¹ Yesus, neakorAllah re ebeli boungeko kera mo, neyea na Murid-murid yeale alanyekoke kidron wiu reufire ekate anuwau mbai nye ayeuboke pelene eka inekewate. ² Yudas, Yesus na Murid, niyea yesusre keeme me nende kiyea pele anuwau neyea iteayeuboke, rakene Yesus na Murid yeale meinyekate. ³ Yudas kea pele anuwaune felayo homo mbai hubayaikoke nawaneng imam iman nakun nawaneng Farisi romiyea pele anuwauke mecbate namene kaijeu roraiboke na fela yeale mekate. ⁴ Yesus rake hambung na uw ne benate re, neyea na yobolo iteayeubokena uw bere eke hineumi, meyea hinyeyea beaunge?" ⁵ Pele yo yea wainye ''Yesus Nazaret." Na ro pelere Yesus yea weumi reyea Yesus, na ro niyea. Yudas keme me re nende ro pelene nemmbembane hebate. ⁶ Yesus neai ro yakala yakalubokera, rake romiyea moite ukewate nawanen kani aranne palewate. ⁷ Beneng kiyea re Yesus yea hineumi, meyea hinyeyea peaungele? neyea wainye ''Yesus.'' Nazaret na ro." ⁸ Yesus yea weumi, "Reyea mare yokala a ukamale, reyea niyea yea Yesus.'' mai peaungele kiyea rake yo meyea weammehi ai. ⁹ Rake penate yakalanate, pelere Yesus neai a haufike inyaibonde meai a. Pele weyea reare kinyeukebokea rea ra, ehi mbai jea e kalai boi hului.'' ¹⁰ Simon Petrus reaimiyeale nameyea euyobougoke rouke imam na uw mokoi neanggeai meugena kiyea re pele reaimiyeali yes oyeiboke neufake pele Imam kabam na uw mokoi neai ro, Markus yea weibanye. ¹¹ Pelera ''Yesus, Petrus re welinge, "Wa reai miyeali rowei aubo! Bu koleainya fearemo andehinde waneng mea meako yea ukeuke mokorebonde weai uw bene nekete pele me uw reyea emokoi ha?'' ¹² Pelera, fela yun na kelena yo, pele Yahudi yea ukaimile ekate na abu ako yeale Yesusre ikilauboke, nawaneng ha yea wokainye ikilainyekoke. ¹³ Pelera Yesus yawanyenoke, nabere hele Hanas, pukore Kayafas, na miyea neako ''neyea pele ralo yakama einye Imam neah yun kabang de nekowoye. ¹⁴ Na bere Kayafas yea Yahudi yun yun de a uteai weumikoke Rake yo kabang hole moloubotte, kaho ro mbai pele engserende. ¹⁵ Simon Petrus pele murid mbaite, nanembaita Yesus hakainyekoke. Rake murid mbaite pele Imam yun yun neare naiteai mo. na mekai Yesus neai Imam -imam neai imea houwke ayeuboke ekate. ¹⁶ Nawaneng Petrus nammang eite eiyeisiy, neyea romau kelaunge mahebeye pelera na murid mbah kiyea eita meukuke meke miyea ro mau kayare hebeye a eleikokotera, pelera meke Petrus yea yaweungehoke eyarulebokote ¹⁷ Pelera ra miyea ro mau kayare hebeye yea Petrus re hineunge rake wiyea nehi niyea na murid re yeubokea, Petrus yea weunge reambele bang. ¹⁸ iy tukainye iy kolaiboke''pele abuko nawaneng felayo romiyea yeale iy ne akelewate pele he huwea hing bea neke uw re mandiling bea nekeumi kulukulure koibate. Petrus nambele pelene eumibarauboke a huba mbainye elate huwate. ¹⁹ Imam-imam yun yun mekate Yesusre na murid-murid nawaneng neai keleu mi ayea mekai hinainyele. ²⁰ Yesus yea weumi, rake kani kelana romiyeare, reyea na a yakala yea iteai yeumikeameale. Reah uw alle sinagoge sinagoge ne nawane Allah na yo imea ralo imea ne mbene Yahudi romiyea mei arileye ijene reyea na a yaka feau yakala yea mo weibea meale. ²¹ Pele a makare reare hinaukele?'' meyea meneai jea pele yore hinemmi makayea neanggeai jea