Pasal 6

1 Pelera nekaikoke, Yesus oro molouboke Galilea bukou enere, bukou Tiberias yea rainye. 2 Romiyea heleng buleng neai moita hakainyekoke, erewainye romiyea heleng ehayo puloyore foite mokowoumi onomi yarowate. 3 Pelera Yesus hemunggea mokone na murid-murid yeale ane raiboke nuwaikoke. 4 Yahudi neai ya kabang Paskah meunobeungekoke. 5 Pelene nuweuboke nekeye ijoko ereumi romiyea heleng buleng alainyekoke neai uw pukore maite, pelera meubeke Filipusre hineunge, romiyea nanemene aneneaikonde meai, eyea mbelera roija feu hubaye makonde. 6 Rake a mekai neyea Filipus reuw malire hubaungehike, na eare neai uteaite nekeunge makayea neyea harennembonde mokombondere. 7 Filipus yea weunge, "Roi 200 dinar yea yarandekoube feu hului rake romiyea hokoimiyeyere na hului bam, meahea mekai horo nanemene anenaikonde feu ebimbinde nawaneng Romiyea ehi heleng elaggoi hului. 8 Na moita ohowate ro hi naro Andreas, Simon Petrus naka beake yea Yesusre weunge, 9 Rakena fambai na feu meahea mbai yeale ka bee yeale honainyele peleyeare haubihire eyeiboi emeanggoi hului, rake ro heleng miyea hele de meufokoubokere?" 10 Pele anuwau kee yealene Yesus yea weumi pele romiyeare kee ranne anggeng ronaibonde. Pele romiyea meuhokoubere ro mo me maibeaikoke nanemene 5000 hului. 11 Yesus pele feu, ka yea yaroukoke, neako Allahre heleng foitemo ukeunge kaiwoye na moita ohawate yore yeiboumi, neyea rake romiyea heleng de wahewaimi, nanemene hubayewate angbuate uw wandere hubawate. 12 Uw wande roukatera, pelera Yesus namoita hakanyebo yore weumi ehamang anewate wande yea hubainye nukewaitere, emme arilenggombe na foi jea mengkolonggombe.'' 13 Feu meahea mbaira rake romiyea anaikoke wande yeaibokera, nakalung mai arilaikoke kaikau nanemene mee bee oro hine be yeale me peakoke hawaikoke. 14 Rake ha emere yakalaumiboke ne, pele romiyea meuhokouboke faka yea poibuate na a yeale elate, rake kiyea nana hesele Allah neai yendo kayalo rake kani kelare mendere elewate kiyea. 15 Rake romiyea heleng meufokouboke merau hainyehike neare ranenanyele neai ondofolo re yembondere, pelene Yesus iteayeuboke nauw mbai aloungekoke mokore eiboye.

