¹ Kaimpa Yesus pi Keleko kafa teba nawoho , Ketikengti Kapernaum. ² . Kefu kebaung taba Rube Romawi teba budak keke teke tepaeti. Budak ing ne pongfeng e pa atalele kewawale. ³ . Poing taba rube le kelate Yesus hohotete, kelengko teba huhu Yahudi narang-rang tetefi Yesus pa tewa keti Keleko hae e.'' ⁴ . Po ing teba-teba tetepae Yesus, tewa bamuang-bamuang pate Ke. Pi tetepate te,''Keba we Me jano hefeng mepepe, ⁵ . peapa ke bapanene jano hefeng kele pa kewofa sinagoge-sinagoge keleeteka pe nene.'' ⁶ . Yesus keka tepatelupa. Poing Kekakoti paa taba rube watupa, taba rube ing kelengko teba hela narang-rang tete pitete tenite Yesus, ''Meba rube,Me nememe metakukuka mepepe niwe peapa niwe ana niba nejaka Me nikeke paa nine. ⁷ . Peanya wakotu, ni wofa nirere nihu niwetape nirere Me. Ana ing-angra, piti rileleungka mepa ung bapo ninewe nehae e. ⁸ .Peanya,nira niba kohele taba-taba nilemotu. Ana ni pitiung nila keba taba 'Meme.!',kera keka. Ana ing-angra nilengte keba tabate hing, 'Mekape . kera kete. Pa, ana nilengte bapo nine 'jawe mepe' kera janoing kele.'' ⁹ . Poing Yesus kelelate jaing kelu, Ke engtape ja taba rube Romawi.Pea kepuna teba nawo telake Ke, Ni lengtete, ''Nira lengtete ea, ana ing-angra kepate teba Israel keungka kefika iman bapale anawe.'' ¹⁰ . Poing teba fanana tete te Yesus temupuna taba rube paake, temete tefi bapo ing nehae. Ko Pebaro Keleko pelefute ¹¹ . Wakotu febang pepe, Yesus kekana bametu ti kota bati Nain kepatelupa teangku Keke telake Kea. ¹² . Poing Ketikana tilong gerbang kota, kebaleng ung kewa ketetujana peng. Keba waing konale aling make ing pebaro. Pa teba nawo teja kota ing-ang pepa telupa . ¹³ .Kaimpa Tata peume kefu, Tata pipate bapalewo keletepe pa kelengte, '' Fu mepepeka ¹⁴ Kaimpa, Kekana tuti pa kekitefi para ehang ing. Teba-teba ehang tewejuko ing teju. Pa Yesus lengte, ''He meangleng Ni lengte mea, memalengra !'' ¹⁵ . Kaimpa keba waing kekaleng kemu, pa pikelei . Pa Yesus ke kelengna maketi. ¹⁶ . Teba nawo tekarengte jaing tefu patefe kaimpa Tata tekepa piteni pa tenie,'' Kebaung nabi bapale ketuhe hou-hou epaneang !'' pa '' Tata newe tutang Kele,'' ¹⁷ .Pa, pifeng Keke kekupa teri Yudea pa jeng nawo jenghing motu ing-ang . Yohanis Pa keleng tehe eti Ke Teangku keung kekefu keti Yesus ¹⁸ . Teangku-teangku Yohaniske hoho tete Yohanis jalelepa lewang ing. ¹⁹ . Pa, Yohanis kelengko teangku keke teba hintung tete te Tata ko tejeng-jeng, ''Meangna mema tope pe pe.? Peanya newe nemupa hing ung nenu nenena ?'' ²⁰ . Poing tejakotu tete Yesus, tera tenite, ''Yohanis Pa kelengpa nehe neti kea lengko netu neneMe pa ne nene, 'Meana keba tutule ? Ana, kehing ungka nemupa nunete .''' ²¹ . Wakotu bang ing-ang, Yesus teba nawo tejala toto nolelepa hae, toto kaung pa bate-bate feng. Kera teba nawo lutofu kelepate ja tefu. ²² . Pina kewe kelengte kelengte teba hintung ing-ang, '' Ere pa hoho elele Yohanis ja nile efu pa elu: teba lutofu lutoa, teba fubangtu lengteja,teba newapate beng e netupi, teba lepe pi teri, teba tebing telefupate, pa te teba-teba japaka pifeng hefeng kelei te. ²³ . Peanya,neewo mera jaung Ke fika.'' ²⁴ . Kaimpa teba piwetute-piwetute Yohaniske teja, Yesus pikele pate teba nawo Yohanis neparake, ''Ewe ere jaefu ta hou ? jaefu ta feng weilena ? ²⁵ . Ana ing-angra ere jaingja efo? Keba ro jutafa kewefa ? Ekalengfu, keba rojutafa kewefa kotu pa kemule japa teing temete istana-istana raja. ²⁶ . Peanya, jateing ja ere efo. Keba nabi. Ea, Ni piniletete ea, niwe ana niere mule keba nabi. ²⁷ . Keing keba,tekepa lenleng teete pepotu kotu. 