¹ Bangteung, teba nawo tepajo Ke tutu ko letelapate Tata hoho kelei. Bang ing, Yesus keru patotu Genesaret, ² Pa kekalengte tang hingtung tetu najang pato ing-ang, peapa teba mu juete tekengte peng tang tetewowo pa tete taang tete teloteete. ³ Yesus ketie tang ung, tang ing Simonke, pa kelengko Simon na keku ataleka tejana loete. Kaimpa, Yesus ketakung pa ja kenalung teba nawo keeti femu tangra. ⁴ Wakotu pikeleko kafapa, ''Tejana jeng pamue pa taangka mepoko muka peru.'' ⁵ Simon lungte ''Koru, newe jano nafeng neru rapang potewe, peapa jaungka newekafata! Peapa, Mea pengnya, niwe taangwe nilolo wea.'' ⁶ Pa, kaimpa tejaing tete, tewe mu nawo tere taangwe pejing e. ⁷ Kaimpa, te noha tete te teba tang kaung tera tetu pa taang tewe. Kaimpa, teba-teba tang kaung telepa mu tehe tang hingtung atalera tang tete utete. ⁸ Kaimpa Simon Petrus kalengte jaing kefo, ke paheti kemeto Yesus pa kelengte, ''Manafume niwe, Meba rube, niwe niba neleng!" ⁹ Petrus lengna ing-angke pa tebanawo kepatelupa te engpa me nawo kepatere. ¹⁰ Anaing-angra Yakobus pa Yohanis teangku-teangku Zebedeus, ketebato tena Simon. Yesus lengte Simon, ''Mefufuka. Ung-ang bangwe, e teba tang eweriri.'' ¹¹ Peapa tera tang-tang tete terena lope hete, jalelepa tete terei pa tela Yesus. Keba ing Ne Bengpae Kehae ¹² Bang ungpa, Yesus lei kota tu ung, Kota ing, kebaung nekeke pebengpae ana piu. Poing kekalengte Yesus kefu, ke paheti tangha keke atalera we hangto pa kewaete Ke,''Meba tete, ana Me pungle, Me niwe melope.'' ¹³ Kaimpa, Yesus noKe kelute tewe kebaing. Lengte Ke, ''Niwe pungle, newe melope.'' Poing ing-ang, toto nebeng kebaing pelengte. ¹⁴ Peapa, Yesus pinafeng kele kebaing hoho mepepeka baungra pa mepeng, ''Meme-me pa ne meme menapung tete imam. Jana hefeng mepeko mewaete ne meme hae peana pinafeng Musa lengkotu peja ana jafefeuang te te.'' ¹⁵ Pifeng Yesus kupa teba nawo tetupa teluko letela Ke pa kotekelepa tehae wa toto tete. ¹⁶ Ana, Yesus kekapaleti jeng-jeng roropa ko lupompong kelele le. Kebaung Fubangle keleko Hae ¹⁷ Bang ungpa, poing Yesus jakenalung ing teba-teba Farisi pa ahli-ahli Taurat teja kota tete wa jeng tupa Galilea, Yudea, pa Kota Yerusalem anaing-ang temete fua. Pa, Tata ma keke kelako Yesus kaimpa Ke teba nawo keleko tehae. ¹⁸ Kaimpa, teba narang-rang ung tejapa u angtetukeba fubangle keeti fei jengteluweng ete, pa teenako tekefukeng ifu pa keba tekei Yesus keho. ¹⁹ Anaing-angra, telengma teweka ko kebaing teketukeng-keng teba nawo telume, te ete ho pateke teketajuheti keba fubangle ing kepa jengkeluweng ile tekena hou-hou Yesus ho. ²⁰ Kaimpa kekalengte imam tete, Yesus lungte, ''He joke,neleng meme ing penijo.'' ²¹ Ahli-ahli Taurat pa teba-teba Farisi tejengte-jengte, ''Kebaing ba Tata we maki kefuile . Keing Ba neleng-neleng we kejojole peing Tata wofa ²² Kaimpa Yesus hupalang tete kelu, Ke lengte, Tunako ewe ja anaing eheng ele pung e e ? ²³ Kenewe pe peng-pengfa, piti elala 'Neleng-neleng meme pe kejo' na 'Maleng pa leng mema ? ²⁴ Anaing-angra, ung elulu Keba Ko kemakele wa fitong ko neleng kejojo,'' Yesus lungte keba fubangle ing, ''Ni lungtete me . Memalung, jenglu meweng mepe pa memu.''' ²⁵ Wana ing-angte, kebaing kekalung keru tebapaho pa jeng keluweng pekewe, palengkeka keme Tata kekepa pikeleng. ²⁶ Teba nawo ana telengho pate pa Tata tekepa piteni. Ana tewe tefe tafa kote Tata make, tewenipate, ''Ung-angwe newe nefo ja-ja kewe etele ho.'' Lewi Kela Yesus ²⁷ Wana ingte, Yesus kengti peng pa kalengte kebaung taimbe muleile bati keke Lewi kemu jeng taimbe mute ete. Yesus lungte ke, ''Mepapa Niang.'' ²⁸ Peapa Lewi kera keru, lelepaing kelui, pa kela Yesus. ²⁹ Peanya,ke pesta bapale keleko Yesus paa kekenya, teba nawo taimbe mute ete pa teba-tebahing jajong tetang lupa tepa. ³⁰ Anaing-angra,teba-teba Farisi pa ahli-ahli Taurat teana tetulae Yesus teangku-teangkuke, ''Tunane e jajong eang pa paehung lupa tebafa taimbe mute ete pa teba-teba neleng?'' ³¹ Yesus lengte pa pikelete tea, ''Anaingraka teba-teba nehefeng tefaka keba talengha liile tepungtu, kepungtu teba ne e. ³² Niwele eka nilengko eba bamuang elele, peapa ko teba-teba nelengniwele ungtewe tepa.'' Teba Farisi Teaha tetena Keangku Yohanis pa Yesus ³³ Tewe tenite Yesus, ''Teangku-teangku Yohanis Pakeleng tehe ete ana hu tutufa kemule pa lupompong keleile, anaing-angra teangku-teangku Farisi. jatuko teangku-teangku-Meme ja tetang pa patejung.'' ³⁴ Yesus lengte tea, ''Punglena ewe elungko tebafa kebaleng upong lele le hupakememe peana keba uponglele le kepa tepa telupa. ³⁵ Ana, bang-bang ing petetetu, poing keba uponglele le kebaleng-kebaleng keteke ka tea, pa bang-bang ing-ang kepate hupa tememe.'' ³⁶ Yesus kera hoho kelei te ana jalopa lewang, ''keba keraungka ronati keweko kewenalang rototo. Peana, kebaing ronati kelekofeng, pa ronati kewenalang ing pehete paka tena rototo. ³⁷ Peana ing-angra kebaung anggur nati kelihe harototo. Anggur nati ing ha rototo kejing anggur ing janglu pa rohaing taku. ³⁸ Anggur nati mebepeng huhufa mumu roha nati. ³⁹ Mebaungraka ana anggur toto memu, pungle anggur nati memu petenina wewete, 'Anggur totoing keing hefengwo.'''