¹ Ya mbai nekewate mo, Kaesarea yone ro mbai naro Kernelius, Italia maei fela falem. ² Kornelius ro mbai Allahre fe hele faeubounge, namekai na imaena nekewate yore, ro miyaere akau ha helem mokoweke, namekai Allahre ebeli na yanebaei moloungeke. ³ Huwae rai mbai mo, hu ijoko name hangga yeuboke, jokune honowoye, malaikat Tuhan meke weunge, "Kornelius!" ⁴ Kornelius aunguke, na ijoko malaikat mekere na u kuluwai rouke ereunge, malaikat re Waei ebeli weunge, "Mekane, Rowa?" Malaikat yae weunge, "Waei ebeli boimiyane, namekai akau ha ro miyaere yeimiyamae, Allahre bere bene nekeisi mekai ike, ⁵ Mana ro mbai Yope yore weinyele ende, ro mbai naro Simon, namekai Petrus yae kaenaeinyele. ⁶ Petrus ro mbai te bokone nekeye bele ro naro Simon, obo ra re mokoye kiyae, na imae bu haeinya hebeye." ⁷ Malaikat Tuhan are meke weunge Kiyae ekera, Kornelius nahibi ro bee na u mokoi jaele felayo mbai nabokone mokoweke yaele kaeneumikoke. ⁸ Kornelius bele ro riyaere a weumikoke, belera mo ukeumi Yope yore ekate. ⁹ Ya heuboke, nibi nolone eubate, yore nobainyeke, Petrus imae bumana kayere yeuketeke, hu ijoko maehaembai mehine mbai hangga ebelire Tuhanre bonnehindere. ¹⁰ Na u moni hele hubawounge, hamamre anenggonde kena yaroungekoke, na u mokoi hamamne mokowate he, Petrus na ijoko ereye bae, ¹¹ na ijoko ereye yaku buma wewe koukoke, malo mekai weke rubouboke kani randa oye. ¹² Bele malo ranne, obo yoku mehi-mehi oro kelire koijate yo, ara nakeleijaye yo namekai aye bumana koijate yo. ¹³ Belera a mbai meke weunge, "Petrus, anyu, obo mbai neisa foloiko anei!" ¹⁴ Bele yaere Petrus bele a mekere weunge, "Nahinggi bam, Tuhan!" Meyae Yahudi ro miyae eha hena mekainye honoye, bele obo yoku, meyae eli-hohore nekeijande!" ¹⁵ Benen kaye meke weunge, "Allah onomi mokouboke yae, weyae eli-hohore elekoi hangga ya." ¹⁶ Rake mekai mo roko name yakalaungekoke, betamo bele hambum weukike bumare ewoye. ¹⁷ Petrus bele ijoko ereke u benene hayeye, Kornelius ukeumi ro riya mekate Simonre imaene hineimiyate, mekate ro mau kabam ne mekaisebaite, ¹⁸ Bele ro riya mekate kaenaete, hinate, Simon, Petrus yae kaenaeinyele rake imaene nekeye. ¹⁹ Petrus bele ijoko ereke u benene hayeye, Allahre Roh meke weunge, "Ro name mekate ware baeyete. ²⁰ Anyu, are eyakoibo oyo, buhae ohokoijae, wambele nembainye bele ro riyae yaele eme, Reyae ukamaele ekate." ²¹ Petrus are akouboke weumi, "Reyae na ro niyae meyae mekaube hinaube ro, "Mekare mai kena mekaube?" ²² Bele ro name yae Petrusre wainyele, "Kornelius, fela falem, ro nehale Tuhanre bene, namekai Yahudi ro miyae nemene nataeimo rake ro re, namekai malaikat yae meke ukeume, weyae eye Korneliusre a weinyele mo anggaei borombonde. ²³ Petrus bele ro name mekatere kaeneumikoke imae eite arulaiboke, nembainye bele imaene honowate. Ya heubokemo, Petrus anguke, bele ro name yaele nembainye alainyekoke, Yopena ro hila rabo mbainye haleate ro Petrusre hakanyekoke eubate. ²⁴ Ya benem mo Kaisarea yone arulaiboke. Kornelius rakewoumi namekai naei aka baeke nemene arileumihike nekewate. ²⁵ Petrus imae eite aruleufike, Konelius meke hubayeikoke, oro hele roroukoke, Petrusre be isinewounge. ²⁶ Bele yaere Petrus kelukeunge, afae aungunuke mo weunge, "Afae anyu, reyae ro miyae mbaija, wambele nehanggambai!" ²⁷ Petrusre