Pasal 7

1 Pelera Yesus aloungekoke Galilea kanire yoran yorande ohoweke Yudea kanire mehaubea ei, haubihinebang Yahudi romiyea Yesusre honaibondere merau kolowainye. 2 Pele hee Yahudi romiyea neabu neai neako neai Kanaan kanira meibate kulunna, o fea hafea yea reba kang mokowate ya bene nekeisi nekeisire mokowate yakabang nobeungekoke. 3 Yesus na uwbake neai wainyele, weyea kulum weieye Yudeare, pelene hambung emere emere eumokonde, weai moita ohowate yo weare enai erenayete. 4 Rore ronanyebondere bande romiyea name uw yakalane mokoye niyea nungne eimokoi, pelene weyea hambung eme emere eumokonde rake kani kelano yo yea na yakala ro ronayete.'' 5 Haubihinebang, neai uwgakewa hele horoyea Yesusre auwteai weumi neyea hila rabore eihalei. 6 Pelene Yesus yea weumi, reai ya reai hu hamam emeiseiboi, peleyeare maiya maihu naihinggi hinggi hembe, pele einye mokaube nekaube. 7 Rake kani kelana mare ikele waneng de eki, peleyeare reare naikelere kaite haubihinebang, reyea na meuw mkate, naa yakalayea iteayeameale. 8 Mayea emme pele hamam kabang mokatere, reyea niyea pelere ei sului haubihinebam, Reai ya nahului emeiheiboinye. 9 Nare ukeumi waneng neyea Galileane nekewoye. 10 Yesus naungake wa kulung ukate eibuate pele ehaman bulau kabang de pele moita neyea na maleu oro molouboke pele anuwauke eke. 11 Yahudi romiyea pele yakabang ehamam bulau anewatene neare beaibeai beawainye na a hinaimile, eainya kiyea yea beannele, na uw mbelene bang?'' 12 Romiyea hokoumeke yo, Yesusre a'' A meahea meahea elewate huwewate ehiyoyea elate, neyea romiyea uw mekai wamekai foija. Namekai ehiyo yea elate. Neyea romiyeare ame karebaite mokoumi ro. 13 Peleyeare romiyeare Yesus re a yakala ei elekoi, haubihinebang Yahudi neai yun yunde buheare hokowoumine.

Yesus Na Imae Kabamne Kelewoumi

14 Pele hamam bulau henggeleng haisike koibuate hee, Yesus eke Allah eimom mom imea na kabang hele kiyea na imea houwnge euweufike, pelene neyea a uwiteai waiteaite weiboumi yakalawomi. 15 Yahudi romiyea faakare bainye, a halainye, rake romiyea embelera eu iteayeukoke, na uwne na Yuheainye iteaisaba meamea koungekoke. 16 Yesus yea a weumi, uwteai wateai keleamale yakamale, pele reaita bam pele neai hele neai ukeuke mekalere kiyea neai a ijene feau ijene yea keleamale. 17 Romiyea hinye Allah neai kenare koye ijene hakonatene, niyea iteayembonde rake keleameale a uwiteai, Allarera, reaita bang. 18 Hinye neai uwra neneaijea elende huwende, pele kiyea neai uwre ro yea beaye peleyeare hinye neai ukeunge kiyeare ro foite beande, pele ro niyea ahele yeale, ame karebaite u. 19 Musare walora. Allah wali hee foloukoke are. Mare yenggokombe yea? Peleyeare mai wolona rombai sambai musarena ane ehakoiboi? Makane meyea hondebombere merau kolaungele?" 20 Pele romiyea heleng mea wainye, weyea aloyea aubokote koyea hinye yea weare honoibotere beaite?" 21 Yesus yea weumi, Sabat yane reya roko mbai hambung emere emere mokoubokale yea meyea faakayea poibaube?" 22 Nabere mai yobe mbai a ukeumi Yahudi ro nemmene naro uw ela folonate hele pelera Musa yea a ukembe kelufa honondera ya mehi ne name heleyembondera rouw ela're folonate pele earene meyea ro Sabat ya yea ro uw ela folaumi. 23 Musare walora wali heere foloukoke a re asasi okoinye Sabat ya yea rouw ela neisate ehe kaube. Peleyeare rombai nauw kabang nanemene Sabat yane onomi ikanalere meye rare ikele yea koibuauke?" 24 Maijokoyea eraube ijene, pelene meyea mokoite emmokombombe yeale peleyeare wali foi naeite pele manne meyea hokombe yarombe? 25 Yerusalem yona romiyea ehiyoyea elate, rake niyea yea eai yun yun honaibondere beainye. 26 Nawaneng erenne, neai uw foro hele woke a eleye, peleyeneare ambai sambai ewei heleya. Neyea wali ondofolo Kiyea, niyea eai yun yun nahele elate ha? 27 Namekai rakero neai mekere eyea eateaimo, peleyeare namekai, rakero neai mekere eyea eateaimo peleyeare Kristus neai mende ehiyea eyeiteaiboi neyea mbelera mende.'' 28 Allahre ei mom mom imea ne, Yesus nammam keleumi hee, a elea yea keaneye, reai uwre meyea roraukeboke, reai mekale anuwau iteayeauboke, meyea maiteai reai kena huluinye reyea emei rare ukeuke mekale kiyea nahele no. Neare meyea rore eroiboi. 29 Reyea peie kiyea rongebokale, nawaneng reyea neaita mekale namekai niyea reyare ukeuke rakere mekale. 30 Pele hee Yahudi romiyea kena heahea hele koibate Yesusre ikileinai bondere peleyeare hiyea hayea mere ikilembondere kabewainye haubihinebang Allah merau raungehike ikilenabonde ya namman eyeiboinye 31 Pele yakabang hokoumeke romiyea nolona yo heleng Yesus rea elewoye re nahele yea elewate hila rabo halewainye naa rake waneng ribea elate wali Ondofolo mende waneng, meahea mekai mekai rake kiyea yea hambong emere emere mokoye waneng pele heleng neng mokonde? 32 Pele romiyea a meahea meahea ye pele waneng Yesusre a elewate farisi holona yo borokate pele earene imam yunyun yeale farisi holona yealeyo Allahre ei mom mom imea kayare hebate yore ukaimi Yesusre ikileibote ekate. 33 Yesus yea weumi reyea nahiki bang mambele nanembainye nekemakonde pelera reyea erele, neyea ukeuke rakere mekali kiyea pokore bukerehinde. 34 Meyea reare beandekombe, peleyeare reare ei hubaikoi hangga haubihinebang, reyea erele anuwau meyea mateai bam, reai anuwau erenekende meyei ei hului.'' 35 Yahudi roiyea ehiyea ehire hineunge rakero mbelere endere eyea beamande horo neare ehuyeikoi hangga yea weume neai merau haungehike Yunani romiyea ekainekate yo nolone endere ha nawaneng Yunani romiyeare emmikelen milere? 36 Neyea rake ukeumi eyea beamandeyea ehubayei hangga nawaneng reyea erenekende anuwau meyea pelere ei hului, rake a maka meai?"'

