¹ Farisi romiyea, Saduki romiyea mekate Yesus re uw mali hubaisiyte hubananyehindere, Na a riyainye, surgana meyakalare yakala mibondere. ² Peleyeare Yesus yea weumi hu akoyoyene, yaku re erau be hasai honounge mai a elaube, ya heawu earu honondere.' ³ Rene ya eraube, yaku puma haisai ougem bea roroye, pele eraubene mai a elaube, mana ya alu elea hele nennihinde rawendere pele yeare, ya mehining hu mehining meyea nahinggi hamaungele peleyeare meyea ya be hu be kolon nele meyea hului eihaisi hangga. ⁴ Rake hokolo wali nebangmo, uw nebang wanebang hokolo, koli weali beate me yakala re erenaibondere, peleyeare pele romiyea waneng de neare mbai sambai ekelei, ei yakalai boi. Yunus rena yeuboke waneng peleremo iteayeumiboke ra neyea oro molouboke nukeumiboke. (Farisi Saduki Yaele Na Kaliya Ragi Wanem Utaiweoumile) ⁵ Neare hakanyobo yo yeale awaufoke reubihi ne fainyoke, ouw inyale meaite neyea nundemikoke erowei fokate. ⁶ Pelene, neai uw kayare a iteayeumi, "na moimoijea maijoko erembe Farisi, Saduki na hamang einye aleaimile hambung, pelene wamale uw kaya yeale hebembe." ⁷ Rake neneai mo a kuure hoibate, na uw neneai jea iteayeaiboke pele ouw inyale re neneai jea nukaboke." ⁸ Na yawei mi boke yo Neai elewatere Yesus iteayeuboke, pelera weumi meyea hira bang rabo bang yo, makane ouw u ne meyea neneaijea a ikilaube? ⁹ Meyea ei iteaiboi, pele 5000 romiyea re, ouw nameahea mbai mo yea re pele anewate, nakalung beale anggai haunge hawewaube? ¹⁰ Nabewaneng 4000 romiyea pele na meaheambai mehine be yeale ouw bea mo anewate ang, na kalung beale nukawate, pele meaheamea anggaihauw ke meyea arilaukoke? ¹¹ Makane meyea eiiteaiboi? Reyea mare ouw meai a yea wamalene? Reyea mare iteayamale, mai uw kaya yeale, pele Farisi, Saduki meai hamang hambung mokate anate." ¹² Pelera iteate iteayeiboke, neyea ouw meai a mekai uw iteaiyeumi pele uw kaya re buhenate, Farisi Saduki meai romiyea nolone. Yesus, Neyea Yo malo yo Uwyolure Ikeleainyeboke ro ¹³ Kaisarea Filipi meai yo anuwauke eke, neai yaweumiboke yore hineumi, mai anggeinye boraube, ro fa miyea fa, neai hele hinyere wainyele?" ¹⁴ Na a wainye, ehi yo yea Yohanes bure koloumi ro yea elate, ehiyo Elia yea rainye, holo ehiyea elate Yeremia, nawaneng nabi ehi eho royea rate." ¹⁵ Pelera Yesus yea hineumi, " Meyea reare hinye yea ro raukele?" ¹⁶ Simon Petrus yea weunge, " Weyea yo malore yo uw yolure wokayete ro Allah walino henanore kelu!" ¹⁷ Yesus Na a weunge, "Weyea Simon, Yunus re kelu, kolo kolo mea me, weai waline eukowende, haubihine bang, pele a eleukokea, pele weai meleng, okiy elea yea bang, meako surga ne eke nekeye, neyea weare iteayeibokoite. ¹⁸ Nawaneng weare rake a iteayeawale, weaye Petrus ro buyea rawale weai hila rabo elea rang ne, yo ralo yoimea ere anununde, nawaneng Hades here kaka yokoiy wekeunge weyea nahinggi hileukonde. ¹⁹ Weare surga yo yang na yo a mau ke, na rawei boi te weyem nahinggi eukaweubonde, na waneng makayea euikeleubonde rake kani kenane, pele uw peleme surga ne enai ikelenaimile nawaneng makayea eubureaumile, pele uw pele me , enai purenaumile, enai hayenaimile." ²⁰ Pelera Yesus weumi, ro hi miyea ehire ewei eiyakalai, neai uw meai a neyea ya malo yo uw yolu re ikeleainyeboke ro. (Yesus Herende Maei Ahuba Itayeumiboke) ²¹ Pele yahe ra, Yesus neai yaweumiboke yore neai a weumi, Yerusalem de neyea enderemo, pelene ende en relenende, be yu peyebea yeale yo bene, nawaneng Musare homofea henaiboke yo bene konainyele hiyenainyele, enai hombonde releyeare nameneng yane walembonde. ²² Pelera Petrus, Yesusre eungeyobouboke keleauke ekete, na a weunge, "Tuhan, Allah yea weare rake uw mekai pendere." ²³ Eleabande wenende peleyeare Yesus meu beufoke Petrus weunge, weyea pulo walobo reai uw pokore eye." Weyea, Reai uw re wali halung, haubihinebang, weai uw bene Allahre ijene enei koyea, weyea ro meai miyea meai kena a yea warea." ²⁴ Pelera na yaweumiboke yore weumi, hinye reai moita hakondebonde kiyea neyea reai earene neai uw re kahoyea elengkonde, ukende keambonde reare hakondebonde. ²⁵ Hinye neai wali re pene nekennele kiyea pele neai uwra nundenende, peleyeare reai earene nawali ekenundeuboke kiyea neyea endowende. ²⁶ Rake wani kela weaite eukowende, peleyeare euferendena, pele meahea mokoubonde? ²⁷ Ro fa miyea fa, mende ne neako yea ketei ketenembonde neai uw mokoi yo yeale, pelera romiyeare name uw mokowatere, pele hului pele waneng de benemile. ²⁸ Mare reai a heleyea wamale, rakene mekau hebaube, ehi yo nawali mo nekenati neyea here nambele bang, peleyo yea neaijoko enaikanete Allah neai kelu neai mende yane, neakoro yora."