Yesus Bu Randa Aloungekoke Euboye

16 Rakewainye be baheubokene, Yesus namoita ohowate yo bu heate mekate kaiy einye aisawaboke. 17 Namoita ohawateyo Kapernaum de awaufoke, pele reniai onggem neke, na waneng pelehe Yesus emei yakalaiboimo. 18 Alu randa awaufoke, ruwa kabang hayeumifoke. 19 Na heki awayeke 5-6 km hangga, naijoko erainye Yesus neyea bu randa oro aloungekoke meye neai kaiy keleaike nobeimiyeunge pele ekainyelere neyea feema ko yea yaroumikoke koibuate. 20 Peleyeare Yesus yea weumi,rake reyeaya, meyea feere efeai jea. 21 Nakena elea moloumiboke, reimai aumiboke, Yesus pelekaiy einye filenggo ndere riyainye hee, namekai pelehe yea eibuate nahekibang hele na ishouwnge aibararauboke.(Romiyae Helem Yesusre Baeubanyele) 22 Ya naheuboke yea romiyea heleng bu habala reufine nukaimiboko yo wena erewate pele anuwaunge kaiy mbai hele yaiboye nawanen pele kaiy mbai hawaiboke naisike awayeke Yesus pele kaiy einye eihebeinyui. 23 Yesus feuke heleng foi a eleukokera ikeumi anaikoke ijene Tiberias yone nekate kaiy ehi pelene yaibuate. 24 Pelene roheleng miyea heleng erewatera Yesus na mekai namoita ohowate yo yeale beaimikoke olone. Pelena kayi yaibuatera haubuate kulum ukate, Yesusre beaikoite Kapernaum yore foibate. (Yesus Walire Nekemale maei Feu) 25 Rake romiyea heleng Yesusre beaibanyeyo. Mekatebu koba reubihine maihubayaikoke ne, rake yoye hineinyele, Guru mbele hee yea weyea rake anuwauke mekea?" 26 Yesus yea weumi, reyea nahelere yea wamale, ma mekai reare beaimiyaukele, reyea hambung emere emere mokalere iteayeaboke earene bam, neai nahele meyea feu anaukoke wandene yeaboke pele earene. 27 Kakaneai ehamang roweyere pelere eimokoi jeamo, wali hena neai ehamang mea pelere roibu palenete pele elea einye weyea heneye, wali hena akore kelu weare inyete naeare nembai hele ako, Allah neare mee neke.'' 28 Pelera rake romiyea yea wainye, neai hesele meyea makayea mokoite mokoma bonde. Allah neai kenare koye ijene akengbonde. 29 Yesus yea yore weumi, rake niyea Allah neai kenare koye hului meyea mahilarabo nearemo halennele, Allah neai na uwne hareungeboke kiyea. 30 Pelera nearae a hinainyele, maka haeme yea keleumebonde meyea erema yeubonde nawaneng weare nahelere me beama yeubonde? Nawaneng maka kalia yeare weyea mokoyea? 31 Nabeere meabu neai meakonea a kalakala anuwau meibuatere, hamang manna yeibamu anewate. nahimone molaukoke pele yore Surgara inyale kolowaimi.''' 32 Yesus yea pele yore weumi, reyea aheleyea wamale, pele Musa yea bam mare feu yeubombe angbuauge nanahele pele surgara meako neneaijea inyale kolowombe wali hole molombokombe. 33 Haubihinenbang, Allah neai ehamang hele Surgara rake kani kela einya walire elea moloumi nekate. 34 Peleyoye riyainyele, Tuhan pele ehamang meare yeale yemmele anemande.'' 35 Yesus yea weumi, reyea walimeai hamang nano, romiyea hinye reai pukore mende kiyea, neyea monire ekoi, nawaneng hinye nahila rabo halendelena na buki reyea hoberenggonde. 36 Peleyeare reyea mare a ukamale, meahea horo eyea menea ijoko ye eraukeboke peleyeare meyea reare rabo eihaleija. 37 Meakoyea kiyeukekoboke romiyea, nanemene reai me uw kelene nekenate nawaneng romiyea reai uw pokore mende kiyea, reye neare ei hawerende. 38 Haubihinebang, reai kena korele huliijea reyea mokorelere bam, peleyeare neyea, reare ukeuke mekale neai ijene reyea mokorele. 39 Rare ukeuke mekale kiyea neai kenare koye rake niyea, Romiyea nanemene reare kinyewouke holona mbai sambai ewaisiy einundei, peleyeare neai huba mokoikoi yane reyeaa areminunde wali hena bona enaiyaronde. 40 Rake niyea meako kenare koye waneng romiyea nanemene reare eratele nawaneng ro raitele rabo haleainyele, walihena bona hubanayanenggonde pele holona huba mokoikoi yane reyea areminunde.'' 41 Yahudi romiyea pelene hebate Yesusre a mulum mulum bea elate huwate na eare neyea Surga yora oke wali meai hamam neai uwne rouboke. 42 Na a mulum elate, niyea Yusufre kelumbea, nenake neako eyea eatei meahea mekaijea niyea eleye reyea Surgara okale?"' 43 Yesus yea pele yore weumi, meyea makameaijea a mulum mulum elaube. 44 Rohi miyea hiyea reai uw pukore neneai kenayea emei hului, pele kiyea reai uw pukore mendere, meakoyea kena annebondere, neai uw ukeunge oke uw pukore nobennenggonde. 45 Nabi-nabyea neai homofeane molaikoke, romiyea nanemene Allah nenai kelengmile alonemile, pele uw teai wateai akorera borokate aibokera pele eita reai uw nobere nobenaitekonde. 46 Reyea meako yea ukeuke mekale kiyeamo meakore ereungebokale hi yea hayea neare ijoko yea ereiboi. 47 Reyea mare wamale. Romiyea hinye nahila rabo reare halendele, neyea wali hena bona endowende.' 48 Reyea mai wali inyale. 49 Mai abuneai ateai neai akala kala anuwau meibuatere. Allah yea Surgara haman Manna yeiboumi anewate, yea peleyeare nanemene masereu boke. 50 Hamam aneikoyate wali eleare yeumi waneng mbai, reyea Surgare okale wali henare itemilere. Romiyea hinye rake hamam bea anenggondene neyea here re eiherei. 51 Reyea walire itembe Hamam Surgara okale, pele hamam hinye enaneggonde neyea walihena bona nekende nawaneng rake hamam itembe kiyea pele reai uw melem rake kani kelare holerebondere.'' 52 Rake a ukeumi ra, Yahudi romiyea neneaimo akure yeuboke hate, elate meahea mekai jea neai uw meleng heleba eare yemmile anemakondere. 53 Pele romiyeare Yesus a weumi, reyea mare wamale meyea akore kelu na uw meleng emeanggoi namekai na ro oki ro ha emeansiy mei uw einye wali eneikei hului. 54 Romiyea hinye reai uw meleng anenggonde, namekai reai oki roha anensinde niyea walihena bona endowende nawaneng huba mokoikoi yane reyea ere anurunde. 55 Haubihinebang, reai uw meleng pele hamang hele nawaneng rokiy roha pele bu hele aisiy meai. 56 Hinye reai meleng anenggonde nawaneng roki roha anensinda, niyea reai einye nekenende, na mekai reyea neai einye nekerende. 57 Meako yea ukeuke mekale waneng, pele waneng reyea meako einye nekale pelene hinye reainya uw tea wateai yeamale, pelere hinye hamam uw bu uw waneng anende anensinde, pele romiyeare nawali reyea hole morende. 58 Rake hamam Surgara oke, maiabu ateai neaijea anewate hamam waneng bam, namekai nanemene maisereuboke. Reyea wamali hinye Surga ra oke hamang rowende anenggonde, niyea wali hena bona nekenende. 59 Rake a nanemene Yesus iteayewoumi, pele Kapernaum ei mom mom imeane.

