¹ We ye armapunue we na a te arma tere sanumue tetero de tere deda yasu dua werainya nena damba seiyune.nederaitie dekoi dekoi nero ne awa mane dua werainya awa te da tarumu we ye a te sanumue sekro da te brang brang da te wei do keka yei meke mane kenai. ² Mire bra deda de tere wei nawa mane da wande mire brang brang we na meto po bra ne nei wa neki merembipeinya. (Mire do bainya mire ne na wa te werai) ³ Nemane dekoi dekoi nero ne mire do bainya mire te dekomende. ⁴ Nemane mire do bainya mire beisika nena yei yoti memete na ne nei mie neropa dou te da tenaipine nai nenang te awa nawa te kenewa te pepoi tere da mekonaimie ne nei wa ne damena a yeko waro Awa mang tetero ne ye kena te keu na. ⁵ Mire do bainya mire si ne wai ne nei wa bei te kene na Awa mang tetero kna damba ne na yereu te mendo te kerone dai deneng mendo na kembari te da mekone. ⁶ Mire do bainya mire ne na yereu sasyaisi tereng nero ne nou pa dua da dunumbuku keu,nederaitie nemena yereu ne ye dua da no teteupuku. ⁷ Da a te da sanemende mire do bainya mire nena damba da seiyinende wa te nourue nourue warenai nemane. ⁸ Tetero si ne wai ne nei do keka kna yei te poi na mekonipei ne na mie nero na yereu metere peko tere dambe ne da kenai.damena yereu da tetero ne na mendo eiyo ambai tere da waru na. ⁹ Mire do bainya mire ne na mai tereng do naming serei semo kepei pa da merenaipinie ne na do nembro beisika tere, ¹⁰ Mire do bainya mire ne na kembari pepoi da mekeyou yei bra te natiyou,mie pa da daniyou,oto te da sikiyoumue mromro dambere do keka yei meke mendo eiyo ne beisika tere,tetero si te ne na yereu kiki nero ne kainya te baya da tumusuku da werai ne yo seraibra ne nei kembari pepoi te da mekonainya te da werai. ¹¹ Baya baipa sisimende mire do bainya mire brang brang da metere semo kepei pa na wado tena mereipenya mire brabra ne na wa ne do wambo biri nene kaimie keneng mendo te da mekonene.nemane ne mire bra ne nei wa te baipa baya da menai nedo Kristus kna yau nero re do si kwa derenainie ne te da orunai. ¹² Ne yo ne mire bra ne na temayansine nedo Kristus kna buru ne me te kiyainya damane ne nei wa damba peko tere yeko waro te da tikanainie. ¹³ Tetero si kna mie pa eiyu pa bai pa da warenai diwa dewa dou tenaimie yau te da kenai nemena da mire bra yau ne kwa na waripei moi moi ye da werai tetero si ne na a te da ourai ne nei a te na mane da seiyainie werai nou keipei. ¹⁴ Damane de ye da derane ne mire do bainya mire bra brang brang da ne kwa do te ourunai kenai.nederaitie ne na yei te da seno nai ne nei mie nero ne wa te sema te da kenai.damane tetero si te a ye da wapenaimie nemena wa te da warenai e na damba a te senenaimie wado poi te peko te da seiyinainie. ¹⁵ Nemane mire do bainya mire bra si derou mo serei bete meto pa dewa da biraisiki yereu nipi dua da neraipiki sekai iblis te tawe kainie werai setan setan tetero sekai bra. ¹⁶ Tetero yei si do mire da a yeko waro te arombuku nemeimbuku ne nei mie nero ne mire do bainya mire si kene na,nederaitie ne ye ne mire kna damba dou te da tenai nepere jemaat yau nero pa na o se mena ambai.damane wande jemaat yau nero ne dou te da tenai mire do bainya mire soiy nene werainya te atonaimie meka pepoi tere (Penatua serai brabra ne na kembari dambe ne) ¹⁷ Penatua seraibrabra ne na kembari pepoi nero ne da warenai mekonai ne te damane dekoi dekoi da de konaimie da biserei da.nemane ne na a kembari te da mekai khotbah a te da senaimie a yeko waro te da kiraimie. ¹⁸ A sena semo kepeinie da a te da meraipiki lembu kna emburu te we ye nebei pa tawukrone masupune dunupune kene nemane da ne ye sepo te sa te neme da anu na te da mekombunue kene.nemane deraitie da kembari tetero ne nei doi dera waro te meka pa da ourunai.'' ¹⁹ Penatua tetero beisika serei we na damba tepo te da kene ne ne nemena a waro te dou dou ye tenainya tetero biserei naming serei pa menai kene. ²⁰ Kembari peko te mekainya seraibra te tetero meye na nero ne we ye a ye masummue tetero si dekonai krone peko mekoipei. ²¹ Awa mang tetero pere yei Yesus Kristus pere Malaikat seraibra ne nei te dua da erupuku werai de ye we na damba a te da senawe damena a yeko waro te pepoi tere da tepu mendo dua dewa si bete mena ne mane ambai mekonipei. ²² We ye neso neso meka pare te da tepumue tetero yei si ne wai ne na tenai dambe ne da.tetero si kna peko mekainya damba we te da donai wenai wei wa te sema te da keu mromro dambe ne waru. ²³ We ye bu kreu kreu bei te na anipeinya nederaitie anggur bu te ne damba da danupune nemane we na wa kani kani da wariye wei wa ne wa mare mare mane armaipipei. ²⁴ Tetero yei mo serei ne na peko tua tere bekou pa dewa sisaipiki me kai nepe te dou dou da tainie ne a te da seiyinainie a yeko waro ne da nemane deraitie tetero yei mo serei ne na peko ne nei wa buru ne meto sure da kiyapuku dewa meke keu. ²⁵ Nepere nemane kembari pepoi ne ye kiya pa da kiyambine dou dou ye da tenainie damane da kembari te na mekoipipei wande da a yeko waro te na a seiyimbipei wande ne a yeko waro ye na nemena keipei,nemambei da kene mene yoti kasi yepe yupu didi mang damba,A-I-U Awa mang tetero ne na damba ne ne nou ne dia ne yo kiya pa mane A-I-U nene.