¹ Mainyekeukokera mo, Yahudi neai ya kabang na hamam bulau ya belene Yesus Yerusalem yora kulum uke Gallilea kanira oro molouboke eiboye. ² Yerusalem yore, dombare ele yanainyekoke kate romau nenene, bu kou mbai yaye, Ibrani neai a feaubea Betesda yea rainye, nawaneng pelene beanggo yeale norofa mehea mbai, yang bea heaikoke. ³ Pele anuwaunge ehayo puloyo heleng mekai honate, ro miyea ijoko kumba yo oro rebeite rebeaiteyo oro me nimewaimi yo yeale honate. ⁴ Haubihinebam, pelebukoune rokombemba Allahre malaikat oyowoye pele bukou na bu neunge kuba eyakoye. Hinye yea bere oro molombonde enensinde kiyea neha pulo koye hubaye nameahea horohele releunge, pelene onomi roweye. ⁵ Rake anuwaune ro mbai yaloyakama 38 hele ehe pulo koumeke. ⁶ Pelero honowoyere Yesus erekeungene, nawaneng iteayeuboke, napelemekai mo yea heki hele honowekere, pelene Yesus yea hineunge weyea onomi roweyere kena koyea?" ⁷ Pele royea weunge Tuhan rakena romiyea bu eiakowoyene heene reare rowendele rake bukou eite handebonde neaite u. Reneaijea pele buer nakeleijale hee, ehiyo moi woyaitele neyea bena eyakoikiyate. ⁸ Yesusyea weunge ainyu wakewa yungmake yaroiko aloinyoko eye.'' ⁹ Na pelehemo rake ro onomi rouke makewa yungmakere mo yaroukoke aloungekoke eiboye. ¹⁰ Pelene Yahudi romiyea yea, rake ro onomi re rouke wainye, mana Sabat ya eai Yahud neai wali heere foloukuke homo huluinye Sabat ya kabang ne eyea kewa yungmake ekeaiboi ei hulu. ¹¹ Peleyeare rake ro neai a weumi, reare onomire ikeuke ro yea ukeuke huluinye pelene rakena yungmake yaroukoke aloungekokale male. ¹² Peleyeare rake ro neai a weumi, reare onomire ikeuke ro yea ukeuke huluinye, pelene rakewa yungmake yaroukoke aloungekokale male. ¹³ Peleyeare onomire rouke ro, neyea itiyang hinye yea onomi ikeunge haubihineban, Yesus pele ikainye oro molouboke, eke ro heleng miyeaheleng nolone euyaneukoke. ¹⁴ Pelera, Allah neai yoimea ralo imea einye, Yesus onomire ikeunge rore hubayeukoke mo, na weunge, weai uwna huba ungehike waneng nahimi weyea onomi roukea, beneng uwnebang wanebang eimokoijea. ¹⁵ Pelero iteayeubokera, Yesusyea onomi ikeunge, pelene eke Yahudi romiyea hinewainyelere Yesusre ro yakalau miboke. ¹⁶ Sabat ya kabangne rake rore onomi ikeunge earene, Yahudi romiyea Yesusre anebang feaunebang mea eleiko huwekore koibuate. ¹⁷ Peleyeare rake yore Yesus yea weumi, meako Allah neai hambung na yane mokoijeye, reyea neai mbai jea mokale. ¹⁸ Yesus Pele a ukeumine, Yahudi honaibonde nibiyea beabate, Yesusre honaibondere naeare, Yahudi neai ha henane Sabat yaneeimokoi kiyea Yesus moi woke mokouboke nawaneng Allahre Yesus neai eleye walora Allah neai uw Mbaija. ¹⁹ Pelene Yesus rake yore weumi, reyea nahele yea wamale reyea Allah re kelu pelene reai kena huluinye hambung ehire emokoi hului meakoyea mokoye ijene, reyea pelene erale mokale. ²⁰ Meako reyea neai kelune buhea heuke, neai hambung mokowoye nemene reare keleijeuke, rake rore onomi ikanalera beneng hambung emere emere emeikai jeale, pele meako yea kelendebonde reyea pele hambung eremokondene meyea faka yea embombe. ²¹ Meako yea romiyea herewate yore ainyainyu koibuomi wali yemmile waneng mbai, reyea kena korele romiyeare wali itemile. ²² Nawaneng romiyea walire, meakoyea hulu ekoloi. Pelene walire kolommilere nanemene reyea nakelu niyea kinyeukeboke hakeikeboke. ²³ Pelene earene romiyea nanemene meakore be hinenainyele yo, pele hului mba reyea na kelure be hinenatele, romiyea hinye nakelure ehineiboinya, pele kiyea ako Allah rake ukeuke mekale kiyeare be