Korneliusre ane elete, imae eite aruleiboke ereye bae, ro miyae helem sele arilewoye nekate. ²⁸ Petrus bele ro miyae arilewoyere weumi, "Meyae mataei nekaube, meyae Yahudi ro miyae yaele Yahudi bam ro miyae yaele, mbainye enekei hangga namekai mbainye a elei nekejande. ²⁹ Bele yaere Allah meke rare ukeuke ro miyae hinye maenim niki kanau yaele namekai moite woke aibaleke yo yae eleijae. Bele aerene na rilibo bam bae reyae waei bokore mekale?" ³⁰ Kornelius yae weunge, "Ya keli moite wokande ya, rake hu joko name hangga yae, raei imaene Allahre ebeline bowannale, raei bene ro mbai yakalauboke, na malo wii halamam bouboye. ³¹ Meke rare weuke, 'Kornelius, waei ebeli boimiyarae anggaei borokawale, namekai waei akauha yeimiyare, ro miyaere yeimiyame, Rare utaei ikeuke. ³² Belene yae, ro ehi weimi Yope yore enate, Simon obo yoku rare haye kiyae, imae buhaeinye heuboke nekeye. Ro mbai naro Simon, Petrus yae kaenainyele, wennele rakere mende.' ³³ Belene yae, nahibi reyae ro name ukamaele wai bokore ekate, waei kenae buhae, kena foi moi rakere mekae. Mana meyae nemene rake anuwaunge, Allahre bene nare arilewoye, Tuhan mekayae ware ukete ro miyae huweijame, mana maere huweime." (Petrus Korneliusre Imaene Ako Faeuko Huweumi) ³⁴ Petrus ahuba raweuboke huweumi, "Mana nehale reyae itayaele, Allah nehale be ijone ro miyaere erei. ³⁵ Ro miyae rake kani kelana hila rabo halaeinyele yo, Allah bele yore kena buhae namekai ei hawemmile. ³⁶ Allahre ako faeuko Israel yoni-yonire huweijammile, Yesus Kristusre eita, meke aere weume, nembai sele aei Tuhan. ³⁷ Meyae menaei itayaeiboke, mekayae Yudea kani nemene yeuboke yakalauboke, Galilea kanine Yohanis bure kolowoumi ahuba, ³⁸ namekai, Yesus Nazaret na ro mbai, Allah oro mau heraweungeboke, Roh Kudusrena elae roke, yoranda-yoranda ro miyaere foi mokoumiyeke, onomi yarayeke, walobo yoni-yoni na u einya arulaiboke balayeke, mekanebam, Allah hakoungebokene. ³⁹ Meyae nemene Yesus mokowoye bum-bum maei ijoko yae erewande, Yahudi kanine, nemekai Yerusalem yone mokowoye bum-bum. Mekate Yesus ohali bumane habaeikoke. ⁴⁰ Bele yaere herekera namenem ya Allah waleungeboke, namoita ohowate yore Yesus Na u yakalawoumi, ⁴¹ ro miyae nemene bam, bele yaere namoita ohowande yoremo, maere eleumeboke, yakalaubokera maembele nembainye hamam anewande. ⁴² Maere ukeume, Naei ako faeuko ro miyaere humayende, Nembai sele Allah eleuboke, herewate yore, wali nekande yore, na wali hanggane kolommile. ⁴³ Allahre yendo-kayayo, Yesusre a foi-faeu foimo yae huwaimile, Naei eita onomi ema yaronde." (Allahre bene ro miyae nemene nehanggga mbai mo) ⁴⁴ Petrus, Yesusre ako faeukone ro miyaere huweumi bae, Roh Kudus bele ro miyae u ne mae-mae koumikoke borowate. ⁴⁵ Ro miyae hila rabo halewate yo, Petrus naei nembainye meubate yo, anggaei borowate fa yae boubate, mekanebam, Roh Kudus na u ne, na waline mae-mae koumikokene. ⁴⁶ Anggaei borowaimile afaeu ehi-ehi hele elewate, Allahre buma kolowainyele. Petrus weumi, ⁴⁷ "Ro miyae mbai jae hum eraisi hangga, bu honoye, ro miyae Roh Kudus na kena einye na wali einye mae-mae koungekokena, bu komambonde?" ⁴⁸ Petrus nemene ukeumi Yesusre ro yae bu kolonaimilere, betamo bele ro miyae Petrus riyainyele, Kaesarea yone, ya mehae-mehae hangga nembainye nekenaikondemo bensonde mende.