(Saulus meke Yesusre abu akore yeuboke) ¹ Saulus meli-mekai baeuboye Yesus Naei abu akore hondere, ² Imam kabamre weunge, "Homo ratai yete, Damsik yona Sinagoge-sinagogere erelemo, ro miyae hinye Yesusre hila rabo halende kiya, yaweremile Yerusalem yore memale walanggane hilemamile hebenate. ³ Damsyik yo nebewounge, yakura wili neke, Saulus na u yaneungekoke. ⁴ Saulus ane ruke, belera anggaei boroye a mbai meke weunge, "Saulus, Saulus, mekane Rare u nebam-wa nebam mokare?" ⁵ Saulus bele a mekere hineunge, "Weya hinye Rowa?" Reyae Yesus, weya u nebam-wa nebamre mokare Kiyae. ⁶ Anyu, Damsik yore eruleisi, ware mekayae ungayete ha weyae bele yae mokoubonde. ⁷ Ro miyae Saulus naei nembainye eubate yo, hebaeiboke a mbai sambai eleikoi, bele a mekere bele yaere na ijoko ro mbai sambai ereiboi hebewate. ⁸ Saulus ane rukera aunguke na ijoko erewoye, bele yaere na ijoko haubihi ereiboi sangga. Ro riya mbai yawainyeheko Damsik yore arulaiboke. ⁹ Ya name Saulus na ijoko ereimo nekeukoke, namekai hamam, bu emmaeneimo nekeukoke. ¹⁰ Damsyik yona, Yesusre hakanyekoke ro mbai naro Ananias, Tuhan meke weunge, "Ananias!" Ananias weunge, "Reyae rake niyae Tuhan!" ¹¹ Tuhan Ananiasre weunge, "Anyu, aloinyekoke, nibi mbai naro Jalan Lurus, Yudasre imaere eye, ro mbai naro Saulus, ebeline eke boye. ¹² Saulusre nibi keleungebokale, ro mbai naro Ananias waei bokore meye, me wa u ranne raneufinde namekai wa ijoko keleneukonde ereye." ¹³ Ananias yae weunge, "Tuhan, ro myae maeita helem anggaei borowale, bele ro re wali, Ware hila rabo halaete yo Yerusalem yona nekate helem me nebam- u nebam mokowoumi, houboye hayewoye, ¹⁴ Rake Damsyik yone, Imam- kabam homo ikainyele, ro miyae Ware hila rabo halaete yore kilende, yawemmile Yerusalem yone walangga einye hammilere." ¹⁵ Bele yaere Tuhanbae weunge, "Eye, bele ro Reyae eleibokale, mare yawenembombe Raei Rore rake yo yam, ondofolo-ondofolo ehi-ehi nekejate namekai Israel yoni-yoni re yawenembombere. ¹⁶ Reyae nare kelerembonde, Raei Ro aerene helem sele me nabam-u nebam kelenainyele." ¹⁷ Ananias aunguke Yudasre imaere eke, Saulus na u ranne name raifike, weunge, "Saulus, Saulus, Tuhan Yesus Na u yae keleibokete Damsyik yo maunge, rare ukeuke mekale, wa ijoko keleikonde ereye namekai Allahrena Roh wa u bulu-wabulu mae-mae koneukonde nekeye." ¹⁸ Bele hu ijoko mbai, ka ninggei mekai Saulus na ijokora kulaiboke ruke, Saulus ijoko keleukoke ereye. Saulus aunguke, bu raungehike. Saulus Yesus Na ako faeuko ro miyae huboumi. ¹⁹ Hamam anaikokera, Saulus ela rouke, Yesusre moita ohowate yo yaele Damsyik yone ya mehae-mehae nekaikoke. ²⁰ Saulus sinagoge-sinagogene Yesusre a foi-faeu foi keleumiyeke, ro miyaere weumi, "Yesus nehale Allahre hinafa hoifa ya." ²¹ Ro miyae helem borowainyele ei molowainyele, elate, "Rake ro yae Yerusalem yone Yesusre aerene ro helem houboye, rake yore meke Yesusre hila rabo halaete yore kilende Imam-imam bere Yerusalem yore enaitere?" ²² Saulus elae hele beuboye, Yahudi ro miyae Damsik yona nekateyo onewate, Saulus weumi, Yesus nehale Kristus ya. (Saulus Yahudi maei me eita ewefike) ²³ Ya mehae-mehae