena Yahudi detelro kena nelrolre meyowe menayate.(Yesus Kena Ate Sanemupuko) ¹⁶ Nepelrenakaye, nena ototouna, mebe mbeipelre Galileate yaye, ne mekone Yesus nete dina sanmupuko. ¹⁷ Ne nete taimbeko, nete sesoyutupuyanye. Nepelre, detelro meselrei netena telre pelretena elripai. ¹⁸ Nepelrena kaye Yesus meyowenakaye nete saneyoumu, emukuna delrepo dete nepe iketelre, walri yona pelre yo bulrana pelre. ¹⁹ Netenate, embe nakaye emukuna bangsate ototouna mane mekombombe, nete bute kelromembe, memai kena eu done, nepelre yei, nepelre alru melro-melro kenalre. ²⁰ Nete kilrimembe dena a saniyamalrenate betonaye, nepelre tembe, de wembelre nemena mote nekemalre ende kelra tute mekonde.