¹ Pele ya, Yesus ra meukuke eke bu heainye uweuboke. ² Ro miyea heleng hele meuhokouboke, pelene neyea kaiy ranne euketeke, nabe ro miyea heleng buheainye afeare hebewate. ³ A heleng weibuomi, wali uw mekai iteaijea iteayewoumi ro mbai eke biy hereayeibote, ensereayembondere, ⁴ Biy ne eke hereayewoye, biy ehi nibi enene palaikoke, pele moita aye mekate pele biy mai palaikokere, ambealure molaiboke. ⁵ Biy ehi rukare wanire honoye ijene mai palaikoke nawaneng hasalere faukate, pele nakani nahangga hele. ⁶ Pelera hu meuneauwkoke, ronsang aunggea nekeunge nawaneng kambu yambine, uke kalauke. ⁷ Bi ehi isare keere honounge ijene mai palaikoke, pele kee isa keteijate rake biy faukatere ayeijea ayeaimoke. ⁸ Bi ehi kani foi ijene mai palaikoke, anire foi, helende mokowate naheleng ehi role uw meaheambai naraka yeale, ehi role uw name naraka yeale, ehi role uw mbai me bee naraka yeale hinye anggeai yeale, foijea alende boronde . ⁹ Hinye anggaei jale kaye borombonde." (Melimekai Uw Yea, Yesus Kelewoumi, Iteayewoumi) ¹⁰ Yesus Neai moita yaweumiboke yo yea, neare a hinainye, makane, weai a feau romiyeare wamea, meli mekai uwyea pannea pelera weai are feauke hareanea?" ¹¹ Yesus yea weumi, surga yo yang meai, meyea nafoihele iteayauboke, peleyeare ehiyore mai iteayeauboke waneng pele yore eyakalai. ¹² Pelene, ro miyea na meuw yeale kiyeare neare enainyiuende nawaneng kolo kolo mea mea nekenende, peleyeare hinye me bang uw bang kiyea, nawaneng makayea nekeunge, neai uw, neai wali ra beai soi beannehonde. ¹³ Pelene wali meli mekai uwyea iteaite yeamale. Nawaneng Neai ijoko neai uwne nekate peleyeare ereibote. Ereiboi koi jate nawaneng iteaite eye iteaiboi. ¹⁴ Peleyo meai wali, Yesaya yea a haufike, anggeai jeale horo boromembe peleyeare meyea ei iteaiboi, nawaneng ijoko yea erembe peleyeare meyea nei ehuweiboi.' ¹⁵ Rake yo nekate, nakena ruka ruka hele, neanggeai boroite eiboroi kate nawaneng erei joko ereijate, nawaneng neyea ijoko yeale mbea, erei erate hangga yea, pele waneng neyea anggeai yeale mbea, boroite boraibougea hangga, nawaneng kena nei huwainyele, beabouge maite, reyea onomi yeimile. ¹⁶ Pelene, weai ijoko foi roukobokarea, nawaneng weai anggeai foi aleufikare boroukobourea ne, kolo kolo mea mea re weyea nekewendi. ¹⁷ Reyea mare ahele feahele yea wamale, pene holo nabi ro miyea hele mainya erekaube me erenaibonde koibate peleyea neyea ereiboi nawaneng neaggeai boronaibondere peleyea eboroiboi." Biy Hereai Biy Moloi Namekai Iteaiboite ¹⁸ Pelene Biy hereai biy moloi meai na a iteai meyea borombombe. ¹⁹ Neai ako feauko romiyea eiboroibiyate nawaneng ei iteaiboi, pele romiyea pulo walobo yea mende nukensande makahayea eke borouboke rake romiyea nawali pele biy nibi enene mai palaikoke waneng. ²⁰ Nawaneng boroibiyoye ra nahibi yea reimai eikoye. ²¹ Pele niyea neai uw einye kambu inyale bang, romiyea embelene ehe ranserau heraweibiyounge nawaneng uw hoi wa hoi pele ako feau earene, neyea nahibi yea eituweye. ²² Kee