1
Yesus neang yowa yea Neai yo te eke, Nea u na tomona yo Takhoinyekhokhaije.
2
Sabat ya meujeuboke mo, Yesus eke sinagoge einye Kerweumi. Domyea tereng Botowainye, pa wewe yea khowaije, eraije, "na nembase makahijea iseyeuboke? Iseai tamang Neate yakhanyere na etamung emekhai neaisere mokhore, nembase natere te mo beaije.
3
Eyea isea nekhande, Neyea bea oo etamung te mokhowere re keru rongbea, nenangke Maria, angkhai ne akha beake Yakobus, Yoses, Yudas angkhai Simon neai jong bea? Nemeang wa nembase nenda na eibere? Neangkhaije Yesus te tukenyesikhaije.
4
Neangkhaijea Yesus yea weumi, "Makere-makere na Nabi neai see ne a mong-mong tere moroyaimi, neande be neai khani ne, ne akha beake noro ne, nea imea obe einye neate a emoroi.
5
Neangkene bea Yesus etamung emekhai see neang yowa ne emokhoi, eta yo yungjo te mo mee Korweumi onomi yatowaije.
6
Yesus neuga payea bowere, neangkena domyea nea kenabang ubang nekewaije. Neangkhaijea, Yesus yoyea-yoyea otoweke a kerwekeumi.
7
Yesus nea u na tomona yo Keaneumikoke, khaye do bee - bee yea Waseukoke, angkhai erea wake Yekeumi nari warbo te tukenaiminde.
8
A Yekeumi, nea nibi a enaije mee bangkha yea mo enaije, taitai etamung nea mee ne eyatoi ei. Nea mee ne oo posi te mo, ouw bang, nea yoru khainye doi ekeneijea,
9
Sendal sisenaikonde, neande be maro dakha bee yea esiseijea.
10
Yesus yea weumi, "Makere imea khaye te emembompe, neang imea ne nekempe neangkhaije mo embarempe.
11
Yowa sii te empe asiyea wenanyempe bea, angkhai mate ebotoi, neang yowa yea ertenea bea, wooto na khanimang pangkhore, neande iseai te nekenaije na pekho be mokhoubokhaije.
12
Neangkhaijea ewaije, domyea te wewaimi nea pekho nukenaije, Aye re te mo benaibonde.
13
Angkhai, burowarbo neaisere tukewaimi, eta yo yungjo mee yea korwaimi onomi yatowaije.
14
Ondoporo Herodes Yesus re a nembase botoukoke, Yesus re do nembase iseaiwaije, eraije, "Yohanes bu te korweumi kiya tetewaije noroyea wareuboke, mana neande etamung emekhai neate mokhoimiyere.
15
Domyea suwa yo yea eraije, "Nii Elia ya." Neande be, suwa yo yea eraije, "Neyea nabi ya, nabi neai noro na nea sii."
16
Neande be, Herodes neang a botoke bea, erere, "Yohanes nea yung te neisakhare, teteyea anyuke!"
17
Heerodes neneaijea domyea te wekeumi, Yohanes ikereibokhaije khawa einye senyekhokhaje Herodias re eatene, neugake Filipus re miyea, Herodes Herodias te douke kenane.
18
Yohanes yea Herodes te a dokho neng-neng weungekhoke, neanta neeyeabangda weyea weuga re miyea be doukea.
19
Neangkenane, Herodias neakena pekho Yohanes te koweunge, angkhai tombonte mentau wounoke, neande be neasinoibang.
20
Tanyebang, Herodes Yohanes a botoke ne bea pee yea khoweunge, Yohanes do poi, nikibang khombubang, neangkene Herodes tore morweunge. Herodes Yohanes te botoweunge, neuga oneijea onewere neandebe Yohanes re a erwere te engkeai botoweunge.
21
Neande ya neaijeng ya meuseuboke, Herodias neai tongkhaije ya. Yundante nekhaije yo te amang yoboimibokhaije mekhaije, parayung, Galilea na yunte nakhaije yo bere.
22
Neangkhaije Herodias ne meangke pa eweusike buse ne khowere, neyea Herodes re kena be yatowere, neangkena nekewaije yo bere. Neangkene, ondoporo yea weunge, "Weai kena te khoyea a khaye ereikore deyea weate yeteuge."
23
Herodes ne a neatere - tere weweunge, "Wei kena te khore khaye deate weiseng, deyea weate yeteuge, deai angkeng dundung posi yeteuge."
24
Neande meangke pa eke nenangke te weunge, "Deyea neate taibe diysenesinde?" Nenangke yea weweunge, "Yohanes bu te khorweumi kiya re yung be diyeinyesi."
25
Angkhai neang meangke nooto ne taremo ondoporo re te ewere, eke weunge, "Deai kena khare nenda see yea mo Yohanes bu te khorweumi kiya re yung toje einye yeisere."
26
Neangkene ondoporo neakena tuwaweunge, ne a ereikoke ne bea, angkhai nea ukereau na yo bere ne bea, neang meangke paa te neyea asi te ewei.
