¹ Po ung, webang Sabat, Yesus kekapa kele lehe gandum. Bang ing teangku-teangku-Keke gandum to narang-rang ung tewu notete tejo-tejo, katetang e. ² Teba Farisi narang-rang tejeng,'' Jatuko ewe janoing ele jaing peana noing eleleka bangwe Sabat?'' ³ Yesus lungte te pikele, ''Ewe elukana poing Daud ke pa teba kepa telupa teheki, ⁴ Poing tunane ke kengti Tata Paake, hang ong kewe hang ong ing kekang, kaung keleleng teba-teba kepatepa telupa jaing tetang-tangka,pe tebafa imam tefa? ⁵ Kaimpa, Yesus lungte teba-teba Farisi, ''Keba Ko keing Tata eti bang Sabat.'' Yesus Kelepate hae po Bang Sabat ⁶ Po bang Sabat weweing, Yesus keti sinagoge pa jakenalung. Jeng ing kebaung keno keke nonalo pe. ⁷ Ahli-ahli Taurat pa teba-teba Farisi luto tejajimo Yesus jaungka Keleko hae bangwe Sabat, tepitewa ko peana pihupe teteKe. ⁸ Peing, Yesus kelu ja tehueng e. Ke lungte keba nope ing, ''malung pa meruru langhou.'' Kaimpa kebaing kekalung pa keru fua. ⁹ Yesus lengte tewe, Niwe lengte ewe,jaha ewe jano elele minggu bang; jano efeng na jano feng? Lengtung jeng efeng kewewe feng kewewe?'' ¹⁰ Kepupa kekaleng tutu ing, te bapa, Yesus lengte keba no pe ing, "Noka mepute." Kaimpa, kebaing no keke kewe lute kehae. ¹¹ Anaing-angra, teba-teba Farisi pa teba-teba ropo Taurat fojang tewe pi po tela pa tete telu pitete ja tete Yesus. Teba Hampa Rasul Kele ¹² Wakotu bang-bang ing-ang, Yesus keeti heng ko lupompong kelele le, pa kefua Ke lupompong kele kote Tata rapang eteing. ¹³ Febang fetanghapa ing, Ke lungko teangku-teangku Keke pa teba hampa tererete teba wa tewowo ing-ang, peing teba-teba teing tenie rasul: ¹⁴ Simon keingra bati tefa ''Petrus'', Andreas joke Petrus, Yakobus, Yohanes, Bartlomeus, ¹⁵ Matius, Tomas, Yakobus oke Alfeus, Simon era tenie keba Zelot, ¹⁶ Yudas oke Yakobus, pa Yudas Iskariot keing ketihe teba feng. Yesus JanoKe ¹⁷ Poing Yesus pa tebafa keke terape, Ketiru jeng ing jitafa. Pa, tete-Ke teba fanana tepa teba faungtela teangku Keke teja jeng ing tupa Yudea, Yerusalem, Tekaja bangte kota Tirus pa Sidon. ¹⁸ Teba nawo tetele lala Yesus pa ne tete toto tete haee. Pa, teba-teba tebate feng-feng heteme neing tera hae. ¹⁹ Teba nawo tera ena ne tete tere najang-jang Yesus ana ja efeng wa Ke kengte pa teba nawo ing tene hae fata. ²⁰ Yesus kalengna teangku-teangku-Keke pa pikele, ''Mawe kelete epa neba ja paka peing ana ja nene ing Tata PaaKe. ²¹ Mawe kelete epa neba ung-angwe huki epanewe hulang. Mawe kelete epa ung-angwe fu netenete fangpo rau nenanate. ²² Mawe kelete epa neba kebaung me jangkefa, meba tobe,meba jaka, Ana ing-angra bati meme tetupa piteete pete kotu Keba Ko . ²³ Ewe nakae bang ee tetetu, pa eepaee ewe nakaee jana ee bapale wo etu surga; Ana ing-angra jobe tete terate teba nabi. ²⁴ Ana ing-angra,eba feng ana ing-angra eba japa era jana efeng ewewele. ²⁵ Ana ing-angra eba ung-angwe hulang Ewe hukikitu. Epane neengkoko ung-angwe raupa wakotu lupongpa pa fu. ²⁶ Epane neengkoko ana teba nawo teni ja efeng-efeng tenite ne meme tupa tuna ing-ang te kotu jobe tete hoho tetete nabi-nabi palsu.'' Noja mepe Teba feng-feng Meme ²⁷ Peanya, Ni lengkote kotu ea eka pina Nine weka elu. Teba feng-feng