¹ A uw iteai huba mokoungekokera ''Yesus yakuure be weukike wa eleye rake hee na hului meijeuboke." Ako reyea wa kelu niyea weare hili erei sebeite neaite reare hili hebeite ² Haubihine bam weyea kinyewarea ro miyeare wali henabona itemile re weyea reare elea ikarea, ro miyea nemene foemene mere mokoremile. ³ Wali hena bona na uw bea niyea. Pele Yesusre ro rainyeboke, Allah nauw hele niyea, nawaneng Yesusre rainyeboke Allah neneai jea ukeunge oke. ⁴ Reyea weai hili rake kani keiane meufebeukokale weai ukarea kalia einye meumokolakokale. ⁵ Ateai, rake kani kela emokoi koi heene weai bene reyea nene weawea yeale hebewale. Rake hee wa kendang wamerang bene pele nene weawea mbai beleyea buma kaitebo. ⁶ Weai ro rake kani kelana romiyea kinyewareare reyea iteayeumi bokamea le mo pele romiyea weaite yeaiboke awaneng weai ako feaukore ijene hakaikoke mokoimiyate. ⁷ Nawaneng niyeaa iteayeaiboke, nanemene yeibarea re pele nemmene weai ta hubayewale mo. ⁸ Nawaneng reyea weai ako feauko uwteaite yeibameale, pelere neyea hakaiboke roukate namekai neyea nanahele iteayeai boke reyea weaita mekale kiyea, nawaneng neneai naraboyea haleate elate weyea hele, reare ukearea rake kani kelara mekale. ⁹ Reai ebeli rake yore borele. Haubihinebang rake romiyea eleukokea pele weai te me beaubokea peleyeare rake kani kelare reyea ebelire eboi hului. ¹⁰ Reai nekaitele pele nemmene weai mo, namekai, weah nekayete pele reai mo nawaneng pele nekei kaunge reai hiu ekai hebai tele. ¹¹ Reyea rake kani kelara erele peleyeare ra romiyea waromiyea rake kani kelane nammang nekate-pelene ateai wa bukore male ko royolo yolomo, weyea hirong kaya hebeimile weai ro einye Rimayawale. ¹² Neai bukone mbainye nekawande, reyea kaya weai ro einye hebeumiwekale naawaneng mbaijea ekalaiboi peleyeare nebang de endabulendere kelu pele ako feako homo fea einye na hului rayene nuwembonde. ¹³ Rake hee reyea mai bukore mekale, nawaneng rake kani kela ne mare a weibamale' pele meyea reai nya rei mai meamearemai kena einye harwerembe melei meleite ennemelenembe. ¹⁴ Weai ako feauko rake yore nenemene ninea yeibameale mo pelene rake kani kelana yo yea neare me kena uw kenayea roraimo naeare neyea rake kani kelana bang romiyea namekai reyea rake kani kelara bang yea. ¹⁵ Weyea rake kani kelara yaweimi bonde enaibalendere bang, peleyeareuw mekai nebang nawalobo wabemmilene weyea hole moloumibonde. ¹⁶ Neyea rake kani kelara bang, namekai reyea rake kani kelara bang. ¹⁷ Ateai weai uw mekai mekai waneng pele holona yore weai ako feako yea yoloyolo mokoimibo weai ako feauko na hele noya. ¹⁸ Weyea reare ukeare mekale waneng, pele mekai reyea rake yore ukemile kani kela kabang nolore enate. ¹⁹ Rake yo earene, reai uw yolo yoloyea nekerele, nawaneng rake yo mahele einye kolo naimile. ²⁰ Reyea neaite mo ebelire e boi, romiyea ehiyo reare hilarabo haleatele neai keleaimilera, pele yore yeale rebeli bale. ²¹ Neyea nemmene mbaite inyaibonde weyea ateai reai einye nekeye waneng reyea weai einye nekale, pelewaneng bea neyea mbaite inyaibonde eai einye, pelera kanikelana yo nahelere elenate rabo halenate reyea mekale weyea ukearea re elenate. ²² Eyea mbaite yendeboke waneng rake yo mbaite inyaibondere ne ateai reai nene weawea keteukebokea rake yore kinyewameale pelene neyea pomo awonaibonde mbaite inyaibonde. ²³ Reyea neai einye nawaneng weyea reai einye peleng neyea mbaite nyaibonde, rakera iteayenate weyea reare ikare mekale nawaneng weyea buheare heamea peleme weyea reare hearea. ²⁴ Ateai, rake kinyeu kebokarea yo, kena kale mbelene rambele mbainye mo nekemale, pelene niyea eranate reai nene weamea weaita ikarea re iteainyeaibonde weyea reare buhea hei miyea rea rake kani kela eyeiboi hee ra. ²⁵ Eteai wali ijemo ro meahea horo rake kani kelana weare ro eroiboi, peleyeare reyea nafoi sele weare roubokawale nawaneng iteayeubokale weyea reare ukarea rakere mekale. ²⁶ Weai ro reyea iteayeumi bokeameale namekai na hibi hibi mo iteayeremilere pelene weai kena buhea hei jarea reai wali einye nekeye waneng pele ko neai wali einye buhea re heumile nawaneng reyea ere heremile."