borowate, reyea a elewale weibeamealere? ²² Yesus rake elea ukeume ra pelena rombai kaya ayainyeko hebate yea Yesus na bee me fea yea uke, na a weunge Imam yun yun de a na mekai jeale weumi be?" ²³ Yesus yea weumi, reyea a na ikainya waneng ukamalena, pelene riyamale pele ikai na yakalambokaiere reare iteayen dembo, na mekai rea a elekokale pele nahelena, weyea makane reare haubuheare ukearea?'' ²⁴ Pelera Hanas imanyun Kayafas pukore Yesus na ha ikilanyeko ke yeale ukeumi yawainyehoke ekate. ²⁵ Napelene, Simon Petrus neah nekate jene a bubu elate huwate ra neare hinainye, "Weyea nehi niyea, neai murid re yeaboke? Petrus a wake yea meleyea weumi "Reyea rambele bang!'' ²⁶ Rombai pele abu ako neai imam yun mokounge, "Namekai na akobea neanggeaite neufake yea rounge bokere.'' A hineunge weyea. Nehi ro niyea yea, pele anuwaunge erekawale yea? na waneng Petrus yea weunge, pele riyea rambele bang?" ²⁷ Petrus pele a wake eleukokera, ojo muku a koukoke.

Yesus Yawainyehoke Pilatus bere Ekate

²⁸ Yanarene kaukau hele, Kayafas anuwauke Yesus yawainyehoke Gubernur imea einya are kolainye obere ekate. Yahudi romiyea Agama huluinye nau niku yeale inyaibonde yealene, pele imea eite ei haubihine bang paskah ehamang kabang bulau nambele anenaikonderene. ²⁹ Pelewanengne Pilatus moite eukuke hineumi, "Meahea waneng bea uw nebang mokoubokene meyea rake ro re arunaungele?'' ³⁰ Rake yo yea wainye, neyea nebang emokoiboinya, meyea maka bande weai pikore yawannehoube mande?'' ³¹ Pilatus yea weumi, ''Yawennoho.'' Meneaijea embe hinennele''mai wali hee re foloukoke honoye huluinye ehe pukulu yennelepele Yahudi romiyea yea wainye, "Pele ro hoiboite meare eweaisiy bambea." ³² Rake waneng bea Yesus, neah herendere neai a eleukokere huluinye yembonde. ³³ Pelera, Pilatus are kolainyele imeare eite eke, "Yesusre kaneungekoke mo hineunge, weyea nahele Yahudi neai ondofolo?'' ³⁴ Yesus yea weung, "Rake a waneng hinarea, pele weai kenara hinarea romiyea ehimeata ukayete yea warea?" ³⁵ Pilatus yea weunge, Weyea reare erarea reyea Yahudi na romiyea bang? Wa romiyea Imam-imam yeale, weare reai me eite kinyaiteboke, pele weyea maka me uw mokoubokea ne?'' ³⁶ Yesus yea weunge, "Reai yo waku rake kani kelana bang ma. Rake kani kela yea bea, reare Yahuni neai me eite kinyaiteboube earene reai holona yo isang fela releainyele, peleyeare rake kani kela reai yo waku bang ma." ³⁷ Pilatus yea weunge, "Pelewanengna weyea Ondofolo ha?" Yesus yea weunge, "Weneai jea a na ijene reare warea reyea Ondofolo pele earene reare honggatele namekai pele kenane nahele neai a reyea iteai temibondere rake kani kelare mekale. Romiyea nahele neai a itea yeamealere kena kate yo reai a re boraitele." ³⁸ Pilatus yea hineunge "Nahele re neai a re pele meahea mekai waneng?'' rake a re mo hineufike, Pilatus imea eita eukuke eke Yahudi ro miyea re weumi, ''Reyea neainya nebang mbai ehubayeikoi sele. ³⁹ Peleyeare mai eha hena honoijeye huluinye rake waneng. Paskah ya kabang kawana hebate rombai reyea hayeikiyanale meyea kena kaube mai neaite reyea Yahudi neai Ondofolo hayerenggondere?" ⁴⁰ Pele yo kela ara nene kanate wainye, "Neyea bang meare Barabas yea hayeinyeko!" Barabas niyea yokore beaiboye ro.