isa kaikainye biy mai palaikoke, pele romiyea ako feauko boroubokera mehire foloya, nauw bene wabene hambung de uw bene nekeunge pelene koijaye, neai uw neai waline anire ei mokoi. ²³ Biy kani foinye mai palaikoke, pele ro miyea ako feauko foite iteayeaiboke nawaneng neite hubainyehi, pelene neai wali einye ani foi yarowoye, ehi role uw name na raka yeale, ehi role uw mbai me ehi bee naraka yeale." Kee Hobo Yeale Gandum Beale ²⁴ Wali a uwiteai Yesus mehi waneng de harengeboke, na a weumi surga yo yang eke honoye pele na uw mekai ro miyea eye heke einye, biy na foi jea hereayeibiyoye. ²⁵ Pelera ro miyea ijokone eukaheukoke, nayokeijo meke neaisale pele hekene kee hobo biy yea meu herea yeu boke pelera pukeufike. ²⁶ Pelera pele biy faukate kui ani palaimeke, nabewaneng pele yeale naketate ikai waitike nayakala re erate. ²⁷ Na uw mokoi yo jea mekai neare a hinainyele, Neai a wainye, ro wa weai heke einye weyea biy foi jea hereayeuboke, peleyeare rake kee waitike embele ra maiketeke?' ²⁸ Na rowa a weumi, yokeijo yea meke rake meuw mokouboke pelera, a hinainye, weyea pelere euarileukonde waneng eyere?' ²⁹ Na rowa a weumi, Neai hebai, meyea pele kee engkohombene pele gandum Neai jale endawembombe yeale. ³⁰ Rokom miko, hebanate Neai maluwei yane maluwemale, pele maluwea yane biy hereai yore na beme ukemile, pele kee kohonaibonde na hone hone ikelenate iy ranne hanenaimile re na waneng pele gandum arilensimbe membe reai hauwnge holondele." (Allahre Yo Yam Sawi Haka Mekai Nemekai Ragi Wanem) ³¹ Pelera, Yesus a hubare huwengmilere, a mekai ahira rouke weumi: Surga yo kabam ekehonounge pele sesawi biy palainye waneng ro miyea yea ro weye eye heke einye eyokoikiyoye. ³² Rake biy Neai koo nino nino, fele fele hele, peleyeare fawei eifaweyene neneai o reu ha reu eungare anande neyea moi hayeikiyoye, kabang uw re honounge, pelene aye mate nale na mensea akaunge meiseaite." ³³ Nawaneng ahuba ahi yeale baraunge, surga yo kabang yang kabang eke honounge pele, ouw oleaimi Neai hani waneng miyea meanggeyea eikoweye pele ouw einye aleibiyounge naheleng roko name aleikiyoye pele ouwre yembonde. ³⁴ Yesus na a feau iteayengmile re, pele uw mekai wa mekaita yaroye, pele waneng da iteaite iteayeumi. ³⁵ Nabi a wokate honoumeke, mana meke na kai raye einye aiboke reai feau ra iteayerembe, nung honoimiyate hambung pele kani kela moko woye ra, pelera eyei iteaiboi. ( tentang rumput liar dan Ladang (Erum yaele Hekene Ahuba Aruneuboke) ³⁶ Pelehera Yesus pele romiyea heleng nukeumiboke, eke imea einye aruleufike pelene na moita hakainye boke yo yea a hinainye. Weyea meare yakalaimebo heke einya kee hobo meai a uw iteai. ³⁷ Na a weumi, Hinye biy foi kiyea ensereayende, pele rofa miyea fa, ³⁸ Rake kani kela honoye pele heke neai uw niyea, ³⁹ biy foi yaikete hebate pele neai kelu omi me re peaumiboke kee hobo walobo name yea pele biy meke woke neke me malui re pele na buyo ayo niyea. ⁴⁰ Nawaneng bele hee ubuleinaibonde, enate i einye