Pasal 13
Barnabas Saulusre Eleakokate
1
Ya mbai Antiokia nolone Allah na meli mekai jaele yo ro miyae a utaeite kelaeimile yo yaele naro niyae, Barnabas, Seimeon yae wanyele, Niger, Lukius Kirene na, namekai Menahem Herodes yaele nembainye naraiboke, falem kabam nekewoye, namekai Saulus yae.
2
Mekate Allah re ei molowanyele, Roh Kudus meke weumi, "Saulus re Barnabasre ikai waemmihi Reyae kaneumikokalere ukamilere enei mokondere!"
3
Beleramo, ei molainyekoke baeufokemo, mekate heiboke name hokolo bee maei uranne, Saulus re Barnabas koloumiko, ukaimile Siprus yokoba re eibote.
4
Belera Roh Kudus ukeumi Barnabas re Saulus re Seleukia yore ekete betamo wakara haweiboke Siprus yokobare ekete.
5
Salamis yone mekete Allah re ei mom-mom imae einye Yesus Naei ako faeuko hubaimile kelewaimile, Yohanis nambele hokoube naei rikeiboite ekate.
6
Siprus yokoba nemene ohaikoke, ekate Pafos yone Yahudina ro naro Baryesus bulore mokowoye hubaeyaeikoke.
7
Sergius Paulus, Siprus yakoba ne gubernure hebewoye, itaeito habaro nekewoye. Barnabas Saulusre riyeumihike Allahre ako faeukore borombondere.
8
Beleyaere, Elimas bulo rorele, naei mekai naro weubainyele, meke gubernure, hilewounge, Barnabas Saulusre ako faeuko nare ehuweijae namekai gubernur na hila rabo menendere mokowounge.
9
Beleyea Saulus, Paulus yae kaenewainye, Roh Kudus maa-mae koungekoke befoke Elimas re ereunge,
10
Naei a weunge, "Weyae nahele ameyae karebaeijae mea-mea koikokete, nebam nawanem bulo walobore kelu, Allahre wali nahele weyae hileyae, weyae kenabam Tuhanre nibi foi hilei kondere?
11
Mana wa ijoko ereibo Allah ehe bukulu inyetere wa ijoko roroneikonde, hu ereiboi ekaneiboi ya maehae-mehae nekeukonde. "Bele hee yae na ijoko naa rorainyekoke, oubom yeuboke, romiyea re beaiboumi namera yawainyehoke.
12
Gubernur bele wanem erekene bae, Allahre hila rabo kabam hele halewounge, fa yaea boiboye.
(Paulus Barnabas re Antiokia Yore Ekate, Pisidia Kani Kabam Na)
13
Ya ehimo, Paulus na kahiliwa yaele wakara hawaiboke Pafosra, Pergara, Pamfilia kanina, bele yaere Yohanis nare nukeumiboke Yerusalem yore re beufoke eke.
14
Beleyeare Saulus Barnabasre nahibi-hibi eboute Pergara mo Antiokia, Pisidia kanina. Bele Sabat ya, Tuhanre ei moloi-moloi imae belere ekete nuweikoke.
15
Allah Na me hukum raikoke boraibokera, ei moloi-moi imae na falem ya bele ro bee re weumi, "Meyae bee a utaei jaelena, rake ro miyae nekatere wemmi,"
16
Paulus anguke meyae itaei ikeumi mo, ahuba raweuboke weumi, "Aka naei baeke naei Israel yoni-yoni, nawanem ro miyea Allahre boraungele yo, anggaei borombo!
17
Israel yoho-yonggo, yobe-yobe nekayeke, Allah eleuboke wekeumi Mesir ne nekewatera yaweumiboke mai baleke.
18
Ralo yakama rorele u bee, Neyae, Israel maei u mekai wamekai a kala-kalane meubate heraweumeke.
19
Beleyaere Kanaan kanina nekewate yo, ondofolo mehine bee Allah houkoke hayekokera bele kani Israel re ikeumi.
20
Nanemene beubate yakalawate, ralo yakama 450, beleramo Allah wali nouke haeimile yore kinyeumiboke, meke Samuelre hee ne.
21
Beleramo Karina mayeugoke ondofolore riyewate belene Allah keleumiboke kish Saul re kelu Benyamin re yohana ralo yakama roreleubee mengekekoke.
22
Beleramo Allah ondofolo Saul re kerengokoke oke mo Daud re raneukike ondofolore yembondere, 'Allah yea wemi Daud Israel re kelu reai kenane mewefike nawanem reai kena kale wanem neyea mokobonde.'
23
Daud re orona-mena yora wali-fa hena fa yakalambonde, naro Yesus.
24
Namambae Yesus eyakalai boi hee yaa, Yohanis ro miyaere weumi, ma nebam mokowaube aerena bu rilombombe.
