¹ Peleya Yesus neai hakainyeboke yo yeale, alainyekoke heke eita meibate. Hakainyeboke yo moni uw hubawanye, pele heke einye hamang bea hokowate angguate. ² Farisi romiyea pele erewaimine, na a wainye "erei. Weai moita hakaokoke yo, rake ya kabang ne, pele me uw nebang bea keleaiboke." ³ Yesus neai a weumi, meyea homofeana eroikoi, Daud neai hakainyeboke yo yeale ekai monine hubawainyele, ⁴ Daud meahea yea eleukoke, Allah Neai imea obe eite eweufike, eke pelena ouw mbea eukoke anewoye, pele Tuhan de hakeainyeboke neyea meahea anggo ye, neai me mokoijea pelere nobenainyekonde? ⁵ Meyea Musa neai homofea eroikoinye, Allah Neai imea obe einye na me mokoi yo yea, me uw nebang heleng mokowate pelere neyea nahele yea hubawanye? ⁶ Pelene Reyea mare iteayamale, Allah re Neai imea obe kabang neai nahele mai kena uwnye nekeye. ⁷ Meyea iteai roukaube na, Reyea mainya buhea hembe meai jea kolire beale, mai me uw re pele honai, nawaneng ehire meyea ehe nawalire ehayeijea. ⁸ Pelene neai uw meijeuboke, Tuhan pele yamere ikeleuboke. "Uwno wa No Yei Yane, Yesus Foi Mokowoumi ⁹ Pelene kulung ukate meibuate, mekate Yahudi meai ome obe ne. ¹⁰ Pelene, ro mbai neai me reubihi mbai okoungeboke ekusei Yesusre minanye, Allah neai ya haufike, uw no wano meai ya pele ya ne ro miyeare foi enaimimokonde, pele haubihire eyeiboi," Yesusre mokonanyembonde ruwende a kelai. ¹¹ Peleyore neai a weumi, hinye mai nolona, obo mbai hayeunge pele ya ne, pele obo a bulu einye ruwende, neai hayenge ro pele yane eraneitiy pele abulu ra pumane hannebonde? ¹² Buhi wali ro miyeare pumane haumihike, obo yokure ro oro miyea oro me kelene hebenayende." ¹³ Pelera Yesus pele ro me reufi nebangde weunge, weai me neije meu reai uwre. Pele ro name nekeunge, nahibi foi rouke. ¹⁴ Farisi ro miyea ekate merau kolowainye Neare ungayodere nibi beabate honaibondere. (Allah Neai Uw Mokoi, Yesus Re Me Beaboke) ¹⁵ Mekai nebang de harewainye iteayeuboke ne, Yesus pelera uw buheukoke hakanyewale yo heleng pele romiyeare foi hayewoumi, ¹⁶ Peleyore yore weumi, Neai uw nekeyere, eiteajea, eiyakalaijea. ¹⁷ Rake penate yakalanate, Yesaya Neai nayopoloyea haufike honoimeke: ¹⁸ "Erengne, Reai mere eleubokale, buheare heanale, Reai kena uw Neare ei molanale. Rehalo Neai uwne hayerende, pele elea yea ro miyeare ije alommile wali foi alonainyele nekenayende. ¹⁹ Neai uw eare emoloi, na waneng Neyea elure eyeleikoi, Neai a elendere ehiyea Neare eiboroi, eihakoiboi konate. ²⁰ Maa pei beaneibiyate pele Neyea ehokoi eihayei,m nawaneng komba uwre iy hareunge koboite Neyea ekoboi fonde Neai releunge hareunge nahele meai kiyeare ende kombo me isembonde. ²¹ Nawaneng Neai Ro yea, ro ne miyeane hila ra bore konate halenale. (Yesus Puma Kabang Pele Allah Nehalo Re Na) ²² Ro mbai mbai pulo walobo yea nekeunge, koiboye, pele ro neai joko kumba nawaneng anggeai te hilewainye eboro, yawainyehoke Yesus pukore pele ro Yesus mokoungeboke foi rouke, neai ijoko, neanggeai nahunggire erewoye, borowoye. ²³ Ro miyea heleng faka re poibuate, hinate bea Neyea Daud re kelu?" ²⁴ Pele meyakali erawate, borowalene, Farisi romiyea na a elate rake ro Beelzebul yea meke rikeungeboke, peleyea Neyea nahinggi pulo walobo re hukeungehiki." ²⁵ Yo yang, Yo hou kou, nawaneng imea obe, kaye molonde here bonate, nawaneng neaite meaite releinainye. Pele na roko mbai wende orombonde. ²⁶ Pulo walobo ehi, pulo walobo ehire mekena roronete, here ponete pele elea bang pende orombonde? ²⁷ Nawaneng pele pulo walobo, Beelzebul yeale Reyea hukerehinde makelu omi maka eleyea hukenai meminde. Pelene weare nenayete konayete. ²⁸ Nawaneng pele pulo walobo Reyea Allah nehalo yea hukeremihinde, pele Allah Neai uw meai euw