nekaikokemo merau rainyehike Saulusre honaibondere. ²⁴ Yahudi ro miyae merau rainyehike, Saulus itayeuboke, Yahudi ro miyae reniyai-rai mau kabam, nemene kayaa hebawate, naei kena Saulus honaibondere harainyeboke. ²⁵ Saulus namoita ohowate yo, reniyai jae Saulusre keranjang mbainye aiboke, ha kilaikoke, nokainyele are oke. (Saulus Yerusalem yone) ²⁶ Saulus Yerusalem yore meke bae, Yesus Na moita ohowate yo yaele barambondere, bele yaere ahiyae elewate, namekai fe yae koubainyele, elate Saulus aei holona bam ya. ²⁷ Bele yaere Barnabas yae Saulusre elae ikeunge, namekai yaweungehoke rasul-rasul bokore mekete, ahuba huweumikoke, Saulus na nibi a ohoukokera Tuhan kaeneungekoke, a ukeunge namekai Tuhanrena a foi-faeu foi Damsyik na yore weuboumi. ²⁸ Saulus nembainye barauboke rasul-rasul yaele Yerusalem yora elesi-akoibo kayeke, Yesus rena a foi-faeu foi huwaimiyeke. ²⁹ Saulus Yahudi ro miyae yaele Yunani ro miyae yaele a nembainye roraiboke kilewate, bele yaere rake yo Saulusre honaibondere merau kolowainyele. ³⁰ Aka-baeke hila rabo mbainye halewate yo itayaeiboke, Saulusre yawainyehoke Kaisareare ekate, ukainyele Tarsusne eke kelewoumi. ³¹ Belene yae jemaat Yudea kanina yo, Galilea kanina yo namekai Samariana nekate yo onomi hele hubawanyele, Tuhanre einyemo nekewate, Roh Kudus ro miyae helem barawoumi, Petrus Lida yone yaele Yope yone yaele. ³² Ya mbaimo Petrus bele yo bum-bum nekate nemene ohowoye erewoumi namekai ro miyae hila rabore halaete Lida yona yo nemene. ³³ Petrus Lida yone ro mbai hubayeikoke, naro Eneas, oro nimainyekoke honoweke, ralo yakamaa mehae mbai mehine name hangga honoukoke. ³⁴ Petrus bele rore weunge, "Eneas, Kristus Yesus ware onomi ikete, anyu wa yum yumake mokonyeha!" Bele hu ikai nahibi Eneas anguke. ³⁵ Ro miyae Lida yona yaele Saron yo yaele bele yeubokera baeiboke Tuhanre hila rabo halewanyele. ³⁶ Ya mbaimo, Tuhan namoita ohowate miyae mbai naro Tabita, na yanne baei Dorkas yae kaenaeinyeke. Dorkas na u mekai nimi haba, namekai Tuhanre akauha helem mokoweke. ³⁷ Na hekibam mo bele miyae eha mokoungeboke kouboye hereke. Ro miyae bu kanyeboke, bumana yowane nekainyele. ³⁸ Lida yo yaele Yope yo yaele ahau bam, na nobeneyae, anggaei borokate Petrus bele yona, belene, ro be ukaimile Petrus bokore mekete weinyele, "Maei yore yaele mei!" ³⁹ Petrus anguke bele ro bee yaele nahibi ewate. Mekate nahibi Petrus yawanyehoke imae bumare ekate, Miyae nale nemene afae anyuke Petrusre bokone hebaiboke helene rimate, name Dorkas na wali nekewoye hauboye malo kani-kani mokowoye hauboyere me kelate. ⁴⁰ Bele yaere Petrus nemene ukeumi moite aibaleke, Petrus oro hele roroukoke Tuhanre ebeline bounge. Beufoke, Tabita re no honoyere weunge, "Tabita anyube!" Tabita na ijoko keleukoke Petrusre ereunge betamo anggem nuweuboke. ⁴¹ Petrus name nekeunge, afae aungunuke, betamo ro miyae hila rabore halewate yo yaele miyae nale arilewoyere weumi, Tabita waleuboke. ⁴² Petrus bele emeha mokoubokere Yope yo nemene a hureukoke, ro miyae helem Tuhanre hila rabo halewainyele. ⁴³ Petrus Yope yone heki holo nekeukoke, Simon obo ware mokowoye kiyae re nekewote.