ehinei. ²⁴ Reyea nanahele yea wamale, hinye yea reai elalere borombonde, namekai reare ukeuke mekale kiyeare A eleyere hila rabo halendena, walihena bona rowende. Walire hului ekoloi pele romiyea Allah yeale waheukoke wali waneng wekeunge, reyea wali ondofolo yea keleamale wali nibine ohoye. ²⁵ Reyea mare iteayamale, nayahu mendere mana peleya meke romiyea ai herekate yo neanggeai aleinate Allah nakelu a boroibonde walire enai anayunde. ²⁶ Haubihinebang, meako neyea walino, pele hului mbai reyea nakelu mokoukeboke wali nore meiyeubokale. ²⁷ Reyea Allahre pukura mekale romiyea uwre meuyeubokale earene romiyea nawali huluinye koloremile meai elea Allah yea reare kinyeukeboke hakeukeboke. ²⁸ Enaibende neai a yakalamalene, meyea fakare eboijea hele pele naya mensembonde, herewate bule einye honate romiyea nanemene reai a boronate. ²⁹ Pelera bule eita menaibalende romiyea uw mekai foite mokayeke holona wali hena bona emmi yende, peleyeare uw mekai nebang de mukayee holona me emmi noyonde neai amminunde. ³⁰ Reai huluinye reyea hambung mbai sambai emokoiboi hului meakoyea wendele huluinye romiyea neai wali hului kolameale nawaneng naijene hele reyea wali hului kolameale, haubihinebam reai kenare korele ijene ehakoi, meako reare mekale kiyea kena konde ijene mokorele. ³¹ Reai uwra neneaijea a iteatemilena, romiyea ehiyo reai elalere a hele bam bea elenate. ³² Reai aiteayamale hinye yea yakalammile pelere reyea iteayeu bokale pele neyea ukeukere a heleyea yobounge. ³³ Reai uw meaite iteayembomberene ehiyore ykaimile Yohanes bukoumi kiyea pukore ekate nawaneng neyea reai nahele re neyea ahele feauhele yakalambe. ³⁴ Reai uw meaite iteayembomberene ehiyore ykaimile Yohanes bukoumi kiyea pukore ekate nawaneng neyea reai nahele re neyea ahele feauhele yakalambe ³⁵ Yohanesre ako feauko pele iy hehe neaikiyoye waneng mare neamggokombe peleyeare meyea na mom mbai keng pele hehe neakokere reimai kena re mo molom bokombera eweufike. ³⁶ Reai uw neai a feau iteayamale, na be roiboite Yohanes yea iteayewombe meakoyea reare ukeuke kaliare nammam mokale, pele meuw yea mo keleijembe, nahele meako Surgana rare ukeuke mekale. ³⁷ Meako ukeuke mekalere. Niyeare mare iteayembokombe, meyea neai are eboroiboi, namekai neai uw meyea eyereiboja. ³⁸ Namekai meakore eugara eleyea feay makena ei uw einye ehonoi haubihi bam, ako Allah reeare ukeuke mekalere peleyeare reai elalere meyea hila rabo ehalei. ³⁹ Allahre homofea meyea uw niheisiyaunge, iteayeaube, mai uw benera nekayembe. Pele homo fea walora wali hena yarombe peleyeare Allahre homo feana a feauko hameungekoke reai uw neai ayea mai iteameyayembe. ⁴⁰ Peleyeare meyea wali hena bona yarombere, reai mekele uw kelene nekembere ahi hele elaube. ⁴¹ Reai foi neaite hinye meanin mea elenate neai reyea ereai. ⁴² Peleyeare, mai kena ei uw einye nekembe ha reyea iteayeubokale mawali nekaube Allah kena buheare u hele ya. ⁴³ Meakore ro yea reyea mekale. Peleyeare meyea ei hawe yaunge. ⁴⁴ Meyea rare hila rabo ehalei hului, haubihi mae bam romiyea mai uwre kanembe neaite meyea ebeayei? ⁴⁵ Ako Allah nakendang wamerang bene, mai uw mekai nebang earene reyea mare a ehoroi, pele Musayea mare a horonenggombe meyea uw bene nekayembe neai a moloukokere hubara heaita yanaunge walora wali hole molonembombe. ⁴⁶ Musare A nahele yea elaukoube yea, reai a elalere meyea nahele yea elau be, haubihinebam Musa neneaijea reai neai a neneai ja moloukeke. ⁴⁷ Musayea moloukoke are meyea pelere rabo eihaleinya meahea yea reai elalere meyea nahele peambombe?"