rangde meke hilombe. ²⁹ Nawaneng. ro ehi meai imea obere, nahambung yoko yea engbeang gondere, pele nakaya hebeye re ro enne ikelenenggonde re, pelera hame kahore pelena hambung hambung yokore eng beangkonde. ³⁰ Hinye Reai uw pokore eiparaiboi, neyea reai yokei re kondele Nawaneng hinye na mbainye ebeai eiyarilei rambele, pelere Reyea here ware re poremile. ³¹ Pelene wamale, wali me uw nebang nawaneng a nebang feau nebang pele kayere nahinggi buhea re heneayenggombe peleyeare Nehalo re a nebang feau nebang bea eweleukonde, weare buheare eheikoi. ³² Nawaneng hinye a yekele feau yekele Allah weai kelu re enne wennele pele buheare ende hennekonde, Peleyeare hinye Nehalo re, a yekele feau yekele re enne wennele. Pelere nease kenare buheare eheikoi nekenende, rake ya hera nawaneng nawaliya nekenende ne." Ani Mokoye Ra Onore Neai Ro Rainyele ³³ Ono foi hebeye, neai anire foi mokoye. Neai mekai pele no himi waneng neai ani himire paleijainye. Pelene onore, neai anira ro roibiyainyele. ³⁴ Meyea ehakai oromena yo , Meyea nebang de mokoijaube, mea hea yea mai feau ka a foi feau foite emelenggombe haubini nebang pele kena eina meleya a, euwbara na paleijate. ³⁵ Ro miyea foi foi nawaline, foite mo mokoijate, peleyeare ro nebang miyea nebang nawaline nebang meaite mo hareijainye, pele enye kere nalere meamea koijeumi. ³⁶ Pelene weare iteayeawale, a pang feau pangga re balaimiye ke yo neai hinemmele ya ne, neneai jea na pelene woo re enai konde. ³⁷ Haubihine bang, weyea ahele eleukonde, weare nahele mere beaneayete na waneng ahele bang eweleukonde, wali ehe weneai hubaungele . Farisi Ro Miye Nawaneng Taurat Re Henaiboke Yo Yeale Yesus Re Wainyele, Meyakala Kelembondere ³⁸ Pelera tauratre henaiboke yo nawaneng Farisi ro miyea yeale Yesusre wainye, kulu weyea meare me yakala uwyakala waneng keleimeboi mea." ³⁹ Yesus neai a weumi, Rake nebang ne mokauge hokolo, meyea koli beauge peleyeare meyea me hi uw hi yakalare, mare eyei hangga, peleyeare Yunusre me uw yakala pelera iteayembe. ⁴⁰ Haubihine bang, Yunus eke ka kabang yahelene, ya name nawaneng huwea ya name yeale, pele uw pele mekai Allah neai hilafa ende pele me uw waneng yakalanembe. ⁴¹ Niniwe na ro miyea, rake holo waiboke yeale, neai hinemnile ya ne ikelemmile, miyenemmile, na eare Yunusre angga yobowaimi neyea le boroi ehakoiboi. Nawaneng ereng Yunus yea hubaweungoye, waneng Neai nahele hiyea Reyea niyea. ⁴² Nake miyea ebung da na melau yeale menate, hokoi hayei yane nawaline hayenaimile, Na eare Salomore na uw iteai pelene rakene mai uw bokene meka nekale. Wali Yake Bang, (Dele Walobo Yo Howare Wende ) ⁴³ Pulo walobo romiyea uw ra meituweye, eye ohoijeye bu bang keleng anuwau ke ereye uw no re enjendere, peleyea neyea ehubayeukoi. ⁴⁴ Pelera eleye, Reyea bee neng berehonde reai imea meukokale re pele meare meke ereye, nei olo halo, fanyeaboke foi mokanyehake. ⁴⁵ Pelera beufoke eke, menggeimo renamo walobo me ehine be yeale walobo yaweumi boke nawali nawaneng uke nebang habang walire yeuboke neai pere nekewoye walire neemeikaite mana mokoye. Pele wali, pele me uw rake hokolo keteitiyate neai waneng eibe eitasire konate." (Yesus Naka Neake Neai Hesele Hele) ⁴⁶ Yesus manemang romiye heleng re a weumi, ereumi nenake naka beake yeale mekate hebate a re uw nganyele re. ⁴⁷ Ro mbaija weunge, ereimi, ana weai aka beake yeale mekai hebate weare a re uw ngatere." ⁴⁸ Pele ro a re iteayeuwebokere weunge, hinyere ana, hinyere aka beake yea warea. ⁴⁹ Nane hayeye neai moita hakanyekore keleye neai a weunge rake miyea reai menake reai aka beake! ⁵⁰ Na eare miyea, Hinye meakore kena ijene hakonde mokonde pele kiyea niyea, reai aka beake, reai anare me berembonde."