(Petrus beufoke Yerusalem yore meke) ¹ Beleramo Yesus namota ohowate yo Yudea kanina yo anggaei borowate elate Yahudi bam ro miyae namekai wali a henaa borokate itaeyaeiboke. ² Belene yae Petrus Yerusalem yore meke hee, ro miyae hubare folai mikokeyo Petrus neai aku yeuboke houbate, ³ Belene yae Petrus yae weumi, meyae ebu, romiyea huba efolokoi yoyaele hamam nembainye emmanenggo." ⁴ Beleyaere Petrus utainye raweuboke weumi, ⁵ "Reyea Yope, yone Akore ane riyanale, ra u oneiboi wanem oneubokale bele nolora ijoko eraele ime-nali wanem eralebea malo ratai wanem nahuba kelira bumara oke ra u kelaeuke meye. ⁶ Belene yae bumare wekale erale bae, obo yoku wanem oro keli, kani ranne ohate, ara nakeleijate, aye bumana koijate. ijoko erale. ⁷ Reyae namekai anggael boralebae a weuke, 'Anyu Petrus, rike obo-yoku rewei neisa mokoubo aneiko!' ⁸ Beleyae reyae wenale, Tuhan. Reyae emaeneikoi hanggaya, reyea bele haman roko mbai aneikoimo ya. ⁹ Bele yae benem bumara rare weuke, maka yae Allah foite eleukoke kiyea weyae nebam yae eleijea!' ¹⁰ Bele wanem mo roko name keleukoboke, benem yobouboke bumare eye. ¹¹ Bele hu he, ijoko erale bae ro name mekate Kaisarea raei nekewale imae bene mekai sebate. ¹² Beleramo Allah Nehalo yae weuke beleyo yaele hekoimibo eme, kensi-waensi ekoi jae embe. ¹³ Petrus meke, mehae mekai malaikat imaene meke hebeunguke a weuke, "Yopere ro miyae weimi ai, Simon re a riyennehimbe, wennele rakere mende. ¹⁴ Bele a yae ennuwembe yae meyae onomi endewembe, meyae namekai ro miyae waei imaene nekate yo nemene . ¹⁵ Petrus benem a huweumile, Roh Kudus bele ro miyae aumiboke, na bere yeuboke wanem mbai. ¹⁶ Reyae ubene nekeukehike, Tuhan Yesus Naei a eleukoke, "Yohanis buyea kolowombe beleyaere meyae Roh Kudus yae kolonaeyenggombe. ¹⁷ Bele aerene reyae itaei Yesus Kristusre hila rabo hale mandera naei Roh ikeume bele randa Tuhan Yesus Kristus nahele elemakonde, belene reyae hinye yae rare Allah hilendele? ¹⁸ Belera anggaei borokate akubam naubam yeiboke, Allahre bumane kolowainyele, na a elate, belewanemna Yehudi bam ro miyaere Allah weumile, nanebam mokowatere wali hena bonare enaijearonde. Ako Faeuko Antiokia Yore Meke ¹⁹ Bele ramo ro miyae here ware boibate, yo nebam yae mokowaimile Stefanus re haibokate herekene, eubate Fenesiare, Siprusre, Antiokiare Tuhanre ako faeuko hinyere hanere ehuwei nekayeke, Yahudi ro miyea remo hubaimile. ²⁰ Bele yaere bele nolona ro miyea ehi Siprus yeale Kirene yo yaele Antiokia yore meubate, Helenis holore Tuhan Yesusre a foi weubaimile hubaimile. ²¹ Tuhan yae hakoumiboke, belena ro miyea helem nahele elewate baeiboke Tuhan re orokele-mekelere mekate. ²² Bele wanem yeuboye ne, Yerusalem na hila rabore halewainyele yo Barnabasre ukainyele Antiokia yore eke. ²³ Barnabas eke bele ro miyae erewomilene nakena reimai sele hubawounge, belene a utaei-wataeine weuboumi, Tuhanre einyemo na kena bobo hele inyaibonde nekenayende. ²⁴ Barnabas re u foinye nawanem Roh Kudus yae na u mae-mae hele koungekokene yae ro miyae helem yaubaimile Tuhan re bokore meubate. ²⁵ Bele ramo Barnabas Tarsus yore Saulusre baeikote eke. ²⁶ Tarsus yore eke Saulus hubayeikoke mo yaweungehoke Antiokia yore mekete. Ralo yakama mbai bele jemaat yaele hubayaeikoke, wali a hena a kelewaimile, Antiokia yone namoita ohowate yo Kristen yae kaenewaimile. ²⁷ Bele ya, ako are waimile yo Yerusalem yora Antiokia yore ekate. ²⁸ Bele nolona ro mbai naro Agabus, Allahre royea aunguke weumile, rake kani kela moni-mai kabam sele nende hebende, Ondofolo Kladius hebende hee yae bele moni-mai mejembonde. ²⁹ Bele neyae Tuhanre hakainyekoke yo yae elate, Yudea yona nekate yore hambum yae arilemakondemo imamile, aei mena arilemahinde hangga imamile. ³⁰ Na wanem bele hambum penatua re hebate yore imamile, Barnabasre Saulusre imamilemo. naei me eita Yodeana yo enaijaronde.