Yesus Na Yebaei-Bubaei Helem Nukainyeboke

60 Yesus a iteayewoumi, namoita ohowate yo yea elate, rake a na elea heleyea eleukoke, hinyeyea nahinggi boronnebondere? 61 Pelene a yakala yea weumi, reai yakalamalere pelemba mai hila rabore kusembe? 62 Nawaneng meyea mbelera erembombe, akore kelu engkitende neai nekeye anuwauke yende. 63 Roh einye wali honounge, uw meleng wameleng haubihire eiyeiboi hului namekan reai a feau wamale iteayamale, pele Roh walire yeumi a yea wamale. 64 Peleyeare mai nolona reai elalere nahelere eleikoi, pelene Yesus nateai hinye nahelere eleikoi, nawaneng hinye yea me kemere nennele kiyea. 65 Pelera na a weumi, na ambai mare nabeere yakalambokamale, rohi miyea hiyea reai pukore mendere, pele meako hele pele kiyeare wennehinde mende.'' 66 Peleheera Yesus namoita ohowate yo, heleng uwkaiboke nawaneng neare e hakoiboi. 67 Yesus namoita ohowate yore weumi hineumi, mai kena uwne rake yo ukaiboke nukateboke ate waneng embere?'' 68 Simon Petrus yea weunge, Tuhan meyea neaisele hinye pukore emalere? Weai a feau iteayamea, pele wali hena bona meai ako feauko ya. 69 Meai hilarabo eita keleume, weyea na neenee weeweemo, Allah neai uw hele ya.'' 70 Namoita ohowate yore Yesus yea weumi, Reyea mare meebee oro neng bee yealere ro elengbokamale, peleyeare mai nolona mbai keng kena uwne walobo yea nekeye.'' 71 Yudasre a, Simon Iskariotre kelu, nauw mekai ayea hareungeboke haubihinebang, rake ro yea Yesus keeme me nende emmiyende.