enai hanenate bele ya heai hu heai be engkolonde ya ne penate yakala nate. ⁴¹ Role fa, na puyo ayo meahemmikonde, enaite ruka oro halung meai kolonate, pele yo pele ro miyea nebang de mokowate enai nalenaimile, ya kabang wali yore neyea eyeisiy jea, ⁴² Nawaneng pele yo pele ro miyea re enai kanaimile iy re beye kounge pelene rimeyea a yea konate rimenate, ite kili haka hikin nate. ⁴³ Pelera, nahelere mokowate ro miyea, na wali hu hehe waneng neammikonde neai akore yo imea obehenane hinye anggeai jeale, neyea alensinde, foi borombonde." (Wali Yohena Mutiara Wili Halamam Wanem Ahuba Aruneuboke) ⁴⁴ Surga pele hambung foi hele waneng heke einye honounge meke hubayeukoke, beneng rouke eke keleau nungne eukafike ha eme hubayeukoke ne, rowei roweungehike, eke neai nekainye hambung nanemene naite euheukoke pelera peufoke meke pele heke roijea rouke. ⁴⁵ Surga pele hambung roi naite heate yo, me pelero hambung bu foi, bu moi jealere peajeye. ⁴⁶ Eye eisubayeikiyoyera, peesiyoye bee eye na hambung nanemene nai heikiyoye meye hambung bu foi bu moi jealere, neyea roi ninggi yea eimokoi biyoye neai neibiyoye." (Wali Yohena, Ka Elana Mae-Mae Koukoke Wanem) ⁴⁷ Surga yoyang kabang neyea kaa ela peaite yarate me. ⁴⁸ Nawaneng pele ela kaa heleng aruleibiyate, bu heai te yabare yoboi biyate meye, pelene eleaite foi kabang yarate hawate himi nebang hayeate. ⁴⁹ Rake me yakala uw yakala pele ya uw hu uw riyau ke bonde yane yakalande pelene na uw mokoi yo menate, foi mokate romiyea nebang de mokate ro miyea yeale, neaite meaite kerala naimile, ⁵⁰ Nawaneng romiyea nebang mokowate yore, iy tukai eite enai kanaimile, pelene rime a konate. Ite kiki re hikenayende. ⁵¹ Rake iteayamale re, meyea iteayauboke, pele ro miyea neare wainyele, iteayeande boke. ⁵² Yesus yea Na a weumi, Musa hene Tuhan de me uw mokoi imeke mana surga ako Allah re yoyang ne ekaite neai uw mokoite yeiboke pele uw mekai, neai imea role na ru kanggera hambung bu yeale ro yeale kiyea, peleyea meke paleumi. Yesus Eme Ha Re Mokowoye yakalawate pele Earene Na Yo Yang Da Nainyehike ⁵³ Yesus eke kelewoumi a itaei weibuamira, pelera molouboke neai yo yang de meke. ⁵⁴ Neai yo yang ne meke, Yesus imea obe hebate einye meuw kelewoumi, a feau iteayewoumi pele erewainyere ro miyea faka re poibuanye, Na a elate, rake ro mbelera uw mekai wa mekai, iteai habayea eukoke, meke neme ikaijeale meke yakala ye? ⁵⁵ Neyea o arung o foloite kelu? neyea nenake Maria yea kanainye nawaneng naka beake Yakobus, Yusuf, Simon nawaneng Yudas? ⁵⁶ Ne mang neai riya eambele eainolone ikainye nekande? peleya rake ro, mbelera bea uw mekai wa mekai eukoke?" ⁵⁷ Pelene, neare pelera ainye nainyehike. Peleyeare Yesus yea weumi ro miyea iteai habayeale, meli mekai jeale kiyea, yo hi kouw hi ne neare ro ronainyele, peleyeare Neai yoho yonggo ne pele ro re me re ebeai, moi bulenainyele." ⁵⁸ Pele wali uw harewainyele ne, nukeiboi uw nukeumiboke, pelene me foi uw foi pele yone neyea ehakai koi ei keleiboi.