1
Bukhoba weari te, Gadara domyea neai khani ne.
2
Yesus ipo eijea akhouboke bere, neangkena do embai bure dangdea nari warbo yea aungeboke Yesus re te mewere.
3
Nea yowa einye nekere domyea si yea tayea nesinoibang taa yea dingnanyekonte.
4
Notoo o kabang dea taa yea dineikuyanye be neang taa tokhoikiyore.
5
Tuwea dai, khari ni bure dangne, wiri ne eisiseai meisisea siseayere. Neuga te duka yea dotore.
6
Neande do Yesus te atauge etekeunge, neangkene takhaimiyere meke Yesus te ototereng dea iseinyekoke.
7
A keanere weunge, “deambere tai ate erarete, Allah re yo buma yang buma Keru? Deyea weate diyaware Allah re do yea, deate pekho emokhoisendea.”
8
Neangkene Yesus yea neate weunge, “nari warbo eisanei na domyea re yea!”
9
Yesus yea neande domyea te sineunge, “weado sinde?” Neang do yea weunge, dea do Legion, meyea neaisere ne.”
10
Nea dokhoyea – dokhoyea Yesus te diyweunge neande yowana nari warbo etukeijea.
11
Nikena obo neaisere wiriseainya amangne ampoyaije.
12
Neande nari warbo yea Yesus te diywainye, wainye, “meate Weiming obo neai euga einyemo emayembong”.
13
Yesus kena khoikoke. Neangkene neande nariwarbo pokhaije neang obo tengwaije euga einye eyeibokhaije. Neang obo neatereng 2000, nembase kharo te takhawaije, nea noo – noo yawo yea barwaije bu eise wowaije, bu einye ambokhaije.
14
Obo khaya te tengwaije yo pee ne wari ne nea tengmo takhawekhaije ekhaije yoo na yo te, kota na yo te a ekhaije wewaimi. Neangkena domyea nembase eibarakhaije ekhaije neang etamung bewaije eteiboise ekhaije.
15
Neangkene neande domyea eibarakhaije Yesus re te, neang burowarbo yea aungeboke do be mekhaije etewainye, Legion dea neuga einye eyeisike nekeumeke, onomi douke, maro siseukhoke mo angkeng dea dumboke nekere. Neang domyea pee neaisere khowaijea.
16
Neangkena domyea tengwaije yea neang a nembase tugwaimi, neang etamung injeama yea bewere. Neang burowarbo eibarakhaije mo obo neai euga einye pokhaije kembokhaije.
17
Neangkene bea, neang domyea Yesus te wekhainyere neang yowa wara yea nukembonde.
18
Neangkhaijea, Yesus ipo einye Akhoke mo neang do burowarbo yea ainyeboke kowere kiya yea Yesus te takhongebonte weweunge.
19
Neande be, Yesus kena ekhoikoi, neang do te weunge, “wea akha beake noro te yea dere. Weai akha beake te ere weimire, neande ma Tuhan kena buse seikokege, onomi yekeuge.
20
Neangkhaijea neang do ewere eke Dekapolis na do te miyea te neang a nembase eke weweumi. Neangkena domyea khabewainye tere.
21
Yesus neai beneng ipo yea pasi te pokhaije, neangkena domyea neisere Neai buko te, Yesus neuga wa buseainye.
22
Neangkaije, Sinagoge neai yung kiyea ne uno Yairus meke Yesus re ijoko eteiboise, Yesus re oto we ne ototereng dea iseikhoke.
23
Yesus te a dimaiweunge nea kena oro eijea diyweunge, weunge, “De meangke paa merea ibikeng tetente. Mepoy Wea mee neuga rang ne tainyesire mo onomi dowende.”
24
Neangkhaijea, Yesus Yairus te takhoinyeboke poweje. Domyea neaisere Yesus te takhonyekhokhaje ereyea sirenyebokhaje.
25
Neang yowa na miyea embai okhe daroyakhama mee be – be bere dereinyemeke.
26
Dokho yea – dokho yea onomi te mokhaimi domyea te otowere neande be poi edowei mo, doi dera nembase taiwere be neuga te poi edowei, ya nebea tu nebeai beneng pekho meyerea te beimeke.
27
Yesus re a botoke ne bea, Yesus re bukote mewere, angkai Yesus ne maro moijea ikereuboke.
28
Neang miyea yea erere, “Kato ya, Ne maro ibikeng irketebonde neasinoi poi doutere ya.”
29
Neang miyea nesbi onomi douge, neang okhe dirwere nesbi senguke.
30
Yesus nesbi Iseayeuboke, Neuga yea Erea eibarakhaije. Beisoke neang domyea tengwaje noroyea weumi, “sinde yea de mayo ikereuboke?”
31
Nea u na tomo na yo yea wainye, nenda domyea tereng bumbung kirineimiyaije, injeama yea Weyea sineyea, “sinde yea De maro ikereuboke?”
32
Yesus Neajoko eiweke neang domiyea tebaije te eteumi, sinde yea neang mee u mokhouboke.
33
Neande be, neang miyea neuga te neante yeuboke ne bea nea pee neaisere khowere, oto mee onyeu de isengwere. Meke Yesus te ototereng dea iseweunge, neang a nembase weungekoke.
34
Neangkene, Yesus yea neang miyea te weunge, “De meangke, we dabotarei jea weate onomi yekeuge. Nea kena poi upoi jea mo ere, weauga onomi doukea.
35
Yesus nea nemang a ne erere bea, sinagoge neai yung kiya re imea na domyea mekhaije wainye, “Wea paa teteke ya.” Taijonte Guru te mekea wabanea?
36
Neande be Yesus neang a erwaije te engkeai ebotoi, neang sinagoge na yung te weunge, “pee ekhoijea, dabo mo tarei.”
37
Petrus, Yakobus, angkhai Yohanes, Petrus neugake Yesus yea yaweumiboke, domyea suwa yo aseumikoke nekewaije.
38
Mekhaije neang sinagoge neai yung kiyea re imea ne mo bea a yeuboke kirwaije, domyea dime asiri nea erea yea dimewaije.
39
Yesus eyeisike, neang domyea te Weumi, taikene dimauge? Nenda meangke etetei ja, nii kene tonore.”
40
Neang domyea Yesus te de yea tatewainye. Neande be neang domyea Wekeumi nembase eibarakaije angkhai Yesus neang meangke neakho re nenangke re yaweumiboke, neang do name Neate takhonyekokhaije yo bere, dokoi embai neang meangke merea tongwere yowa te eyeibokhaije.
41
Neangkhaije, neang meangke merea nea mee ikerenyeboke mo weunge, “Talita kum!” (meangke, Deyea weate waware, anyuh!).
42
Neang meangke merea nesbi anyuke mo oto aronyekoke otore, neang meangke ne wari mee be – be bere daro yakhama. Neangkena domyea khabewainye tere ya.
43
Neangkhaijea Yesus yea neang mangke ne nangke re neakho re te a erea Wekeumi, domyea sinde sande te neang etamung yeuboke a ereijeamo, angkhai wekeumi neang meangke amang yekhainyere.