'Le elae ! Ni lengko keba Nine kekaito Me. Kea lengma ketu pipito Meme.' Maleakhi 3:1 ²⁸ . Ni lungteteme, wa teba nawo teing tetanghaa wa peume newe baung bapale raka anara Yohanis. Anaing-angra, keing hapawo kemule Tata Paake, kebalewo tehe ana kea.'' ²⁹ . Kaimpa teba nawo pa tebafa tejapa pajak muteete le telate jawe teri, tera nawo tafa pungtu Tata hefengke tera patehe Yohanis pakeleng tehe. ³⁰ . Anaing-angra, teba-teba Farisi pa ahli-ahli Taurat tewerite ja Tata huengkote ne tete tera Yohanis pakeleng teheka. ³¹ . Jaing japa Ni teba-tebawe aha nilala teba mete moung-angwe ? Teing anaraja? ³² . Teing anara teangku-teangku temete-temete jengjatajeng, kealing ung lengte keung, 'Newe e nepeko teea, eweka lieleka. Newe jalang netenetewe teba bingete, eka fueleka.' ³³ . Peing, ana Yohanis Pakeleng eheele ketu pa hang ong na pa anggur eang-angkale, elengte, 'Ekalengtefu! ³⁴ Ke keba jamukang pa pamukung! Kera teba hela tejapa pajak muteete pa teba-teba nuleng temote. ³⁵ . Ana ing-angra jahefeng ingpe teangku-teangku teni jabamuang.'' Pebaung Peume peba Neleng Yesus no Pewefe ³⁶ . Wakotu bang ungpa,pebaung pewa bapa Farisi penupa kote Yesus keti tenake lupa jajong Pe tetang-tang. Yesus keti paa keba Farisi pa ketakung jajong kekang. ³⁷ . Kota ing pebaung peume peneleng. Poing peru Yesus keme jakang ile paa keba Farisi ing-ang, pete poso pualam ung jata petu posoing minyak nupa fengrakawo. ³⁸ . peapa, peturo kue Yesus,watu tang e Keke,pa fupetu pa tang e Yesuske lupong pepe papejoe pa tapepe papetuko pejoe. Joraka, peYesus tang e nupa pewe pa no pewela minyak nupa fengrakawo. ³⁹ . Kaimpa keba Farisi kewako Yesus keti kekalengte jaing kefo, ke pikele tehe nei, ''Ana kebawe keba nabi, Kelu keing peba pa peume nohate neno pewetefiKe pewe peume kawe pewe peba nelengwo.'' ⁴⁰ . Yesus pi nokelutewe pa kelengte, ''Simon jaung nipungle Nilung teteme.'' Simon pinakewe, ''Pika mepe Koru.'' ⁴¹ . Yesus lungte, '' teba hintung jatefukamotu keba taimbe tejofaete, kebaung jakefuka mambire rerefa napang 500 dinar pa keungke jakefuka mambire napang 50 dinar. ⁴² . Poing tenake jatefufu tehiengtape, keba taimbe jofaete teba hintung jatefukamo tenakete pekejo. Ung-angwe teba hintungwe bajanoja kele keba taimbe jofaete. ⁴³ . Simon ''Teheniwe, keba lelepa nawo kekofafata wa taimbe kelemo.'' Yesus lungteke, ''Me aha mepe ing bamuang.'' ⁴⁴ . Kaimpa kepuna peumeti, Yesus lungte Simon, ''Jara ewe peumewe ekafuna? Poing Nire paa meme, ewe para ekeleng tang e Nine niloleka, peing tang e Nine pelotu lupong pepe pa ta pepe pejo. ⁴⁵ . Ewera Ni nupaeweka, ana pewe pemo joka-joka tang e Nine nupapewe po Nikengre. ⁴⁶ . Ewe rube Nine minyak pa no ewefeka, pe minyak nupa hefengwo pejo tang e. ⁴⁷ . Peanya Ni lungtete ewe, neleng pepe nawo pekejo penoja hefeng makite penarung. Ana ing-angra teba jatalele kejo, jatalele ing-ang elele.'' ⁴⁸ . Peapa Yesus lungte peume ing,''Nuleng meme jofata.'' ⁴⁹ . Teba-teba kepatelupa Yesus temepa jatang e tehowe-howee hupalang tete, ''Kewe Keba kawe Ke nuleng kejojole?'' ⁵⁰ . Yesus lungte peumeing, ''Iman meme pea mepetuko hefeng, memu memala pepe''