27
Ondoporo yea do te tore do wekeunge Yohanes re yung doweise ewere, eke mo Yohanes nea yung khawa einye eke neisake.
28
Neangkhaije, Yohanes re yung toje einye auboke douke mewere, meke neang meangke pa te yekeunge, neang meangke yea douke nenangke te yekeunge.
29
Yohanes nea u na tomona yo botokhaije bea, mekhaije Yohanes nea noo diyeisikhaije mo ekhaije montakhaije.
30
Yesus nea u na tomona yo mekhaije adireusikhaije angkhai Yesus te etamung - etamung ekhaije mokhowaije, nea a peuw kerwaimi a be mekhaije Yesus te wewainye.
31
Yesus yea neate weumi, "meng, domyea bang yowa te emang, nengkene meuga noo enjengkho. Tanyebang, domyea tereng maije - aje, etamang angkhoise neyea mongbang.
32
Neangkene bea, Yesus nea u na tomona yo bere yowa mong te ipo yea kembokhaije ewaije.
33
Neande be, domyea tereng neandeyoo ewaije te etekhaimi, angkhai doimibokhaije. Neang domyea tereng yau nibi yea takhaipokhaje, neyea nea bete pokhaije neang yowa ne angkhai Yesus neai moijea pokhaje.
34
Yesus poke bu seainye mo, domyea neaisere eteweumi ne kena busea khoweumi, etewere bea domba khayaro bang maneng neanta ne, Yesus beneng etamung tereng kerweumi.
35
Beebasewere mo, Yesus nea u na tomona yo mekhaije wainye, "nenda yowa do bang miyea bang yowa, angkhai be baseuboke.
36
Nii yo Weiming ai nea yo te - yo te, enaije etamung doijea enaidowende.
37
Neande be, Yesus yea weumi, " Meeyea neate amang yengmimpe angnaise. Neande yo yea Yesus te wainye, angkhai mana miyea emare ouw doijea 200 dinar yea doumare mo memare yemaminde angnaije?
38
Yesus yea neate weumi, "mai mena ouw neang-neang tonaije? Emetembo! Ekhaije eteibokhaije mo mekhaije wainye, ouw mepea embai, kha bee."
39
Yesus yea wekeumi neang domyea nembase nea diyane-diyane yea dungnaije.
40
Neang domyea nesbi diya ne - diya ne yea dungwaje, diya embai domyea 100, diya suwa na wa domyea 50.
41
Neangkhaijea, Yesus neang ouw mee pea embai bere khaa bee bere Yatoukoke, Nea be buma te eiweke mo a diyeusike, angkhai neang ouw petewere mo nea u na tomona yo te yeweumi mo weumi, nii domyea wasengming anai. Angkhai neang khaa bee neaima, petewere mo nea u na tomona yo te Yeweumi neang domyea tereng te wasewaimi.
42
Neang domyea nembase angwaje.
43
Neangkhaijea, orong yatoikokhaije mo neang amang mosi - mosi adireikokhaije mo nembase orong
44
Neang domyea doo - doo te mo nea nembase 5000.
45
Neangkhaijea, Yesus nea u na tomona yo te Wekeumi ipo yea kembokhaije pasi te bete pokhaije, Betsaida te, neangkhaijea neang domyea tereng te Wekeumi ewaije.
46
Neande yo a Wekeumi mo, Neaye a diyeisiyse wiri rang te Yeke.
47
Bee basewere mo, ipo bunoro ne yawere, angkhai Yesus nembai yaunge nekewere.
48
Eteweumi nea u na tomona yo nea deng nea erea mo auwaje, aru nea meuge bang dea daweuboke ne, ya keri neainye tu ijoko woke name sinoinye, Yesus bu rang dea neai u na tomona yo neai bukote mewere, angkhai moi se wongmiwonte.
49
Neande be, nea u na tomona yo etekhainye bea ne tambu yea ereikhokhaje, neangkene pee ne ara turu porwaje.
50
Neyea nea nembase Yesus te etekhainye ne nea pee tere khowaije. Neangkene Yesus neate weumi, "m kena tabamembo, na Deyea ya! Pee ekhoije."
51
Angkhai Yesus neang ipo einye akhoke mo neang aru nesbi tangkhainyekhoke, neuga khabewainye tere.
52
Tanyebang, neyea Nea mee u mokhowere te poi iseayeiboi neangkene nea kena nea erea.
53
Angkhaijea, Yesus nea u na tomona yo bere pokhaije deusi ne, Genesaret yo ne bataibokhaije.
54
Ipo eijea akhowekhaije mo bea, domyea nesbi Yesus te donyobokhaije,
55
neangkhaije neng te takhawekhaije, ekhaje neang yo na eta yo yung jo kee tong-tong dangne tongwaje yo, yaugaimi mewaije, Yesus makerte ere, neeyea neama neang yowa te aije.
56
Yesus makere yo te Ere, makere kota te Ere, eta yo yung jo Nea bene neyainye angkhai Yesus te a diyainye Nea maro tuwa ibikeng ikernaibonde. Neang domyea nea mee Yesus nea maro ne ibikeng sikeanyuyere be onomi dowere.