25
Yohanis mokokoke riyau bonnele he, 'Weumi meyae rare hinyeyae elaube? Reyae Niyae bam ya, beleyaere erembe, Ro mbai mende, naei oro memalu re reyae ekulaikoi hangga.'
26
Aka naei baeke naei Abraham re orona-menayo na wanem mai nolona Allah, femako faei jateyo rake wali hena a aere weumi.
27
Maka, nebam neyae Yerusalem ne nekate byu beyebare hebate yo Naere ro eroiboi Yesus re haibokate.
28
Honaibondere nibi baeubate am ne Pilatus re riyainyehi Yesusre hombondere.
29
Homo faene molaikoke ijene, Naei no ohali randa rubainyeboke oke, ekate Na no roukate bule einye nekainyele.
30
Beleyaere here nolora Allah waleungeboke,
31
ya helem na moita ohowate yore u yakalauboumi, Galilera meke Yerusalemne nemene Naei yebaei-bubaeite yaeibokate, rake kani kelane huwaimiyeke.
32
Meyae mare Allahrena afoi-feau foi yobe-yobere ukeumi a yae mare wayembe,
33
Allah are hebengekoke wanem eyae Nafafa mekai nekandere aere ekeume, Yesusre waleungeboke, homo fea Mazmur benem kayene moloukoke: 'Weyae Raei kelu, manaya Reyae waei ataeite yeubokale.'
34
Allah Yesus here nolora waleungebokene, benem himi-nebamre ebeyei, Allah rake mekai jae eleukoke, 'Reyae mare kui-kui mae-mae hayerembe, Daud hubawounge wanem.'
35
Belene yae, homo fae Mazmur ehine, molaikoke, 'Weyea ro miyae yolo-yolo na wali nekeijate yore nebam emokoyei.'
36
Daud na yoho yonggo mokoumikokera, Allah re kena ijene mokowoye, belera mo hereke, ekate na yobe-yobe mai bule einye ataisike,
37
beleyaere Yesus Nembai Allah yae walengeboke, ro miyea heraiboke nolora, na ijoko nebamre ereiboi.
38
Belene yae, meyae itaiyembombe, Yesus re eta manebam neyae fanyenenggombe,
39
Yesus re eta ro miyae wali nahelere elaikoke yo, wali emmihayengonde, Tauratne moloukoke na walire ehubayeikoi hangga.
40
Beleneyea ma u kaya yeale, homo wafae ne molokoke kayea maune yembonde yaele ne:
41
'Eremmi, ro miyae aukae-kaere kojate yo! Bumara ohonaikonde nawanem nebam enaibende, eremokonde yane, meyae nahele re eleikoi, nawanem ro miyae ehi yae mare ekeleikoi hangga."'
42
Belera Paulus Barnabasre eibaleke belena ro miyae hokolo bee re waimile, bena sabat yane benem mebe.
43
Yo imae-ralo imaera here ukemo, Yahudi ro miyae na wanem Tuhanre hakanyekoke yo, Paulus Barnabasre hakaimiboke eubate, namekai hokolo bee re riyaimile, Allahre kena buhae eleye ijenemo nekeneyende.
44
Sabat ya heubokemo bele yona ro miyae helem sele arilewoye, mekate Allah re ako faeuko boronatere.
45
Bele yaere, Yahudi ro miyae ijoko erewaimile, elate ro miyae helem sele arilewoye, kena hensem bae nakene aumiboke, Paulus a elewoyere aukae-kae yae koubainyele.
46
Bele yaere Paulus Barnabasre buhae ehokoiboi a weimile, "Nehale, Allahre ako-faeuko na bemere mare ungayembe, mekanebam, meyae elaube mai u nehale, namekai wali hena ehubayei nekemembe, belene yae meyae wekande yo ehire kelaemile.
47
Habuhinebam, Tuhan maere a ukeume: 'Reyae mare elembokamale yoranda-yoranda hehere yaeuboke, ako faeuko kelemiyembe huwemmiyembe rake kani kela nahubane ennemokombe.'"
48
Yahudi ro miyae bam bele a boraibokene, rei mai aumiboke koubate, Tuhan re ako faeuko buma kolowanyele. Nawanem bele a faeuke elaikoke wanem, wali hena hubayaeikoke namekai hila rabo halewaite.
49
Tuhan re ako faeuko bele kanine hureweke-naleweke.
50
Beleyaere, Yahudi ro miyae, miyae maenggere bele yona beyu-beyebare ahufu hubaimile, Paulus Barnabasre naei kanira hukaimihike eibaleke.
51
Beleyaere hokolo bee noro bahe bele ro miyae bene kanine ruboinyeboke. Paulus Barnabas re aloinyekoke ikonium yore ekete.
52
Yesus namota ohowateyo Roh Kudus yae aumiboke rei mai sele hubawainyele.