jano huhufa mepepe ana ing-angra teba metenaji. ²⁸ Mamepe teba me jangtefa pa lupompong mewa teba me jano feng-feng tete. ²⁹ Ana teba ube meme kenalu, mepengna ketete ube lowera mepomi. Pa, ana kebaung keenako ro meme kewe, pi mepepeka ko ro meme ingra. ³⁰ Mepepeng te ana kebaung jakewa me, Pa ana kebaung ja meme kewe, mera wako keweleng mewo mepepeka. ³¹ Noing-angra teba hing no efeng mepe wakotu mera efeng tete. ³² Ana me jano mepe teba mepungtu, teme jaungka me tewepa me piteni? Peanya,teba neleng tera jano huhufa teba-teba te jano tete. ³³ Era jano huhufa elete teba e ja huhufa tetete ea, Efengna eka terepa pika teni? Peanya, teba neleng tera jano huhufa tete. ³⁴ Ana era jaungka ewelengna teba hing hume engko jalika mewawape, jaing ja teweni mepi teni? Peanya, teba neleng tera jano huhufa tete teba neleng hing-hing ung jali tete nawo tere aha aling. ³⁵ Ana ing-angra, ja efeng mepe teba pa efeng mepe, jaungka me etu mepepeng keba hing ung jali mewawaka Peanya wakotu, era jana bapale elelele pa era keleko koko keke Eere mule Jeng Tetewo Tata ing efeng tafa kewe lengte teba-teba jari jangka jano huhufa terika pa teba feng. ³⁶ Ana ing-angra, epa nera jano huhufa netenene peing ana Ainene kewo efeng maki tafa.'' Keba hing pike mepupuka ³⁷ ''Teba pite mepupuka ung mera pi meme keluluka. Bara ari mepomimika ung mera ari kelokikika. Metapo ung pa mera ketapopole. ³⁸ Mepepeng ung pa mera kewelenglengle; jeng ung ja aha teteete efeng,teheko pi tafa, tewelete pa pita, pa telihe fujeng meme. Peing aha alingfa peara mepeko aha mepepe, jaing peara keweko mera kepute aha kelelele.'' ³⁹ Yesus hoho kelete tea piti kewepuna wea, ''Keba lutofo ungka keba lutofo ungkeke kakale? Jatutu katuna tena keba hingtung ing long teii katuna ⁴⁰ Neangku newe aha nelala ana koru nelala katu. Ana ing-angra, epa nebawe meja kenalungko ahapa mera ana koru tete. ⁴¹ Jatuko meing mekapeng rijong kotu luto jome meme, anara mera puka luhi kotu luto memewo? ⁴² Tunane me piti mepakotu te jome meme, 'Joke, pea rijong kotu luto meme niwewele', peapa mewora luhi meme wo mefoka? He meba japupangka! rilo kotu luto memewo mepekengtu. Petehe ing-ang, mera ja mefo huhufa ung mera rijong kotu jome memewo ke mepekengtutu.'' Ritu ing Efeng Pera ri To Efeng tututu ⁴³ Ritu efeng ing kera jana feng kewe lengleng kale, pa ritu feng ing kera jana efeng kewe lengleng kale. ⁴⁴ Ritu-ritu ing nefo tangtangte wa rito-rito wowo. Teba arato ing muteteka wa atangpa, pe ana anggur ewu wa atangpa. ⁴⁵ Teba efeng ing jaja efeng ele kengtutu wapung efeng pa teba feng jaja feng tere kengtutu wa pung tete feng. Jaing pekengtu wa lang u teba pung tete nukotu.'' Wung Pa Hingtung ⁴⁶ Jatuko ewe Ni elung ele, Tata, Tata,' peana ja ing ejano eleka Ni nalungka? ⁴⁷ Ni eja ninalunglung ea le, peanara baung ketutu Niwe, lekela ile ja-Ni weleng ele. ⁴⁸ Keing ana keba paung, jano kele ile ikekuko topa-topa, peana ranglae kewe i wung kele etefe. Ana pakokotu, paing kekitafi, paing jaraleka jano keleko nafeng tafa. ⁴⁹ Peana, ba le mepate pinaKeke mepu pamepete tepaka baing me ana pajano mepumepe hangtura wung mefuka. Bang ung pakotu, paing tape pa taku fata.''