Yesus Roh Kudus Na Kaliya Mekai Mokoye

37 Pele hamam bulau na huba mokoiya neai ya kabang hele mokaiboke naromiyea hebatere Yesus a kabang bea keaneumi hinye bukihubane kiyea, niyea mende reai pukore bu anunsinde. 38 Romiyea nahila rabo reare halenatele yo pele homo fea yolone molaikoke pele romiyea nakena uw eita walire yeumi bu wi no waneng rilenende.'' 39 Allahre na Roh enai yaronde aye Yesus hareungeboke Yesus neai a eleyere hilarabo halenate romiyea Allah re ra Roh ammibonde pelehee Allahre na Roh nammam emei haubihinebang pele Yesus hilire hebenainyele ya nammanne. 40 Yesus yea A elewoye borowate nolona romiyea ehiyo yea elate wali Ondofolo mende neaite, bere holo mende neaite, bere holo mende ayendo kayalo rake kiyea niyea heleya. 41 Ehiyo yea elate, rake niyea Mesias peleyeare ehiyo yea elate Mesias niyea Galilea ra menderene? 42 Rake homofea yolo yolone a yakalau boke pele wali Ondofolo nauw Daud yoho yonggora yakalambonde na anuwau Betlehem yora Daud neai nekeite nekewoye yora?" 43 Yesusre kenane pele holona romiyea kayee moloukoke. 44 Peleromiyea nolora ehiyo kena hele Yesusre ikilenaibondere peleyeare hiyea hayea ikileiboite mefeng eneyei.

Yahudi Falem-Falem Hila Rabo Ehalei Mekai

45 Allah re eimom mom imea kaya hebate ekate imam yunyun yeale, farisi holona yeale yo pokore pele kayana yore hinaimi makane meyea rakere eyaweisoi emei? 46 Pele kaya hebatere yoye waimi, eha mehi hele rake romiyea nekandera rokombai neyea elewoye waneng eleikoi meanggeai jea oboroiboimo!" 47 Farisi holona yea waimi pelemekainya neainya ame karebai keleumine mare mokombokembe hakaungoboko? 48 Eai yun-yun holona yeale farisi holona yeale rombai sambai pelekiyea wali Ondofolo yeubokene, a eleyere hilarabo ehaleimo? 49 Peleyeare rake romiyea heleng musare walora wali heere foloukokere kobu helene nare hilarabo haleainye pele romiyeare olomo yea neaimoboke. 50 Nikodemus farisi holona ro nabere hele Yesusre pukore meke kiyea neai holona yore weum. 51 Eai Musa walora wali here folaikoke homone, romiyea mbai mokouboke uw mekai wamekai nammam oboroiboi iteayeiboi jea, onoyoi hului. 52 Rakeyo Nikodemusre wainye Galilea kanina ro Yesus neai kahiliwa weyea naehi niyea ha? Allahre homo fea eyere nawaneng iteayebonde ayendo kayalo mbai Galilea kanira eyeiboi mo. 53 Belera, nemene na imaere-imaere eubate.