Yakobus Haibokate Petrus Kilaiboke ¹ Bele he meinjeuboke Herodes me kaeuboke belena Jemaat re iwe-tasi koubai mile. ² Yakobusre haibokate Yohanis na ubake rameyaeli kunyeuboke hereke. ³ Herodes bele umekai mokowoyene Yehudi ro miyea nakena foi sele koibanyele, benem Petrus re yaele kileuboke. Bele he Israel maei ya kabam, feu ragi bam ya bene nekeisite mokaiboke. ⁴ Petrus re kilaiboke nehibi kawa einye hilanyekoke, felayo ro keli kelire kaya hebewainyele, Paskah yakabam yembonde moi ungayendemo yawenanyehonde ro miyea helem bere mende. ⁵ Petrus kawa einye hilainyekoke, beleyae Petrus kawa eita menduwende maei ebeli Allahre jemaat nahibimo mokowanyele. Tuhanre malaikat meke Petrus kawa eita hayengekoke meukuke. ⁶ Huwae mbai mo, Herodes, Petrusre yawennehonde moite enetere, felayo ro bee yaele honggate, na me oro ramoyo hayae kilainyekoke, mau kabam bena kayaa yo kaya hebewate. ⁷ Malaikat mbai meke Petrus honowoye anuwaunge meke hebeunguke, hehe kawa ei nemene naeukoke, malaikat Petrus na kelengera me nekeunge mo weunge, "Petrus hasale yae anyu!" bele ha kabam namene kilewainyele ane balekate. ⁸ Malaikat yae Petrusre weunge, "Wa uyolu keleiko, nawanem wa oromemalu hireiko!" Petrus are ukeunge wanem mokoungehake, benem weunge, "Wa malo kabam hireiko, Rare hakoitobo!" ⁹ Petrus bele malaikatre hakoungeboke eibaleke, Petrus itaeyeiboi, makayae malaikat mokouboke nemene yaeiboke-yakalaiboke, bele yaere Petrus hubawounge eleye, ime yae honale eha. ¹⁰ Hokolo bee aloinyekoke, kayaa yo raka mbai na yo, kayaa benem na hebewate yo, eibaleke ro mau kabam nenaei jae uke raweuboke, hokolo bee moite eibaleke, aloinyekoke kaikai mbaite ekete bae, malaikat Tuhan naroko mbai nundeuboke, Petrusre nukeungeboke. ¹¹ Petrus na une yeuboke ha nenaei ubene rouke, eleye, "Nehale ya, Tuhan Na malaikat mbai ukeunge meke, Herodes namekai Yahudi ro miyae na merau rainyehike namekai kenare kate mekai honatebondere, onomi meke ikeuke. ¹² Beleramo Petrus u bene nekeungehike ramo aloungekoke Maria, Yohanis nenake, Markus yae kaeneinyele imaere eke, belena ro miyea helem arilewoye Allah re ebeline boibainyele. ¹³ Petrus meke maunge mekaba-kaba habewoye mo belena maengge mbai naro Rode meke mau raweuboke. ¹⁴ Meke Petrus re a yae boroke rei mai sele na u ne aungebokeko, bele yaere mau eraweiboi, befoke ete na kahili wa bokore yaa hebaelejeye weumi Petrus yae meke ma u bena meke hebeye. ¹⁵ Beleyere Rode re wanyele weyea keugae koyae ha, benem weumi nahele-hele yae wamale, beleyaere na kahili wa yae wainyele, "bele na malaikat yae meke!" ¹⁶ Beleyae Petrus nahibi-hibimo mekaba-kaba habewoye, belene mau rawaiboke bae Petrus yae mau bene eranyele hebeye, kulu-kulu wanem yaeiboke. ¹⁷ Petrus a maleu meumi, nemene maleu yaeibokemo, a weumi, mehae mekai jae Tuhan yaweungehoke kawa eita meibaleke. Namekai weumi, "Yakobusre yaele rake ahuba huwennekombe namekai aei aka baeke hila rabo mbainye halaende yo yaele a wemmile." Bele Ramo Petrus Alongekoke Anuwau Ehire Euboye ¹⁸ Rai yaeubokemo felayo kayare hebewate yo aku keteuboke, Petrus kawa eita mekukene. ¹⁹ Herodes Petrus re beungokoke beleyaere ehubayekoi, belene yae kayare hebewate yo a hineumikokemo a ukeumi kaya yo haikoke. Herodes Yudea kanira aloungekoke Kaisarea yone eke nekewoye. ²⁰ Bele he Herodes ikele hele Tirus yeale Sidom yeale ro miyeare kouboumi, belene yae Sidon ro miyae a moi-moijae mekate Blatusre ukainyele. Blastus Herodesre buyo ayo inyale falemre nekewoye. Sidon ro miyae mekate Blatusre wanyele, maei yo nekande hamam Herodes nekeye yora mate. ²¹ Beleramo yambai are elaikoke wanem Herodes na yomalo yam malo ketengeboke ike na kendangne nuweuboke na ro miyaere a weubomi. ²² Ro miyea neate-neate kaenate, ''Rake allah re afeau bae eleye, ro miyea maei afeau bam! ²³ Nabelehe, malaikat Tuhan mefae uke, buma kabam Allahre eraiseinye, na u melem aki yae anewate, ninae hereke. ²⁴ Belehera Tuhan re ako faeko hureweke ro miyae emerei-emerei emerende. ²⁵ Barnabas, Saulusre na afaeu huweimikemo beiboke Yerusalem yore mekete, Yohanis, Markus yae weubainyele ukainyele nembainye hakoumiboke.