¹ Damena a yeko waro kembari nourue na tepereinya nepe.damane da tetero yei ne na kembari dambe ne be mane jemaat yau nero ne ne nei kembari pepoi te da mekone na.'' ² Nemane sa te na te jemaat yau nero ne be mane da warene na tetero,nena wa sipi tere da warene nemane do nena mire beisika serei,da kembari ne nei wa buru ne aru poi mekone dekoi dekoi waro ne yau te beyine a te da saneneme kirineme, ³ Nemane bu ani ani anipeinya,ne na arma seiyinipeikena teme ye kanikani a prapra te na ambai doi dera kena keipeinya tetero yei. ⁴ Nemane tenai tetero mane awa mane mie nero ne da keu mire te yei bra te pepoi atoneme menai da yereu nero ne yei bra dekoi dekoi dambe ne. ⁵ Damane da tetero yei ne nei mie nero te na kembari pepoi na mekoipei,beamane ne ye Awa mang tetero nena yau mie ne kembari te pepoi jemaat yau nero ne mekone? ⁶ Nemane ne da tetero yei ne ye neperei eiyupa tawekeme jemaat yau nero pa,ne nei wa te kake mane da akau te sisinene wande nedo sekaiyei iblis nena wa eiyu ne wa buru ne da kene ne na kembari te mekone te sema te da kene. ⁷ Ne na wado poi nemane yau de tere nero ne wande jemaat yau nero ne tetero yei si ye ne te a ye da senenainie wapenainie tetero sekai iblis nena kembari te mekonainya. (Nemane deraitie diaken syamaset mire bra ya nero ne) ⁸ Nemane deraitie diaken syamaset mire bra ne nei wa te da pepoi nourue warene dekoi dekoi dambe ne ne na a te na peu kai bisereinya pa ambai,anggur bu kena dereinipei wande doi dera waro te ne temberari na mekoipei oripei. ⁹ Nederaitie ne nei wa buru ne a yeko waro te da sema te da kenai tepereinya mendo eiyo dambe ne da ne nei kena ne mro mro tere da kenainya. ¹⁰ Nemane da ne mire bra ne nei wa ne metere dua da nepe te tikanaipine,ne na wa ne nou peko mena bete keipeinya te ne te jemaat yau nero pa da ourunaipine da kembari te mekonai diaken. ¹¹ Nemane diaken mire brabra ne nei kena ne dekoi dekoi nero ne wa te da warenai damane a kroi kroi mena a te na ambai seiyinipei,nepe te da aramipiki ne na kembari pepoi te mekai. ¹² Nemane syamas diaken do bra mire bra ne nei wa ne da do beisika serei mire beisika serei da ne na yei brabra te a te da kirinaimie ne nei mie nero ne. ¹³ Damane ne yo neye nena kembari te pepoi dua da mekai ne nei mendo ne eiyo ne ne dambare nedo Kristus yei yarise Yesus nena dambe ne da yereu werai. (Awa mang tetero ne na wa buru ne e metere da) ¹⁴ Nemane de ye damane da semo pa metere da mereya wena nero pa de ye derane dewa mete we te dou tetempine we na yau nero ne we kwa da mete na we Timotiuswai. ¹⁵ Damane de ye merase bete neme da warete na nepe te we ye wei wa ne dua da arombuke da tetero yei ne na yereu tupu ne nei wa Awa mang tetero ne na damba da koupurumbuku kai ne nei yei brabra da jemaat yau nero ne da werai Awa mang tetero ne na dambe ne o yereu dinding mane da suwe tere da tepenai damena tepereinya dambere nounue da kene mene na. ¹⁶ Tepereinya a yeko waro ye ne keu na e na damba da dewa meke:''nepere nemane A-I nedo neye ne nei wa te kiya pa dewa da meke da tetero yei wa ye da ourupuku waru,nederaitie Aru Roh a yo mire ne nei tepereinya dambe ne A-I nedo ne ye ne nei wa te da kiya pa dewa do deko meke nemane malaikat dero seraibrabra ne na wa nero ne da waru damena a te da senaimie yo sero seraibrabra damete ne yo Awa mang tetero tena aroipei da werai.''