¹ Nederaitie Aru Roh a yo mire a te da kiya tere da sanumue.tupu te na ya be pa na ya dewa menena da tetero yei ne nei mendo eiyo te da baya peko sua sarenaipine warenai ne na wa te aru roh roh tetero sekaibrabra dambere ne kembari te da mekonai. ² Ne yo ne na a peupeu karo ne da wepaimie nemena nero ne da werai,ne na sengking smo te wa pa da tikeipiki werai. ³ Nemane ne yo a te da derainie do mire meka te na atoipeinya nebei na keipeinya ne yo ne ye a te da derainie Awa mang tetero ne ye da munu sa te da mekoupuku na anipeinya nepe na ye da tetero yei ne munu sa te ourunai anenai pepoi a te da merenaine ne nei wa ne dua da arambiki nemeiyambiki tepereinya dambe ne yereu te da warenai. ⁴ Nemane da sasyaisi metere Awa mang tetero ne ye dua da mekoupuku na munu sa peko bete mena nepe na ambai damane pepoi a te da seiyimane ne te dua da doma na te, ⁵ Metere na mane mromro tere Awa mang tetero nena a sena Firman dua da mekoupuku (Ne do Kristus Yesus ne nei kembari tetero pepoi) ⁶ Nemane da a yeko waro te eiyei do keka yei meke nero pa da sanemende we nederaitie ne do Kristus Yesus yei yarise ne nei kembari tetero pepoi tere ne ne wari ye na wei wane mendo eiyo pepoi tere damena a te dua da aroupuke ne dambe ne da wariye. ⁷ We na wa te bainie da waru a wapi wapi maya bete bete wei kene wa serong te baya da sarupunue nederaitie wei wa te wei wa bei ye mekoupunue yereu mendo eiyo kembari dambe ne. ⁸ Da wama karo ne we na yereu ne bete tere nene.nederaitie mendo eiyo kembari waro a yeko te dua da keroupuku da yo dambe na yereu pere yansi te na yereu nounue neme da kene na pere. ⁹ Damena a yeko tepereinya pepoi tere wei mendo ne eiyo ne da kene mene. ¹⁰ Nepe na ye e na kembari meka kori tere da tepa te nounue da derane te.e na yereu po wake tupu Awa mang tetero ne na yereu dambe ne da keu.A-I nedo nena yereu dambe ne e da tetero yei meye na mane yereu pepoi damba.ne yo seraibra te mende be te da ne nei wa ne dua da arambiki werai. ¹¹ A-I nedo nena a kirine a yeko waro te da kirimende sanemende poi tere donai warenai. ¹² Tetero yei si ne wai seiyinene we mere tere ne wai yei sekro neme da wariye.nederaitie we na wa te tetero de tere mane da waru nepe te arombuku nemeimbuku da a yeko waro te we na wa wariye mromro dambe ne kena bise ne nemambei neme da wariye. ¹³ Nemane deraitie de ye dewa da mete na we nounue neme da keu a sena semo kepei te da beu ne dambere a yeko waro kiya pa da menai ne te kurumue ne te da sanumue. ¹⁴ Nemane we ye seiyune damena karunia rohani te neme da tembuke keu wena damba da meke a yeko waro ne nubuat dambere penatua seraibrabra meka pare tenai dambe ne buna ne tepe nawipine. ¹⁵ We ye dou te teu metere na mane we ye ne na yereu nero ne da waru nepere we na kembari te mekou na kiya tere orumbine da tetero yei meye na damba na te. ¹⁶ Nemane wei wa te sema te da keu.nemane deraitie we na kembari mekeye na te da sema te da waru neme na beitie nounue kenai neme da kene.damena kembari dambe ne wei wa te pepoi dambe ne waru nemane deraitie tetero yei wena a te da betainya metere ne na yereu pepoi dambe ne.